Star Love (I)

Chapter (18)

Unicode

***********

Star Shines For Flame Part (3)

ပိတ်ထားသော ပြတင်းပေါက် အပေါ်တွင်ရှိသော အလုံပိတ်မှန်များကြားမှ ထိုးဖောက်ကာ မျက်နှာပေါ်ကို ကျရောက်လာသော နေရောင်ခြည်ကြောင့် ရှိုင်း နိုးလာလေသည်။

မနေ့က အဖြစ်အပျက်တွေ အများကြီး ကြုံခဲ့ရသဖြင့် စိတ်ပင်ပန်း လူပင်ပန်းဖြစ်ခဲ့ရပြီး နောက်ဆုံး စိတ်လျှော့လိုက်တော့မှ နှစ်နှစ်ခြိုက်ခြိုက် အိပ်ပျော်သွားခဲ့တာဖြစ်သည်။

မျက်လုံးများ ပွင့်လာတာနှင့် တစ်ပြိုင်နက် ရှိုင်း ချက်ချင်းထလိုက်သည်။ ရှိုင်းကိုယ်ပေါ်မှာ မီးလျှံ အခန်းဗီိရိုထဲက တွေ့သော မီးလျှံရဲ့ အကျီနှင့် ဘောင်းဘီကို ဝတ်ထားလေသည်။ ခန္ဓာကိုယ် ပိန်ပါးသော ရှိုင်းမှာ မီးလျှံရဲ့ အဝတ်တွေကိုဝတ်ထားရတာ ဂါဝန်ကားကားကြီး ဝတ်ထားရသလို ပွယောင်းယောင်းဖြစ်နေလေသည်။ ဘောင်းဘီမှာ အရမ်းကိုချောင်နေတာကြောင့် ကြိုးတစ်ခုနှင့် ခါးကိုချည်ထားရလေသည်။ အကျီလက်မှာ ရှိုင်းလက်ကိုပင် မမြင်ရလောက်အောင် ရှည်လျားနေပြီး ဘောင်းဘီမှာလည်း မြေကြီးပေါ်တွင် ရှပ်တိုက်ဖြစ်နေတော့တာ..။

ကုတင်ပေါ်မှ အိပ်ရာကို သေချာ သပ်သပ်ရပ်ရပ်ဖြစ်အောင် ပြန်ပြုပြင်ပြီးတော့မှ အခန်းတံခါးကို ဖွင့်ကာ အခန်းပြင်ကို ခေါင်းပြူကြည့်လိုက်မိသည်။

တစ်အိမ်လုံးတိတ်ဆိတ်ငြိမ်သက်လျက် အပ်ကျသံကြားရနိုင်လောက်သည်။ နေ့အလင်းရောင်ကြောင့် လင််းထိန်နေကာ တစ်အိမ်လုံးကိုကောင်းစွာမြင်နေရလေသည်။ ဒါကြောင့် ရှိုင်း ရှုပ်ပွနေသော ဆံပင်လေးတွေကို လက်ဖြင့် သပ်သပ်ရပ်ရပ်ဖြစ်အောင် ပြုပြင်လိုက်ပြီးတော့မှ အခန်းပြင်ကို ထွက်လာခဲ့သည်။

ရှိုင်းရောက်နေသော အိမ်ကြီးဟာ အရမ်းကို ကြီးပြီး အရမ်းကို ခမ်းနားရုံသာမက ရှေးကျတယ်ဆိုတာကို မနေ့ကတည်းက သတိထားမိနေခဲ့တာဖြစ်သည်။ အခန်းထဲက ထွက်ကာ ကျယ်ဝန်းလှသော လှေကားကြီးက သစ်သားလက်ကိုင်တန်းတွေကို ကိုင်ကြည့်လိုက်မိလေသည်။ ထို့နောက် လှေကား ထိပ်နံရံတွင် ထားထားသော ကြီးမားလှသည့် ရေဆေးပန်းချီကားတစ်ချပ်။ ပန်းချီိဆွဲရတာ ၀ါသနာပါသော ရှိုင်းရဲ့ အာရုံကို ဖမ်းစားလိုက်နိုင်သော ပန်းချီကားတစ်ချပ်ဖြစ်သည်။