"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"
٠ بقلم : ميرا 💆🏻♀️
٠ الجزء : 36
_"داز الوقت و وصل ليل.."
بعد جلسة طويلة جا الوقت لي كل ايرجع ادارى و كل ايسد عليه بابو ، كانت متاجهة هي وياه جهة الباب و قبل مايخرج تفكر شي هدرة و عاود ضار عندها..
مهدي : قولي ليا..صباح تخليها مع أميمة و ربيعة ؟
شافت فيه مطولة كدور هاد القضية فراسها ، عمرها زعمات تخليها مع شي وحد ولا فكرات فهاد القضية ، شافها ماجاوباتش و كمل هدرتو..
"اللهما عندنا ولا بوحدها..ماتنسايش فالدار الدنيا مطرقة"
تنهدات كترجع فشعرها لور ، ماعندها فين تزيد تفكر كلشي باين ميمكنش ليها تخلي ختها بوحدها ، و كيف قال هو اللهما تكون مأمنة عليها فدارو ولا تخليها بوحدها و مايديهاش النعاس عليها..
راضية : وخا..دبا نقولها ليها"
مهدي : (خرج برا) هني بالك حتى حاجة مغتوقع لها
راضية : غير توقع ليها باش نتقاطع معاك الريوس و ايهزنا الديباناج لغبينة
حرك راسو بلا حول و خرج فحالو ، و قبل مايتحرك شاف فتيليفونو لي داير ليه تصويرتو هو و سكينة كخلفية ، رجع كيشوف الفوق و ايتنهد بضيق ماعارفش كيفاش جات فبالو ، شي مرات كتسلط على تفكيرو بوحد الطريقة كتخليه ايبغي ايحرق الفيزيبلات ديال عقلو..!
باغي ايعيط ليها ايسول فيها ، باغي ايمشي عندها ايدوي معاها و ايتصالحو ولكن ماقادرش كيحس براسو مازال معصب عليها ، حتى قال بلي غيعيط و صدق حابس راسو فأخر لحظة كيقول بلي مابقا قد مافات ، غدا نهار جديد ، غدا غيشوفها و غدا غيقدر ايدوي معاها ، فالأخير ديك السيدة ديالو مكتوبة ليه ، شلا حروبات دوز معاها و مازال غيدوز ، طبعها بيه فوحد الوقيتة كانت يالاه حلات فيها عينيها ، و فبالو هو غير "الموت" و "الغدر" لي ممكن ايفرقوه عليها ، من غيرهم ماكاينش..!
_"فصباح اليوم الموالي و بالضبط فالفيلا ديال متولي.."
كانو كاملين مجموعين فالصالون حتى من ربيعة كاينا ، إلا سكينة لي رفضات تهبط و تجلس معاهم ، هاد النهار مكانش فحال كاع الأيام ، كان "أخر يوم" قبل انطلاقهم و تنفيذ وحدة من أهم العمليات لي غتشهد عليها البلاد..!
راضية حيدات نظراتها الشمسية و شابكات ايديها بجدية قدامهم..
راضية : نبداو
كان جالس حاط صبعو الصغير جنب فمو ، ماكانتش معاهم ، حتى من ريحتها ماكانتش كدور حداه ، عرفها مابغاتش تهبط و نطق بنبرة قاصحة..
مهدي : سكينة ؟
ربيعة (هزات ايديها بأسف كتشوفيه) : مابغاتش تحضر
غزز سنانو و شاف فراضية باش تبدا ، و حتى هي مازادش تعطلات عليهم..
راضية : خاصكم تعرفو بلي كاع السلعة تسطوكات و كلشي وجد..
متولي : (بفرحة) بشريني !
بدات كتعاود ليهم على "الغبرة" و كيفاش قادات ليها بلان الصوفة ، خلات متولي غير محبد فيها عينيه و خالد مصدوم من الطريقة باش قادو بيها الخطة ، حتى من ربيعة كانت مصدومة و ماقدراتش تشد لسانها..
ربيعة : تبااارك الله !
عاد شرحات ليهم الخطة ديال المربى لي غيعمرو بيه الأقراص ، و أخيرا وصلات لأخر خطوة..
راضية : أخر حاجة..الحشيش و دكشي لي بقا غنعمروه فالروايض ديال الكاميو..
خالد : كيفاش ؟
راضية (جمعات ايديها كتشرح ليه بيها) : عندك رويضة وحدة..غتفشها مزيان و تعمرها بالكفافي ديال الحشيش و دكشي لي باقي..عاد غتعاود تنفخها و ترجعها لبلاصتها..عشرة دالروايض كلهم غيتعمرو حتى نقولو الله ايخلف..كلهم غيكونو كيشوفو فيهم روايض هازين كاميو..من غيرنا حنا !
و رجعات لور متكية و لايحة ايديها على الكنابي ، مخلياهم حالين معاها ودنيهم و هي كتشرح و تعاود باش ايفهمو ، حداها مهدي لي مامسوقش حيث حضر معاها فكل خطوة من السلام حتى لبسلامة و فنفس الوقت كيفكر فسكينة و هاد العكس ديالها لي غا مكيزيد ايمرضو..
ربيعة : تباركالله عليكم أولادي
متولي وقف فرحان و ماقاداه فرحة ، كيحس بريحة الفلوس حداه و الفرحة معلياه فوق السحاب..
متولي : حتى لاامت غنمو وت مرتاح و انا مخلي الحرفة بين ايديكم..(شاف فربيعة)..ربيعة..أراي عليها شي براد ديال أتاي !
أنت تقرأ
LA MORENA🇲🇦🔞لامورينــــــــا🇲🇽🔞
Acción"هي" مطالبة من طرف العدالة..و "هو" المطالب بها🔥❗️ لعشاق #الأكشن🔥#التشويق..#الحماس..#الصراع..#تهريب_المخدرات🚬..و المزيد في رواية "لامورينــــا🇲🇦🇲🇽"
