LA MORENA🇲🇦🔞لامورينــــــــا🇲🇽🔞

52

"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"

٠ بقلم : ميرا 💆🏻‍♀️
٠ الجزء : 52

_ "المغرب..🇲🇦..بلد الشرفاء"

فديك البلاصة ، البلاصة لي الداخل ليها مفقود و الخارج منها مولود ، الصخرة الكحلة لي نهار ايهبطوك ليها عرف راسك مشيتي ، و شكون من غيرها ؟ "الولاية الكبرى"..!

الولاية لي جامعة ما جامع القلب ، كاع أنواع الإجرام مكبث فيها ايحبسوك ثمنية و ربعين ساعة عاد ايدوزوك باش ايعرفو فين ايسيفطوك ، الولاية لي كانت غطرطق و الغوات مسموع فيها على الجهد ، البوليس خدامين ماكين غا شد نتا دوز نتا طلع ، الشكا و البكا و السبان كلشي ساخط و حتى وحد ماراضي ، هدا هو حال البلاد..!

فوحد البنيقة لتحت مقسمة بين "الجيور" ، كانت الحيحة نايضة ، الحباسة لي يالاه غينقلوهم مجموعين فحال النمل كيضربو فالحديدات و ايغوتو ، راس العام باقا ليه قل من ربعة و عشرين ساعة و كالعادة البشر كيبدا الاحتفال سيمانة قبل ، الكيسان كيتكبو سبعيام قبل مايديرو ليلة الدخلة ليلة راس العام ، ديك الساعة كتولي السكرة هازة العلام و السطافيط غير كتعمر و تلوح ، البوليس واقفين ليهم عند راسهم بتعابير صارمة و هما منوضين حالة ، حتى تسمعو خطواتو فالدروج ، صوت صباطو سابقو لعندهم ، هابط عاقد حواجبو كيشوف قدامو نيشان موراه جوج من البوليس تابعينو بنفس التعابير ، رمقهم بنظرة وحدة لا أكثر و رجع شوفاتو فين كانو ، الحباسة غير سمعو حسو و شافوه صقلو فالبلاصة متبعين ليه العين ، شي كيسول شكون هدا و شي عارفو شكون خاصة لي فايت ليهم زايرين سويسرا ، حتى نطق وحد فيهم بالجهد..

"الشيييف"

ضور فيه عينيه لقاه لاصق فالحديدات و مطرطق عينيه ، غير شافيه و هو ايضحك بقذارة..

" بغيت نبوول..ديني بولني! "

قبل مايزيد اينطق غفلو بوليسي بضر بة مجهدة لكرشو حتى تردخ و طاح مكمش كيتوجع فالارض و الحباسة كلهم تخلعو و تكمشو ، ماظهر حتى تعبير على وجهو ، مازادش رمش فيهم و رجع مكمل طريقو بهدوء ، خطوة مور خطوة حتى كان وصل لغرفة معزولة و مظلمة ، حل الباب ديال الحديد و دخل كيشوفيه كيف معلق من رجليه و عريان ساترين ليه غير عورتو و كولو مضروب من ساسو لراسو ، بكثرة الضر ب وجهو تنفخ ، ذاتو زرقات و عينيه ولاو شبه مغمضين ، سمع الباب تحل و حل فمو بالشوية باش اينطق بصوت راجف..

"ر رح رحموني.."