LA MORENA🇲🇦🔞لامورينــــــــا🇲🇽🔞

27

لامـوريــنـــــــــــا🇲🇽🇲🇦"
‏"𝓛𝓪 𝓶𝓸𝓻𝓮𝓷𝓪🇲🇦🇲🇽"

٠ بقلم : ميرا 💆🏻‍♀️
٠ الجزء : 27

يالاه حلات فمها و تقدمات عندها خطوة ناوية تقنعها بلي ماوقع والو حتى كتبانليها راضية حمرات فيها بوحد الطريقة خلاتها تكمش ، تحني راسها و تحرك داخلة لبيتها بعينين عامرين دموع..

بقات حاضياها حتى دخلات عاد حلات الباب و خرجات كتقاد فالقب ، مع غدور مع الدورة مع غيابان ليها الكارديان ، نفسو داك الكارديان لي جاب ليها الطوموبيل أخر مرة ، غير شافها و هو ايوسع شوفتو و خفف من خطاويه حتى وصل عندها فرمشة عين و وقف حداها كيخشي ايديه فجيبو حاضي مع الدنيا..

"رازية..جابك الله كنت جاي عندك نعلمك بوحد الحاجة"

جبدات ليه جوج كفيفات عامرين بلا هدرة بلا كلام ، خلات عينيه ايخرجو عليهم ،  ها باش كتعجبو هاد السيدة مطبقة قاعدة وحدة فحياتها لي هي "عطيني نعطيك" ، شدهم من عندها بالخف و فالبلاصة بدا كيعاود ليها..

"الشمكار لي كيكون مع دياغو شد ختك فالراس بغا ايتعدا عليها..كنت غندخل ولكن بانليا عاق بلي شي وحد كاين و بعد منها.."

كانت كتسمع ليه و متبعة هدرتو ، كتخيل المشهد قدامها بتعابير مكيتفسروش، و السيد حداها مازال كيعبر..

"رازية..عطيني الضو الخضر نمشي ندمو على نهار عاش فيه..نهربو من الدرب و نخليهم كاملين ايعريوه قدامك..غير عطيني الاوكي و قولي ليا سير.."

راضية (تنهدات و ضربات ليه على كتفو بهدوء) :
سير تنعس..البرد سام و الليل طويل..

كانت هادي أخر هدرة دارت بيناتهم ، قبل ماتخليه واقف كيشوفيها و تحرك من حداه غاديا و كتقاد فالقب حتى مابقاش كيبان وجهها ، تقريبا جوج دقايق لي دارت و هي كتمشى بهدوء وسط الزناقي الخاويين و فايديها كارو كتنفت منو و تلوح للبرد ، حتى وصلات للراس و هو ايوقفها صوتو..

"هيرمانو ! مانلقاش عندك شي كارو زايد ؟"

فالضلام و مع القب مكيبان فيها والو ماتعرفها واش بنت ولا ولد ، دارت عندو و مدات ليه الكارو بمعنى بغيتي ، حتى هو ماكانش من العاكزين ، عند بالو ضوراتو ليه و خداه من عندها كيضحك..

"الله ايحفضاك العشير"

رسمات شبه ابتسامة و هي كتشوفيه كيف كينفت فداك الكارو و ايسوط منشوي و مرتاح ، اينا زهر هدا لي لاقاه بيها بهاد السرعة ؟ اينا زهر هدا لي جابو بين ايديها فرمشة عين ، واش لهاد الدرجة الدنيا باغاها فيه..!

الجرة الثانية لي غيجر ماكملهاش ، أو بالأحرى ماخلاتوش ايكملها، ماحس براسو حتى كان مقجوج من اللور ، قجاتو بالقب ديالو وخا بغا ايتحرك ماقدش لدرجة النفس تقطعات فيه ، و هي هازة عينيها الكحلين الفوق كضورهم فالسما..

راضية : قوليا..(عينيه دمعو حتى من الهدرة ماخلاتش ليه فين ايخرجها)..عجباتك ؟

تقاتل بكل جهدو باش ايجاوبها ، كيخرج حرف و ايتبعو بشهقة..

"ش ش شكووون"

زادت زيرات عليه حتى حل فمو و خرج عينيه ، خلاها تقشع داك الزيزوار لي مخبي تحت لسانو ، صغرات عينيها و مدات ايديها زيرات ليه على فكو حتى طرع فمو بالسيف عليه..

راضية : ماعرفتيهاش..(خطفات ليه داك الزيزوار من فمو)..ديك لي سيفطتيها لدارهم كتبكي..ماعقلتيش عليها..؟

كيفركل بين ايديها و ايحرك راسو بالنفي ، هو بصح ماعقلش على اينا وحدة ، بالسيف و وحد فحالو النهار و مطال و هو ايوقف فالبنات ايخلعهم بالمضا و ايتحرش بيهم بزز ، على شحال من وحدة قدو ايعقل..!

"مازيان..انا نعقلك.."

قدات داك الزيزوار قدام وجهو خلات عينيه ايطرطقو فايديها ، بدا كيتهز و ايتحط و ايتحرك الجوايه فحال الحوتة لي يالاه خرجتيها من الما ، باغي ايهرب بجلدو و ايتفك لكن كان فاشل قدامها ، كان مبوق و الجهد مقادي ليه و هي لقاها ميكروبة عرفات كيفاش تحكمو لدرجة كلما تحرك كلما كيزيد ايخنق راسو براسو..

"ل لا لا ل لا لا.."

دخل فحالة هستيرية، كيحرك راسو بالنفي هنا و لهيه هربان من ايديها ، حتى فرمشة عين ، و بدون سابق إنذار شرطات ليه جوج شرطات فالحنك ، خلات ليه المجهول قدو قداش شاد ليه الحنك كامل ، فالبلاصة الد م خرج كيشرشر و بدا كيحس بألم فظيع فوجهو الشي خلاه ايطلق حلوقو للعالم و ايبرح بكل جهدو ، طلقاتو بالنترة حتى طاح فالأرض شاد على حنكو كيغوت و ايتلوا فحال الحنش ، تمنى كون غير بقا مخنوق ولا هدشي لي كيحس بيه ، الأرض حداه طبعات بالد م و وجهو كولو توسخ بيه ، و هي قدامو واقفة معلية حاجبها و كتشوف فيه من التحت ، شوية زاد جهد فالغوات لدرجة فرع الدنيا جاب الله الراس ديما كيكون خاوي ، و يالاه بغا ايشد ليها فرجليها كيستنجد بيها و هي تجمعها معاه للوجه نيشان..!

خلاتو ايتنشر فالارض مغيب ، سخفان و الد م هابط من نيفو و حنكو ، ساست ايديها عايفاه و جمعات الدفلة حتى جمعاتها و هي تسيفطها مباشرة ، مدات ايديها لجيبها ناوية تجبد كارو تبرد بيه راسها لقات الباكية خاوية ، حسات بالقطعة و سخطات و مع العصاب لي ركبها لقاتو غير هو قدامها ، غززات سنانها و عاودات ركلاتو بالجهد حتى تنفض فالارض عاد مشات فحالها ، خلاتو هكاك مغيب ، دمو مشرشر و كينين بالألم ، ما هي قتلاتو ما هي حياتو ولكن خلاتو فحال البوبريصة الميتة لي جا ايعفط عليها..!

#يتبع..🔥