Star Love (I)

Chapter (3)

Unicode

***********

The Origin Part (3)

Nebbia(နိဗ်ဗီးယား) ဆိုသော နယ်မြို့လေး တစ်မြို့..။

(Author's Note - Nebbia means Mist in Italian)

ထိုနယ်မြို့လေးရဲ့ အစပ်နား Highway လမ်းမဘေးတွင် တည်ရှိသော တောအုပ်ကြီးတစ်ခု..။ ပိန်းပိန်းမှောင်နေသော ထိုတောအုပ်အလယ်...။

မြေခွေးတွေရဲ့ ခပ်ဆွဲဆွဲ ခပ်လေးလေး အူသံတွေက ခြောက်ခြားဖွယ် တောအုပ်ကြီးရဲ့ အနေအထားကိုပိုပြီး ကြောက်စရာ အနေအထားဖြစ်စေလေသည်။

ညအချိန်ဖြစ်နေတာတောင် မြို့နာမည်နဲ့လိုက်အောင် မြူတွေဆိုင်းနေပြီး တစ်နှစ်ပတ်လုံးအချိန်အခါမဟုတ် မိုးရွာတတ်တဲ့ ရာသီဥတုကို ပိုင်ဆိုင်ထားတာကြောင့် အမြဲပင် အေးစိမ့်စိမ့်ခံစားနေရတတ်တာ။

ဒီလို လူအသွားအလာနည်းသော တောအုပ်ရဲ့ အလယ်မှာ တည်ဆောက်ထားသော ကြီးမားလှသည့် အိမ်ကြီးတစ်လုံး..။ ဆောက်လုပ်ခဲ့သည်မှာ နှစ်ကာလ ကြာရှည်ခဲ့ပြီဖြစ်သဖြင့် အိုဟောင်းနေသော ပုံစံရှိသော်လည်း ခမ်းနားထည်ဝါမှုကတော့ လျော့ကျမသွား..။

လူမနေသည်မှာ ကြာညောင်းလှပြီထင့်..။ အိမ်ကြီးတစ်အိမ်လုံး မှောင်မိုက်နေလျက် အရင်က သစ်ပင် ပန်းမန်တို့ဖြင့် စိမ်းလန်းခဲ့ဟန်ရှိသော ခြံဝန်းကြီးမှာလည်း အခုအခါမှာတော့ အကုန် ခြောက်သွေ့နေလျက် သစ်ပင်ကြီးတွေကနေ ကြွေကျသော သစ်ရွက်ခြောက်တွေမှ အပ အခြားမရှိပေ။

မြေပြင်ပေါ်ကို ကြွေကျနေသော သစ်ရွက်ခြောက်တွေက လေပြင်းတစ်ချက်တိုက်လိုက်တိုင်း ရွေ့လျားနေခြင်းမှအပ တစ်ခြား လှုပ်ရှား မှုလည်းမရှိ..။

အတိုချုပ်ပြောရသော် ဒီတောအုပ်အလယ်က အိမ်ကြီးမှာ Nebbia လို့ခေါ်တဲ့ နယ်မြို့ကလေးရဲ့ မြို့သူမြို့သားတွေ အတွက်တော့ ကြောက်စရာ နေရာ..။ လူတိုင်းရှောင်ကြဉ်ကြတဲ့နေရာ...။

ထိုစဉ် တောအုပ်ထဲကနေ အိမ်ကြီးရှိရာ သို့ တရွေ့ရွေ့ချဉ်းကပ်လာလေသော အရိပ်တစ်ခု...။ လူတစ်ယောက်။ ထိုသူက လူတစ်ကိုယ်လုံးကို ခေါင်းပါမကျန်လုံအောင် ခေါင်းစွပ်ပါသောာ အမည်းရောင် ဝတ်ရုံတစ်ခုနှင့် လွှမ်းခြုံထားပြီး ထားလေသည်။ တစ်ကိုယ်လုံး အနက်ရောင်ဖြင့် ဖုံးလွှမ်းနေသော်လည်း မျက်လုံးများကတော့ စူးရဲကာ အရောင် တစ်ဖျတ်ဖျတ်လတ်နေလေသည်။