LA MORENA🇲🇦🔞لامورينــــــــا🇲🇽🔞

45

"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"

٠ بقلم : ميرا 💆🏻‍♀️
٠ الجزء : 45

أما "هما" فغير قطعو الخط مع خالد خرجو من الكولوار كيدويو و ايتناقشو بهدوء ، كيحاولو ما أمكن ايبانو كعائلة عادية فحالها فحال كاع العائلات ، مدة عاد تفارقو و خرجات راضية لبرا مخلية مهدي واقف كيكوموندي على الماكلة..

حتى خرجات سكينة كتنش على عينيها بعدما غسلات وجهها و عاودات طراسات عكرها ، وخا هكاك وجهها باقي مزنك و التنخصيصة مرة مرة كتهرب عليها ، حتى كيبانليها مهدي لي مع خرجات مع قنصها بعينيه و شير ليها بعصبعو..

مهدي : كملتي ؟

شافت فالناس لي ضايرين بيهم و بلعات ريقها ، كانو قراب لبعضياتهم و هو مازال كيتسناها تجاوب و كيتفحصها بعينيه ، غير أنها اكتافات تحني عينيها و تحرك راسها بالايجاب بلا ماتنطق الشي لي خلاه ايعقد حواجبو و ايهز ليها راسها الفوق حتى شافت فيه..

مهدي : كتبكي

زيرات على فمها حابسة الدموع و عاودات حركات راسها بالنفي ماقادراش تنطق ، حتى كتحس بيه شدها بالجهد من كتفها و قربها منو حتى ضربات فصدرو..

"شوفي فيا..علاش كتبكي"

هربات ليها شهقة مسموعة و تنترات منو مبعدة لور و كتنخصص بالبكا..

سكينة : بعد مني..ماكنبكيش غير بعدو مني

خرج لسانو و عض عليه بالجهد ، كيشوفيها كيف كتبكي بهستيريا و كيشوف فالناس لي جاب الله ملهيين و مانتابهوش ليها ، مسح على لحيتو جوج مرات عاد رجع شافيها و نطق بحدة..

مهدي : غتمسحي داك الوجه و طيري لطوموبيل ماحدي شاد معاك ايدي..مزياانة هااادي ؟

شافت فيه مكرهة بنظرات كلهم لوم ، فداخلها باغا تمشي تعنقو و تشكي عليه ، هي عارفة مزيان بلي هو لي عندها و أي حاجة كيديرها كتكون فمصلاحتها وخا كلشي رافضة أنها تقبل هاد الفكرة..!

سنوات و هي معاه ، كبرات معاه و ايمكن أي خطوه خطاتها معاه ، عارفاه و حافظة طباعو ، عارفة بلي لاتعصب عليها كيتقلب و عارفة بلي صبرو معاها وافي غير هو نهار كيتقاضى صبرو مكيعقلش عليها ، دكشي علاش و رغم الغضب لي عامي عينيها قررات تنساحب من حداه و تخرج بالزربة من سطاسيون لطوموبيل نيشان ، غاديا و كتشهق بالبكا الموت ولا هاد الحالة لي عايشاها ، فالبلاصة تبعها حتى هو بعدما خلص و خدا الماكلة ، جاي مخنزر و طالع ليه تفوار الدم فالراس شعلاتو و عرفات كيفاش تشعلو..

راضية كانت خارجة من عند مول صاكة هازة جوج باكيات دالكارو و مصغرة عينيها كتشوف فيهم ، غير من وجوههم و تعابيرهم عرفات بلي كاين مشكل و مشكل كبير بين هاد الجوج ، حسات بلي الأجواء مشحونة مع البدية وخا هكاك ماحاولاتش تفهم ولا تسول ولا حتى دخل بيناتهم حيت بكل بساطة ماشي سوقها..!

فاللخر حطات كارو جنب فمها شعلاتو مزيان حتى تحرق عاد نفتات الدخان كتنهد ، دبا عاد غتنفس و ايتحلو ليها العروقة دارسها ، سفاتو كامل و زادت الثاني عاد حركات رجليها جيهتهم و ركبات فالطوموبيل..

لقات سكينة ضامة راسها بايديها كتشوف فالزاجة بعينين نايمين و الدموع راسمين طريقهم على خدودها ، مهدي طلع مد لراضية الكوموند دالماكلة تحطها حداها ، و قاد الكوسان كيزفر و إيدور فعينيه بعدما ضارت حداه ريحة الكارو..

راضية فهماتو علاش كيقلب و مدات ليه باكية قبل مايتفركع و ايفركع بيهم هاد الطوموبيل ، كان مخنزر و عروق عنقو حتى هما مخنزرين معاه ، كيتنفس بعنف و مزير على الكيدون بالجهد ، السيد رجع حاقد و ساخط الشي لي خلاها تعلي حاجبها و ترجع كتشوف قدامها باستغراب و السؤال الوحيد لي كيدور فبالها هو "واش كاع العشاق عايشين نفس الحالة ؟ واش الحب كيمرض الإنسان لهاد الدرجة ؟؟" ، و وخا دورات هاد السؤال فراسها ماعرفاتش الجواب حيت بكل بساطة المعنى ديال كلمة "حب" ماعارفاهش و ماعندها حتى رغبة باش تعرفو ، فاللخر رجعات عقدات حجبانها كضور الكارو فايديها ، عايشة فعالم ديالها بوحدها منعازلة على البشر و مخليا ليهم الحياة و مايجي منها..!

#يتبع..🔥