"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"٠ بقلم : ميرا 💆🏻♀️
٠ الجزء : 12رجعات ركبات فطوموبيلتها شادة الطريق هاد المرة لعند "متولي" ، صغرات عينيها ملي حسات بتيليفون كيفيبري و بمجرد ماشافت سميتو جاوبات..
"هاني جايا"
تقطع الخط و رجعات حاطة كل تركيزها مع الطريق لي اختاصراتها و فدقائق وصلات قدام الفيلا دمتولي ، بلاصات قدام الباب و هبطات كتخمم فبالها سؤال وحد ، "فشنو ايكون باغيهم متولي ؟" ، داخلة خطوة بخطوة و كتخمم حتى بان ليها كلشي كاين من غير ربيعة لي رجعات لدارها بعدما سالات الخدمة..
متولي (تقاد فالجلسة و بدا كيدوي) : مزيان ملي جيتي دغيا
جلسات قبالتو و دورات عينيها بيناتهم عاد غمزاتو بعينيها بمعنى أش كاين ، جاوبها خالد بهدوء..
خالد : متولي باغينا..فوحد الموضوع
مهدي (علا حواجبو) : نتا عارف !
سكينة : من ديما خالد هو لول كتسبقو الخبار ماشي حاجة جديدة ! (تنهدات كتلوح بايديها) قولينا أمتولي خلاص خليني نطلع ؟
راضية : خالد (خالد شافيها) بريكة ؟
خالد (تنهد كيحل فجيبو): خودي
راضية (شداتها من عندو و جبدات بواطة صغيرة حطاتها قدامها) : بسم الله أمتولي..
متولي : ولادي..نتوما عارفين معزتكم عندي قداش
مهدي (تبسم باستهزاء): الله أودي !
متولي : (شافيه) ملي كنتو صغار و نتوما معايا و شحال من عام و نتوما مشاركيني الخدمة حتى تعلمتو الحرفة و وليتو ريوسا كبار تبارك الله..رااني فرحان بيكم !
كانت ساكتة كتسمع ليه ، حطات نيبرو قدامها و حلات البواطة لي كان فيها كارو و طريفات دالحشيش كثار من شوفتهم كيبانو جداد و نقيين "الدخان" ، بليتها الوحيدة فهاد الدنيا مشا ليها مع الد م ، هي لي ماخلات حتى موصيبة ماداقتها فالصغر ، البيضة , الشراب ,حتى لفانيد عرفات حلاوتو و فاللخر حتى حاجة من هدشي ما شدات فيها ، غير كتزهيها بيهم و دوز ، غير هو "السيجارة" ، "الكارو" ، "الرينو" , عاشراتو و عاشرها ، عزات عليه و عز عليه ، و هاهما مصاحبين حتى تطفى الحجرة ! فهاد العالم كلهم كيقولو نفس الهدرة "لي كيبيع , مكيضوقش ، كنبيعوها ، و مكندوروش بيها" ، هدرة تكسرات ، تخرقات ، تحرفات و تبدلات على يدين راضية..!
سكينة : وا بقينا هنا معاك أمتولي !! (شافت فخالد) دوي نتا ؟
خالد خنزر فيها بلاما ايدوي خلاها تقلب وجهها لجهة الثانية ماعاجبها حال ، حتى رحمهم متولي و رجع نطق كيمسح على جبهتو ..
متولي : غندخل معاكم نيشان...عارفكم من شحال هادي بغيتو تخرجو من هاد الحرفة و تبعدو على هدشي..بديتو كتكبرو و تفهمو حسن مني انا لي كبرت و شاب ليا الراس و واعدتكم بلي غتخرجو فأخر أفير درناها..كنتو قد كلمتكم و كملتو معايا حتى اللخر..حتى انا غنكون قد كلمتي معاكم ولكن قبل ضربو معايا أخر ضربة..(كيحسب بصباعو) سميوها أخر أفير..سميوها الفينال..سميوها النقطة ديال خدمة سنين..سميوها لي بغيتو ! ..غير هو لي خاصكم تعرفو و تيقنو منو..هاد الأفير عمرنا درنا فحالها..مولفين كنخدمو فلازون و حتى لاخرجنا عليها كيكون بيناتنا البحر..ولكن هاد المرة..(خدا نفس عميق و نطقها خطرة وحدة)..هاد المرة غنهربو "طُن و ميتين و خمسين كيلو ديال لادروغ" من الميكسيك (هز فيهم عينيه و نطق بحزم) للمغرب.. ! "
#يتبع..🔥
أنت تقرأ
LA MORENA🇲🇦🔞لامورينــــــــا🇲🇽🔞
Acción"هي" مطالبة من طرف العدالة..و "هو" المطالب بها🔥❗️ لعشاق #الأكشن🔥#التشويق..#الحماس..#الصراع..#تهريب_المخدرات🚬..و المزيد في رواية "لامورينــــا🇲🇦🇲🇽"