Star Love (I)

Chapter (17)

Unicode

***********

Star Shines For Flame Part (2)

အသိစိတ်ပျောက်ကာ ရှိုင်းကို သွေးစုပ်လိုက်မိတော့မလိုဖြစ်သွားခဲ့သော မီးလျှံဟာ မျက်စိစုံမှိတ်ကာ နှုတ်ခမ်းလေးတွေ တဆတ်ဆတ်တုန်အောင် ကြောက်လန့်နေသော ရှိုင်းရဲ့ မျက်နှာကို မြင်လိုက်ရပြီးနောက် ရုတ်တရတ် အသိပြန်ဝင်လာမိသည်။

မီးလျှံ ဘာတွေ လုပ်မိလိုက်တာလဲ..။ အသိပြန်ဝင်လာခြင်းနှင့် အတူ ရှိုင်းကို အုပ်မိုးထားလိုက်မိရာမှ ချက်ချင်းဖယ်လိုက်မိသည်။ အားအင်မရှိသော လက်တွေ ခြေထောက်တွေကြောင့် မြေပြင်ပေါ်ကို လဲကျသွားလေတော့သည်။

မီးလျှံ မြေပြင်ပေါ်ကို လဲကျသွားပြီးတော့မှ ရှိုင်း မျက်လုံးကို မရဲတရဲဖွင့်ကြည့်လိုက်မိသည်။

အနားမှာလဲကျနေသော မီးလျှံ ကိုမြင်လိုက်သောအခါ ရှိုင်း ကြောက်စိတ်တွေ ချက်ချင်းပျောက်သွားပြီး စိုးရိမ်စိတ်တွေ ဝင်လာလေတော့သည်။ ယခုမြင်နေရသော မီးလျှံရဲ့ ပုံစံဟာ ရှိုင်း မီးလျှံကို ပထမဆုံးအကြိမ်တွေ့ခဲ့ရတုန်းက အတိိုင်းပင်။

အလွန်အမင်းဆာလောင်နေသော်လည်း သူတစ်ပါးအသက်ကို မထိခိုက်လိုတာကြောင့် ဆာလောင်မှုကို ထိန်းချုပ်နေရတဲ့ ပုံစံ။ မြေပြင်ပေါ်တွင် လဲကျလျက် အားအင်ကုန်ခမ်းနေသလိုဖြစ်ကာ စိုစွတ်နေသော မြေပြင်မှ ရွှ့ံတွေလည်း ပေကျံနေသည့်အပြင် မျက်စိကို စုံမှတ်ထားပြီး ဆာလောင်မှုကို ချုပ်ထိန်းနေရသော မီးလျှံရဲ့ ပုံစံက တကယ့်ကို သနားစရာ။

ဒါကြောင့် ရှိုင်း မြေပြင်ပေါ်တွင်ထိုင်နေရာမှ တဖြေးဖြေးနှင့် မီးလျှံအနားကို တိုးကပ်သွားမိသည်။ မီးလျှံရဲ့ လက်မောင်းကို ထိကိုင်ဖို့အလုပ်မှာပင်..။

"မလာနဲ့ အနားကို.."

အထိတ်တလန့်တားဆီးလာသော မီးလျှံ..။ ရှိုင်းရဲ့ လည်ပင်း ဒဏ်ရာမှ သွေးနံ့တို့ဟာ မီးလျှံကို အသိစိတ်ပျောက်အောင် လုပ်နေတာကြောင့် မီးလျှံ တားဆီးလိုက်ရတာဖြစ်သည်။

မီးလျှံရဲ့ အသံကြောင့် ရှိုင်း လက်ကလေးတွေ လေထဲမှာတင်တန့်သွားသည်။ တစ်ဆက်တည်းမှာပင် မိမိဆီမှသွေးနံ့ကြောင့် မီးလျှံ တားဆီးလိုက်တာမှန်း သဘောပေါက်လိုက်ခြင်းနှင့်အတူ ရှိုင်း စိုးရိမ်တကြီးမေးလိုက်မိသည်။