لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"
٠ بقلم : ميرا 💆🏻♀️
٠ الجزء : 8
_ فالمركز الشرطي "كورزا ديل سواريز" ، ولاية غيريرو..🇲🇽
مع الباب كان ميخائيل داخل مخنزر و عيونو بكثرة ما مخرجهم تحلف عليه حتى غيطرطقهم ! المركز كولو مقلوب سفاه على علاه لدرجة كاع لي تما معصبين و طالع ليهم الد م بسبب "العملية" لي فشلات..
ميخائيل : (حل الباب حتى تفرع) راااامووس !
راموس : (بلع ريقو) خيفي
ميخائيل : كاااارلووس
كارلوس : (عاقد حواجبو و ايديه خدامين فالحاسوب) خيفي
ضرب فالبيرو حتى تهزو الملفات و غوت مزير على سنانو..
ميخائيل : كااااع لييي هنااا !!
كاع أعضاء الشرطة لي كانو فالبيرو علاو فيه عينيهم ، فالبلاصة عاود خبط فوق البيرو و زاد غوت حتى حمار ليه وجهو فحالا جيفتيه بربعة اليدين..!
ميخائيل: كلللللكم..كللللكم خاااصكم تعععرفووو دباااا كييييدارت ليييييها..(زاد غوت حتى تخلعو)..رااااامووووس!!"
راموس : (العرق هابط ليه من جبينو) خيفي..مالقينا حتى تسجيل !
ميخائيل : (خرج فيه عينيه حتى سكت): ماكيينش ؟؟؟ و فيييينها..دويييو !!!
عاود تحل الباب للمرة الثانية ، و هاد المرة دخلات قائدة الفرقة الثانية "بالوما " عاقدة حواجبها ، هازة ملف كحل فايديها و تابعينها خمسة من أعضاء الفرقة..
بالوما : اجتماع أميخائيل !
ميخائيل : (شافيها مخنزر و جلس فالكرسي) خييفا..فيين كنتي كاع هاد الوقت ؟!
بالوما : (بصرامة) كنت كندير الخدمة لي مادرتيهاش و نتا كتغوت..
كارلوس عرف القضية غتبدا تحماض بيناتهم و قرر ايدخل..
كارلوس : ايمكن خاصنا نبداو ؟
بالوما حركات راسها و حلات الملف قدامهم بلا مقدمات نيشان دخلات فصلب الموضوع..
بالوما : كلشي بدا مع العشرة دالصباح فاش دازت TESLA X من الطريق..
لاحت ليهم الوراق قدامهم و لي كانو كاملين عبارة عن موديل مدقق دالسيارة عاد كملات..
بالوما : حديدة مغتقدرش تلقا فحالها..وخا تشري ختها..وخا تشري حسن منها..حيت هي لي قاداتها بايديها ! ولا نقولو..بدلاتها بايديها..(ضربات فوق الورقة فصبعها) بدلات الموطور..خدماتها بموطور V8..خاصني نقول جوهرة ماشي موطور ! فيها سبعة ليتر جهد ربعمية شعلة..يعني ماخاصكمش تصدمو ايلا ماقدرتوش تلحقو عليها (عقدات حواجبها و شابكات ايديها) خاصكم تصدمو كون لحقتو عليها..و هاد الاحتمال بحد ذاتو ميمكنش ايوقع !
ميخائيل رخف على حواجبو بصدمة كيشوف فالموطور لي مرسوم قدامهم ، عاد فهمو علاش طارت بذاك الجهد ! و بالوما مازال داوية حدا راسهم..
