لست بطفله
الحلقه 40
عندما فتح هاتف فاروق
جاءت رساله إلي ظلال بأن الهاتف قد فتح
فجرت لتتصل بفاروق
الذي فوجيء بإتصالها ومن أرتباكه فتح الخط وتحدث إليها
نعم ياظلال في حاجة
فباغتته
أخس عليك ياأخويا يابن أمي وأبويا تعمل فيا كده
أنا لغاية دلوقت مش مصدقة أن اللي حصل دا كله من أخويا فاروق
أبو المجدعة والشهامة
أللي كانت أي بنت في الحتة تتحامي فيه من الشباب البايظ
ويجلنا كل يوم متخانق عشان بيدافع عن عرض بنت
حصل أيه أكيد في حاجة غلط فهمني
تعمل فيا أنا كده بعد ما الناس كانت بتحبني بقت تكرهني ومش طيقاني حتي أبله ناهد اللي كنت بحبها زي أمي مش زي أختي الكبيرة
بقت مش طايقه تبص في خلقتي
ولا ظافر بعد ماكان اتعدل معايا بسبب عملتك بقي شك وتعامل زباله
ليه عملت فيا كده حرام عليك
مش مسمحاك أبدا
فتأثر من كلامها
خلاص ياظلال بقي ماتتعبنيش أكتر ماأنا تعبان
ليدخل ظافر ويتناول الهاتف
أنت ياد لو ماجبتهاش وجيت تطلق قسما بالله لأجيبك متكتف والمرة دي مش هتخرج من تحت إيدي سليم لو مابقتش مطلقة هخليها أرملة
فقاطعه فاروق
شوف ياكابتن أنا مابتهددش وأعلي ما في خيلك أركبه
لتأخذ ظلال الهاتف بسرعة
وتوميء برأسها لظافر أن يثق بها فيتركه لها
وتتحدث لفاروق
سيبك منه يافاروق
أنا أختك ظلال اللي بكلمك دلوقت
اللي إتربينا سوا
وعمر ماتربينا علي كده لا أنا ولا إسراء ولا أنت
وانت اولنا وكنت تخاف علينا وتعرفنا الصح من الغلط
وكنا نلجأ لك بدل بابا عشان بابا كان شديد وتوعينا وتنصحنا
فين فاروق ده أنا حاسه بكلم حد غريب عني
فيتراجع مرة اخري عن غضبه
أنت عاوزة أيه ياظلال
أنا عملت كده عشانك وعشاني ماشوفتيش تعاملهم معانا زي مانكون حشرات بالنسبة لهم كان لازم يتربوا ويفهموا
فقاطعته مش كده ياحبيبي لو عاوز نعلمهم يبقي بأسلوبنا اللي تربينا عليه ده اللي هيجبرهم مش نداوي الغلط بغلط أكبر
فقاطعها وأمك وابوكي اللي حارمك منهم زي مايكون عار
فإستطردت
أنا عارفة إن مسيره هيلين وياخذني بنفسه لهم لكن كل حاجه لازم تاخد وقتها
لكن اللي عملته دمر حياتنا كلها
فاروق بإستسلام
عاوزة مني أيه ياظلال
ظلال وقد أحست بلين من أخيها
ترجع ياحبيبي وتجبها وأوعدك ماحدش هيقربلك وتنظر لظافرحتي يعطيها وعده فيشيح بنظره عنها ويلوح بيده بعدم إكتراث
ولكن فاروق يعطيها وعد أنه سيفكر بالامر
فقط تعطيه مهلة للتفكير بعض الوقت
ظلال لم تحب الضغط عليه
فأجابت بالموافقه
وأغلقت مع أخيها
ليتلقفها ظافر
قالك إيه
ظلال بإستسلام قال هيفكر
فإستشاط ظافر نعم بروح أمه تحت رحمته إحنا
هاتي الرقم ده يمكن أعرف منين المكالمه ويحددوا المكان
فإمتنعت ظلال مش هديهولك
وعلي جثتي وحاولت مسح الرقم وهو يحاول أخذه منها وهو يحيطها من الخلف وهي تبعد يدها وتحذف الرقم
حتي تألمت بعض الشيء فتأوهت
فانزعج ظافر مالك فيكي أيه
ظلال بتعب مافيش شويه تعب بس بسيط
فقاطعها يلا ألبسي أنت اليومين دول كل شوية تعب وأنا مش مطمن
