"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"
٠ بقلم : ميرا 💆🏻♀️
٠ الجزء : 34
كان جاي ناوي ايقضي عليها و ايبين لكاع ناس بلي شخص وحد لي حاكم هاد القنت و سميتو دياغو ، لكن غلط و ماعرفش ايتعامل ، تعنا بالكسدة و الرجلة الغابرة ، حتى لقاها لاعبة معاه بالعقل و الحيلة لي قادرين ايحطوك تحت صباط بلهلا ايطريه ليك..
كلشي بعد كيجري و ايغوت حتى خوات الساحة و مابقا حتى وحد كيدور ، دياغو هرب كيلفار لحدا الزبل شاد على راسو و ما هي إلا ثواني معدودة حتى كانت البوطة تفركعات بالجهد وسط الزنقة ! فحال الزلزال لي هاج عليهم جاب الله جات بعيدة على الديور و ما كاين حد أما كون زهقات الروح..!
خسرات سيفتها مضرقة وجهها ، حتى كيبانو ليها شي دراري أخرين كيخدمو معاها جايين كيجريو يالاه وصلاتهم الخبار..
"رازية أش واقع ؟ قالو لينا مضا ربة !"
كحبات كتنش بايديها الفوق الريحة دغيا تجهدات فالبلاصة..
راضية : ماكاين والو..
ضربات ليهم على كتافهم و تحركات داخلة لدار و كتمسح فايديها لي توسخو ، داوية مع راسها و مازال مابردات ولا تسرطات ليها هاد الحالة لي وقعات..
"شو فين وصلات بيك أراضية..!"
مع سدات باب الدار و دخلات ، مع بدات كتعيط..
"صباااااح"
غير سمعاتها كتغوت ليها خرجات عندها مخلوعة كتفيبري..
صباح : ن ن نعام أختي ؟
هزات الكارو و تحركات جهة الطيراس مخنزرة و كتمسح فايديها..
راضية : الماكلة موجودة..دوزي شوفي ليك ماتاكلي
و خرجات لطيراس مخلياها مبلوكية فبلاصتها و مصدومة من الطريقة لي كدوي معاها بيها فحالا ماوقع والو ، هي سمعات كاع الهدرة لي دارت برا ، سمعات معيور دياغو و حسات بالبوطة ملي تفركعات ، ماحاولاتش تزيد تدوي ولا تسول ، حطات ايديها على قلبها لي كتحس بيه غيطيح و رجعات دخلات لبيتها ، الشهية مشات و الخلعة مازال راكباها من صبعها الصغير..
_"تعاشات العشية و بردات الشمس.."
وقف قدام الباب و صونا ، ثواني حتى كانت جات صباح و حلات ليه ، و غير هي شافتو قدامها وسعات عينيها على الجهد و نطقات بفرحة..
صباح : مهدي!!
تلاحت معنقاه بالجهد مزيرة عليه و هو فرحان بيها ، من ديما كانت فحال بنتو الصغيرة ، كبرات قدامو و معزتها من معزة ختو أميمة..
مهدي : بونيطا ميا..
عنقها بالجنب و دخلو لداخل عاد قدر ايشوفها مزيان ، كيف كبرات و زادت زيانت ، فحال الوردة لي تفتحات ، بشرتها الحليبية لي دغيا كتحمار و عيوانتها لي كيبريو ، جمالها و أي حاجة فيها كيشكلو غير البرائة و الصفاء..
مهدي : البنت عندي كبرات و زيانت..خاصني نحجبك فالدار أشريفة مابقاش الضحك !
ضحكات بخجل و رجعات عنقاتو مخبية وجهها فصدرو ، كان مستمتع بشوفة عويناتها و زينها البريئ لي كيفكرو فالطفولة ديال وحد الوقت ، حتى دور راسو و شاف وجهها قدامو ، من تعابيرها تعرف المورال و العيا لي لعبو عليها ، رجع شاف فصباح هاز ليها راسها..
"واش هادي بصح ختك ؟"
صباح (جاوباتو على نيتها) : اه"
مهدي (رجع عنقها عندو كيشوف فراضية كيف جلست كطرطق فعنقها معلي حاجبو) : العجب..!
أنت تقرأ
LA MORENA🇲🇦🔞لامورينــــــــا🇲🇽🔞
Hành động"هي" مطالبة من طرف العدالة..و "هو" المطالب بها🔥❗️ لعشاق #الأكشن🔥#التشويق..#الحماس..#الصراع..#تهريب_المخدرات🚬..و المزيد في رواية "لامورينــــا🇲🇦🇲🇽"
