Star Love (I)

Chapter (39)

Unicode

***********

Star's Love Part (1)

"အခု ငါ့လက်ထဲမှာရှိနေတဲ့ မင်းရဲ့အဖေ၊ အမေနဲ့ မင်းညီမလေးကို တကယ် မသေဘဲနဲ့ မင်းလက်ထဲကို ပြန်ရောက်စေချင်တယ်ဆိုရင် ကြယ်လေးကို မင်းကိုယ်တိုင် ခေါ်ပြီး ငါတို့ လက်ထဲကို အပ်ပါ.. မဟုတ်ရင် မင်းရဲ့မိသားစုကို ငါတကယ် သတ်ပစ်မယ် မီးလျှံ... "

မားကပ်စ်ရဲ့ခပ်ပြုံးပြုံးစကားသံသည် မီးလျှံရဲ့ခေါင်းထဲကိို မိုးကြိုးအစင်းတစ်ရာလောက် ပစ်ချလိုက်သလိုဖြစ်ကာ ခေါင်းထဲတွင် ထူပူသွားမိလေတော့သည်။

"ခင်ဗျား.. ညစ်တီးညစ်ပတ်အကြံတွေနဲ့ မဟုတ်တရုတ်စကားတွေလာပြောမနေနဲ့. ခင်ဗျားကိုယ်တိုင် ကျုပ်မျက်စိရှေ့တင် ရင်ဝကို သစ်သားငုတ်တိုင်စိုက်ခဲ့တာ... "

မယုံကြည်နိုင်စွာဖြင့် မီးလျှံ ပြောမိသည်။ သေဆုံးသွားခဲ့ပြီထင်ခဲ့သော မိမိရဲ့မိသားစု က အခုထိ အသက်ရှင်နေသေးလျက် ချုပ်နှောင်ခံထားရသည်ဆိုသော သတင်းသည် မီးလျှံအတွက်ကတော့ ကမ႓ာမြေကြီးက နှစ်ခြမ်းကွဲသွားသလိုမျိုး ထိတ်လန့်ဖွယ် သတင်းမျိုးပင်။

မားကပ်စ်က မီးလျှံရဲ့ သံသယအမေးကို မဖြေသေးဘဲ ခေါင်းတစ်ဆတ်ဆတ်ငြိမ့်နေပြန်သည်။ ထို့နောက် သူ့ရဲ့လက်ဖဝါးနှစ်ဖက်ကို ဖြန့်ကာ ပါးစပ်မှ တစ်စုံတစ်ခုကို တတွတ်တွတ် ရွတ်ဆို လိုက်ချိန်တွင် မြေကြီးပေါ်တွင် ချထားသော အခေါင်းသုံးခုမှာ တဖြေးဖြေးနှင့် အပေါ်ကို မြောက်တက်လာကာ ဒေါင်လိုက်အနေအထားကို ပြောင်းသွားကြလေသည်။ ထို့နောက် အလိုလိုပင် အခေါင်းတွေကို ပိတ်ထားသော အဖုံးတွေက တကျွီကျွီနှင့် ပွတ်တိုက်ကာ ပွင့်သွားကြလေတော့သည်။

''ဟင်... ''

မီးလျှံရဲ့တစ်ကိုယ်လုံး ဗို့အားပြင်းလျှပ်စစ်ဓာတ်တွေ စီးဆင်းသွားသလို တုန်ခါသွားလေတော့သည်။

ပွင့်လာသော အခေါင်းများထဲတွင်တော့ လက်နှစ်ဖက်ကို ရင်ဘတ်ပေါ်တွင် ယှက်တင်ကာ မျက်လုံးများမှိတ်ထားပြီး အိပ်ပျော်နေဟန် ငြိမ်သက်လျက်ရှိနေကြသော မီးလျှံရဲ့ အဖေ၊ အမေနှင့် ညီမလေး။