"لامـوريــنـــــــــــا🇲🇽🇲🇦"
"𝓛𝓪 𝓶𝓸𝓻𝓮𝓷𝓪🇲🇦🇲🇽"٠ بقلم : ميرا 💆🏻♀️
٠ الجزء : 44_"بالرجوع للطوموبيل.."
كانت الشمس بدات كتبرد ، العشية تعاشات و الطريق ترخفات ، كانت راضية كتسد على الشانطة لي كان مجموع فيها "مية و خمسين مليون" ديال الفلوس ، و مهدي كيسطاسيوني باش ايهبطو ايرتاحو شوية و ايرتاح هو بالأخص لي ظهرو عواج ليه بالصوكان..
سكينة غير شافتو وقف و هي توسع عينيها ، فحالا الإفراج نزل عليها ، دورات راسها جهة الزاج كتشوف فالسطاسيون لي قدامهم و غير رسات الطوموبيل نزلات هي لولة كتجري لطواليط و مهدي متبعها بعينيه..
مهدي : يالاه أراضية
راضية حيدات الحزام و هبطات كتنهد ، العيا لي فيها ماخاصوش الماكلة ولا الطواليط ، هي بوحدها لي عارفة أش خاصها باش تريح راسها لي غيتفكرع ، ولكن قبل خاصها تقاد حالتها معاهم..
دخلو لداخل نيشان لطواليط فين تفرقو ، هدي مشا لطواليط ديال الرجال و راضية دازت لطواليط ديال العيالات و لحقات على سكينة لي سبقاتهم ، دقائق
و كانو كل من مهدي و راضية خرجو بجوج للكولوار..مهدي : عيطي ليه..
كان كيمسح ايشير ليها لتيليفون ، حركات ليه راسها و دوزات الخط كتسناه ايجاوب ، حتى رخات حواجبها و نطقات..
راضية : ألوو..خالد ؟
غير شاف سميتها فالبلاصة ناض من الكرسي و جاوبها..
خالد : راضية ! على سلامتكم
تكات على الحيط معلية عينيها تشوف واش كاينين كاميرات و فنفس الوقت مازال شادة معاه الهدرة..
راضية : الله ايسلمك
مهدي غمزها بمعنى الكاميرات كاينين فالجهة الثانية حتى طمنات عاد طلقات فالهدرة..
"قوليا أخالد..الديوانا لي غدوزنا للمغرب مضمونة"
خالد : الديوانا لي غدوزكم فيها ربعة من الديوانيين ديالنا..هما لي غيقلبوكم و هما لي غيدوزوكم حسبو راسكم وصلتو..
فهاد اللحظات كانت سكينة يالاه خرجات من طواليط كترجع فالنفس ، دبا عاد تنفسات و طلقات كون زادت شوية كانت غطلقها فحوايجها ، و يالاه غدور جهة الكولوار باش تخرج حتى كتسمعهم كيدويو ، وقفات مور الحيط و سكتات كتسمع ليهم..
"مقمرين بعمرنا..هاد المرة يا المو ت يا حنا..يا ربحة يا ذبحة"
من بين هدرتهم كاملة كانت هادي هي الجملة لي لصقات فراسها و بقات كتعاود فودنيها ، بلعات ريقها بصعوبة و حطات ايديها على قلبها لي بدا كيضرب بالجهد كتحاول ماتفقدش السيطرة على راسها و ديك "يا حنا يا المو ت" خلاتها تبدا ترعد و تعاود كتحس بالخلعة شاداها من صبعها الصغير و قلبها غيسكت ، حياتها كلها و هي معاهم ملي كانت صغيرة ، خدمات معاهم ، خاطرات معاهم ، ربحات و خسرات معاهم ، الفلوس و شبعات منهم و هي معاهم ، غير هو هدشي كامل داروه "فالمكسيك" و "النواحي" فقط ، و نهار خرجو من لازون أش وقع ؟ نهار غيخرجو مغينقزوش بلاد ولا جوج ، مغينقزو قارة ولا بحر ، و مغيرجعوش لأي بلاد ، هدا راه ماشي أي بلد لي راجعين ليه ، ماشي أي قصة تكتبات فيه و ماشي أي ماضي تدفن فيه ، هدا راه "المغرب"..البلد الأم !
الحالة لي وصلات ليها أبدا واش كانت عادية ، سلوكها غير متزن بالمرة و شوفاتها تايهين ، الوسواس مرض ، و المرض قادر ايخلق الرهبة فالنفوس ، وجهها ولا بيض و شدات على شعرها كتبكي و تحرك فراسها بالنفي..
"مانقدرش..مانقدرش نكمل..مانقدرش"
أنت تقرأ
LA MORENA🇲🇦🔞لامورينــــــــا🇲🇽🔞
Aksiyon"هي" مطالبة من طرف العدالة..و "هو" المطالب بها🔥❗️ لعشاق #الأكشن🔥#التشويق..#الحماس..#الصراع..#تهريب_المخدرات🚬..و المزيد في رواية "لامورينــــا🇲🇦🇲🇽"