Star Love (I)

Chapter (6)

Background Music - Save and Sound by Taylor Swift ft. The Civil War
***************************************************************************

Unicode

***************

Start Of Our Destiny

မီးလျှံရဲ့ စိတ်ကူးအာရုံထဲတွင် အတိတ်က ဖြစ်ရပ်တို့ရဲ့ မြင်ကွင်းတွေကို ၀ိုးတဝါးမြင်နေရလေသည်။

ပတ်ဝန်းကျင်တစ်ခုလုံး မီးတောက် မီးလျှံများဖြင့် ပြည့်နှက်လျက်ရှိလေသည်။ မီးလျှံရဲ့ အိမ်ကြီး တစ်အိမ်လုံး တစ်ခြံလုံးကို စုန်းကဝေတွေက မီးမြှိုက်နေကြလေသည်။

မီးလျှံကို ဒေါင်လိုက်ထောင်ထားသော အခေါင်းကြီးထဲတွင် ထည့်ကာ ခြေတွေလက်တွေကိုလည်း သံကြိုးတွေဖြင့်တုတ်ထားကြသည်။ Spell သုံးထားတာကြောင့် အခေါင်းထဲတွင် မီးလျှံ လှုပ်ရှားလို့လည်း မရ အသံလည်းထွက်လို့မရ။

မီးလျှံရဲ့မျက်စိရှေ့တွင်ရပ်နေသူက မားကပ်စ်။ သစ်သားငုတ်တိုင်တစ်ချောင််းကို ကိုင်ထားကာ မီးလျှံကိုကြည့်နေလျှက်ရှိလေသည်။

ထို့နောက် မီးလျှံရဲ့ မိဘနှစ်ပါးနှင့် ညီမလေးကိုလည်း နောက်က စုန်းကဝေတွေက ကြမ်းပြင်တွင် ဒူးထောက်ထိုင်ချခိုင်းထားကာ ထွက်မပြေးနိုင်အောင်ချုပ်ထားကြပြီး နောက်ကနေ သစ်သားငုတ်တိုင်တွေကို ကိုယ်စီကိုင်ကာ စောင့်နေလျှက်ရှိကြလေသည်။

အကုန်လုံးက ပြန်လည် တိုက်ခိုက်နိုင်တဲ့အားမရှိသော်လည်း အရှုံးပေးလိုဟန်အလျင်းမရှိ။ မာန်တင်းထားကြလျက်။

"ဒီအခြေအနေရောက်နေတာတောင် လက်မလျှော့သေးဘူး လား မိုုက်ကယ် (Michael) မင်းရဲ့သားကို ငါတို့လက်ထဲကို အပ်ပြီး အေးအေးဆေးဆေး အညံ့ခံပါ.. မဟုတ်ရင် သေတာထက်ဆိုးအောင် လုပ်ပစ်လိုက်မယ်.."

မားကပ်စ်ရဲ့ ခြိမ်းခြောက်စကားတို့ကို မီးလျှံရဲ့အဖေက နီရဲနေသော မျက်လုံးများဖြင့် မော့ကြည့်ကာ အေးအေးဆေးဆေးပင်တုန့်ပြန်သည်။

"ငါတို့ကိုသတ်ပစ်လိုက်ပြီး..ငါ့သားကို ချုပ်ထားလိုက်တာနဲ့ သတ်မှတ်ထားပြီးသား ကံကြမ္မာကို ပြောင်းလဲပစ်လို့ရမယ်ထင်နေရင်တော့ မှားသွားမယ်မားကပ်စ်.."