Star Love (I)

Chapter (22)

Unicode

**********

Star Falls For Flame Part (2)

မီးလျှံ နှစ်နှစ်ခြိုက်ခြိုက်အိပ်ပျော်နေရာမှ အိပ်ရေးဝစွာဖြင့်နိုးလာခဲ့သည်။ ကိုယ့်ကိုယ်ကိုသတိထားကြည့်လိုက်မိတော့ မနေ့ညကအတိုင်းပင် ကိုယ့်ကိုယ့်ကို ချည်နှောင်ထားခဲ့သော သံကြိုးတွေ ခတ်လျက် နံရံတွင် မှီအိပ်နေမိတာ။

မီးတုတ်မှ မီးများက ငြိမ်းသွားပြီဖြစ်ပြီး မျက်နှာကျက်မှာ လျှပ်စစ်မီးဆိုင်းကလည်း နေရောင် မဝင်နိုင်သော မြေအောက်ခန်းကို အလင်းရောင်ကောင်းစွာမပေးနိုင်။

မီးလျှံ ထရပ်ဖို့အကြံနှင့် ကိုယ်ကို လှုပ်ကြည့်လိုက်တော့ လက်မောင်းပေါ်ကို တစ်စုံတစ်ခုက ဖိထားတယ်ဆိုတာကို ခံစားလိုက်မိသဖြင့် ဘေးကိုကြည့်လိုက်မိလေသည်။ ငွေရောင်ဆံပင်လေးတွေနဲ့ ခေါင်းလုံးလုံးလေးက မီးလျှံရဲ့လက်မောင်းမှာ ကပ်နေတာကို မြင်လိုက်ရလေသည်။

နံဘေးတွင် ခန္ဓာကိုယ်လေးကို မီးလျှံဘက်ကို ကိုင်းချကာ လက်မောင်းကို မှီပြီး အကျအနအိပ်ပျော်နေသော ချာတိတ်လေး။ အသက်ရှူသံမျှင်မျှင်လေးကို မီးလျှံ အတိုင်းသားကြားနေရလေသည်။ မီးလျှံ ခန္ဓာကိုယ်ကိုလှုပ်ရှားလိုက်တာတောင် မနိုးလာသေးသော ချာတိတ်လေး။ ဒီလိုမြေအောက်ခန််းမှာ အိပ်နေရတာ မွှေ့ယာပေါ်မှာအိပ်နေရတယ်လို့များထင်နေလားမသိ။ ခေါင်းလေးကို အနည်းငယ်တိုးဝှေ့လိုက်ကာ ပြန်အိပ်နေတော့တာ။ ပြီးတော့ ညကတည်းက ဆုပ်ကိုင်ထားမိတဲ့လက်လေးက အခုထိ မလွှတ်ထားမိသေးဘဲ နောက်လက်လေးတစ်ဖက်က မီးလျှံရဲ့ လက်အပေါ်ကို လာထိထားသေးသည်။

ဒီကောင်လေး ဒီအတိုင်း အိပ်ပျော်နေတာ ဘယ်လောက်ကြာနေပြီလဲမသိ။ သူထိုင်နေသော အနေအထားက သက်တောင့်သက်သာ အနေအထားမဟုတ်တာကြောင့် မီးလျှံ အားနာသွားမိသည်။

"ချာတိတ်.."

"........."

"ချာတိတ် ထ.. ထ.."

"အမ်..အင်း... ဘာလဲ.. ဘာကြီးလဲ.."

မီးလျှံ လက်မောင်းကိုမှီအိပ်နေသော ငွေရောင်ဆံပင်လေးတွေကို ဆွဲဖွပြီး နှိုးလိုက်တော့မှ ကယောင်ကတမ်းတွေ ပြောပြီး နိုးလာကာ မပွင့်တပွင့် မျက်လုံးလေးတွေနဲ့ မီးလျှံကို မော့ကြည့်သည်။