Star Love (I)

Chapter (20)

Unicode

***************

Star Shines For Flame Part (5)

"I'm gonna eat you, Kid. "

မီးလျှံ ရယ်ချင်စိတ်ကို ထိန်းချုပ်လိုက်ပြီး တမင်ပင်ခပ်တည်တည်မျက်နှာနှင့်ပြောလိိုက်တော့ ရှိုင်းရဲ့ ပါးပြင်လေးနှစ်ဖက်ပန်းဆီရောင်မှ အနီရောင်ကိုပင်ပြောင်းသွားပြီး ထိတ်လန့်ကြောက်ရွံ့သွားတာ အသိအသာ။

ဘာကြောင့်ရယ် မသိ။ ထိုချာတိတ်လေး မီးလျှံရဲ့ အနားကိုရောက်လာတာ တစ်ရက်သာ ရှိသေးသော်လည်း မီးလျှံ ရင်းနှီးနေသလိုမျိုးခံစားနေရတာ။ မီးလျှံ တစ်စုံတစ်ခု ခြိမ်းခြောက်လိိုက်တိုင်း တစ်ခုခု စနောက်လိုက်မိတိုင်း ဖြစ်သွားတတ်တဲ့ ရှိုင်းရဲ့မျက်နှာကို ကြည့်လိုက်တိုင်း မီးလျှံ ရယ်ချင်စိတ်ကို ထိန်းလို့မရ။

ဒါကြောင့် ခဏခဏနောက်နေမိတာ။ ထိုမျက်လုံးပြူး အထိတ်တလန့်မျက်နှာလေးကို ပိုမြင်ချင်နေမိတယ်လေ။ ထိုချာတိတ်လေးနဲ့ ခွန်းကြီးခွန်းငယ် စကားပြိုင်ပြောရတာကိုပင် ပျော်နေမိသလိုလို။

အခုလည်း မီးလျှံ သူ့ကို စားမယ်ဆိုပြီးနောက်လိုက်တော့ မီးလျှံရဲ့ ရင်ဘတ်ကို သူ့လက်ကလေးတွေနှင့် မရဲတရဲတွန်းဖယ်ကာ ပြူးတူးပြဲတဲ ပြောနေတော့တာ။ အလန့်တကြား နောက်ကိုဆုတ်ရင် ဆုတ်ရင်း လှေကားလက်တန်းကိုပင် ကျောကပ်သွားလေသည်။

"ခင်ဗျားကြီး မဟုတ်တရုတ်လုပ်ဖို့မကြံနဲ့နော်.. ကျွန်တော် ငြိမ်ခံနေမှာ မဟုတ်ဘူးဗျ.."

ရှိုင်းရဲ့ ဆတ်ဆတ်ထိမခံသော စကားနှင့် အမူအယာလေးတွေကို မီးလျှံအရမ်းကိုသဘောကျလွန်းသဖြင့် တဟားဟားပင်ရယ်လိုက်မိလေသည်။

ပြန်နိုးထလာတည်းက တစ်ကိုယ်တည်း ဘဝကို ဖြတ်သန်းနေရသဖြင့် ခြောက်ကပ်နေသော မီးလျှံဟာ လွန်ခဲ့သောရှစ်နှစ်အတွင်း တစ်ခါမှကို စိတ်ပါလက်ပါ မရယ်ခဲ့ဖူးတာပါ။ အခု ရှိုင်းရောက်လာမှပင် ပထမဆုံး အားရပါးရရယ်ဖူးတာဖြစ်သည်။

မီးလျှံ ရယ်လိုက်မိတော့ ရှိုင်းက မျက်မှောင်ကုတ်ကာ မော့ကြည့်လာသည်။

"ဘာရယ်တာလဲ.. ရယ်စရာပါလို့လား.. "

"မင်း အသက်တောင် မပြည့်သေးဘူး ခေါင်းထဲမှာ မကောင်းတဲ့ အတွေးတွေ အပြည့်ဖြစ်နေပြီပေါ့..ဟုတ်လား.."