Star Love (I)

Chapter (28)

Unicode

*************

Flame Started To Burn Part (4)

ဧည့်ခန်းတွင် အဝတ်စုတ်တစ်ထည်ကို ရေဆွတ်ကာ ကြမ်းတိုက်နေသော ရှိုင်းတစ်ယောက် မြေအောက်ခန်းထဲမှ ဝုန်းခနဲ အသံကြီးတစ်ခုကြောင့် လန့်ဖြန့်သွားမိလေသည်။ ထို့နောက် မီးလျှံ ဝေဒနာခံစားနေရသော ခပ်တိုးတိုး ညည်းညူသံ။ မီးလျှံတစ်ခုခုဖြစ်နေပြီဆိုတာကို သိလိုက်ပြီး ချက်ချင်း မြေအောက်ခန်းဘက်ကို ပြေးလာမိသည်။

မီးလျှံသည် အပြင်မထွက်သော နေ့များတွင် မြေအောက်ခန်းထဲတွင် အချိန်တော်တော်ကြာ မှော်ပညာတွေကို လေ့ကျင်နေတတ်မြဲဖြစ်သည်။

မှော်ပညာတွေ လေ့ကျင့်နေရင်း ဟိုအရင်တစ်ခေါက်ကလို စိတ်ရိုင်းဝင်သွားတာများလား ဟုထင်လိုက်မိကာ လိုအပ်လျှင် ရှိုင်းရဲ့ သွေးကို တိိုက်ရန်အတွက် ဘာကိုမှ မစဉ်းစားတော့ဘဲ တံခါးကိုဖွင့်ကာ မြေအောက်ခန်းထဲကိုပြေးဝင်လာမိလေသည်။

မီးလျှံသည် မှော်ပညာတွေကို တစ်ဆင့်ပြီးတစ်ဆင့်တက်ကာ လေ့ကျင်နေပြီး တစ်ဆင့်ပိုတက်လာတိုင်း ပိုပြီးတော့ အန္တရာယ်များလာတတ်တယ်ဟု ပြောထားဖူးလေသည်။ လုံလောက်သော စွမ်းအင်မရှိလျှင် တစ်စုံတစ်ခုထိခိုက်တတ်သည် ဟုပြောထားဖူးတာကြောင့် ရှိုင်း မီးလျှံအတွက် အရမ်းကို စိုုးရိမ်သွားမိလေသည်။

မြေအောက်ခန်းထဲရောက်တော့ မြင်လိုက်ရသော မြင်ကွင်းက ရှိုင်းကို အလန့်တကြားဖြစ်သွားစေလေသည်။

မြေအောက်ခန်း ကျောက်စားပွဲပေါ်တွင် မီးလောင်ကျွမ်းနေသော အမည်မသိ အရာများကို တွေ့လိုက်ရလေသည်။ မီးလျှံသည် မြေအောက်ခန်းထောင့်တွင် ဒူးထောက်ထိုင်လျက်ရှိပြီး တစ်ကိုယ်လုံးဖြူဆုတ်နေလေသည်။ လက်နှစ်ဖက်ကိုလည်း သံကြိုးများဖြင့် ချည်ထားကာ အများကြီးရုန်းကန်ထားသည်ထင့်၊ လက်နှစ်ဖက်လုံး နီရဲနေကာ ပေါက်ပြဲနေသော ဒဏ်ရာများဖြင့် ပြည့်နှက်လျက်ရှိနေလေသည်။ သွားစွယ်နှစ်ချောင်းလည်း ထွက်နေကာ မျက်လုံးများက မှိတ်ထားသော်လည်း ထိုမှိတ်ထားသော မျက်လုံးများမှတဆင့် သွေးတွေ စီးကျနေတာကို ထိတ်လန့်ဖွယ် မြင်တွေ့လိုက်ရတော့တာ ဖြစ်သည်။