بالوما : نتوما عارفين بلي ماشي أول مرة غنطيحو مع هاد السيدة و ماشي أول مرة غتهرب..كاين لي عرفنا بيهم..و كاين لي عمرنا عرفنا بيهم ! و فاللخر ؟ (تنهدات كتشوفيهم) فاللخر لا فهادو لا فدوك ماقدرنا نشدوها..غير هو..هاد المرة خدمات بوحد البلان فشكل..بلان جديد علينا .. "
ميخائيل : هي فين عمرها عاودات البلان جوج مرات..شنو سبابنا فهاد الحالة من غير هدشي !؟
بالوما : (حركات ليه راسها بالإيجاب) عندك الحق أميخائيل..ولكن قوليا ؟ علاش قصدات طريق ديال "مادري سيرا ديل سور " ؟
ميخائيل : (كيدوز صبعو الصغير على لحيتو) طريق خاوية..و مافيهاش كاميرات
حركات ليه راسها بالنفي خلاتو ايعلي حواجبو بدهشة ، كيتسائل شنو مازال كاين ؟ و يالاه نوات تجاوبو حتى سبقها راموس..
راموس : حيت فيها طريق ثانية الفوق منين تقدر تهرب بلا مانعرفو
بالوما (وسعات عينيها و شيرات ليه بصبعها): هاااديك !
ميخائيل : كييفااش ؟ كيدارت طلعات من الطريق الثانية ؟؟ را لوطو تفركعات أبالوما !
بالوما : (رجعات تقادات فجلستها) نكمل باش تفهم..هي ختارت ديك الطريق بالضبط حيت خاوية..فيها غابة...بحر..و طريق ثانية..كاع لي تقدر تحتاجو باش تهرب و تهَرب معاها دكشي لي بغات.. تبعاتكم فطريقها حتى خرجات لدورة لي فيها جوج طرقان..وحدة كتخرج و وحدة كديك نيشان لجرف يعني مكتخرجش ! و نجحات تودر عليكم دكشي علاش ماقدروش الفرق ايعرفو منين دازت و ختارو الطريق لي كتخرج ، خدمو المنطق و هدا هو أكبر غلط ! حيت فديك الساعة لي كنتو نتوما غاديين فديك الطريق كانت هي فالطريق الثانية.. نقزات من لوطو و خلاتها مكسيرية ! (تنهدات كتشوف قدامها بخيبة أمل) هي قراااتها مزيان عاد لعباتها..ماختارتش غير هكاك..كانت عارفاكم كيفاش غتفكرو..وهماتكم بلي ما تت و لاحت راسها و فرمشة عين..(طلقات ايديها فالهوا) بووم ! تفركعات لوطو و تفينات مع الماج غير بالجهد ديال الموطور لي فحال القنبو..و هي ؟ هي هربات مع الغابة نيشان للطريق الثانية لي حتى هي خاوية و مأمنة ليها..(شافت فميخائيل و علات حاجبها باستفزاز)..خيفي.. عرفتي راسك معامن لاعب دبا ؟"
ميخائيل مسح على وجهو كيتنفس بصعوبة و مد ايديه حل الصدافي دالقاميجة بنترة حتى طرطقو..
كارلوس : (زير على سنانو ) بوطا دي ميّيردا..
بالوما : (وقفات كتجمع فالوراق) لا هدرتي لا هدرتكم غتبرر هاد الإهمال فالخدمة..راه حنا بوليس ! قاريين الكودات..راه حنا ولاد الحرفة ! ماحطونا هنا حتى عرفونا نقدو عليها و على غيرها..ولكن مع هاد الخدمة هادي كلشي ضيعتوه بايديكم !
فين ودنيك ؟ هاهي أسيدي ! هي هادي ديالهم ، فالوقت لي هما مشاو بعيد كانت هي غير حداهم ، ختارو السما و هي غير فالارض ، ختارو العلو و هي غير لتحت ، بالوما خنزرات فميخائيل و خرجات مخلية الجو فوق مكهرب و كلشي ساكت ، شي كيلوم فراسو ، شي معصب و شي مازااال ما قادر استوعب القضية..!
أنت تقرأ
LA MORENA🇲🇦🔞لامورينــــــــا🇲🇽🔞
Akcja"هي" مطالبة من طرف العدالة..و "هو" المطالب بها🔥❗️ لعشاق #الأكشن🔥#التشويق..#الحماس..#الصراع..#تهريب_المخدرات🚬..و المزيد في رواية "لامورينــــا🇲🇦🇲🇽"
