Star Love (I)

Chapter (42)

Background Music - Fools by Troye Sivan

*****************************************************************

Unicode

***************

Flame's Love

ရှိုင်းရဲ့ ပတ်ဝန်းကျင် တစ်ခုလုံးမှာ မြင်နေရတာက သံတိုင်များဖြင့် ကာရံထားသော အချုပ်ခန်းသဖွယ် အခန်းကျဉ်းလေးတစ်ခု။ ကျောက်သား နံရံများတွင် ကပ်ထားသော မီးတုတ်များမှ အပြာရောင် မီးတောက်များ။ ထို့နောက် ရှိုင်းရဲ့သံတိုင်များ ကာရံထားသော အခန်းပတ်ပတ်လည်တွင် ဝန်းရံကာ ဂါထာရွတ်ဖတ်နေကြသော စုန်းကဝေများ။

''Arise Star Power ''

''Arise Star Power ''

''Arise Star Power ''

ဂါထာရွတ်သံတွေက နားထဲမှာ ပိုကျယ်လာလေ အခန်းထဲက နံရံတွင်ထောင်ထားသော မီးတုတ်များမှ အပြာရောင် မီးတောက်တွေက ဝုန်းခနဲ ဝုန်းခနဲ အရှိန်ပြင်းစွာ ထ ထ တောက်လာလေဖြစ်သည်။ ထိုဂါထာရွတ်သံတွေသည် ရှိုင်းရဲ့ခန္ဓာကိုယ်ထဲက အတွင်းကလီစာတွေ အကုန်လုံးထဲကို မွှေနှောင်နေသကဲ့သို့ခံစားရသော်လည်း၊ အထူးသဖြင့် ရင်ဘတ်ထဲမှာ အဆိပ်ပြင်းသော ပိုးတွေ တရွေ့ရွေ့သွားနေသလို မခံမရပ်နိုင်အောင် နာကျင်ရလေသည်။

ဆူးချွန်များနှင့် ထိုးနှက်နေသလို မခံမရပ်နိုင်အောင် နာကျင်နေရသည့် ရင်ဘတ်ကို တင်းကြပ်စွာ ဆုပ်ကိုင်ရင်း နံရံကို မှီကာ ဝေဒနာကို ကြိတ်ခံနေမိသည်။ သို့သော် ထိုနာကျင်မှုတွေသည် အခုလက်ရှိ ရှိုင်းခံစားနေရသော ဝမ်းနည်းမှု၊ အပြစ်ရှိသလို ခံစားနေရမှုတွေကို မမှီနိုင်။

မီးလျှံကို ထပ်ခါထပ်ခါ နာကျင်စေမိသည်ဆိုသော အပြစ်သည် ရှိုင်းကို သေစေလောက်အောင် နာကျင်မှုတွေ ပေးနေလေသည်။ ရှိုင်းသည် မီးလျှံကို ချစ်သည်ဆိုသော အကြောင်းပြချက်ဖြင့် အပြစ်တွေကို ထပ်ခါထပ်ခါကျူးလွန်မိနေကာ ချစ်ရသူကို ထပ်ခါထပ်ခါ နာကျင်စေမိလေသည်။

ရှိုင်းရဲ့ပယောဂကြောင့် မီးလျှံရဲ့မိဘတွေ နှစ်ခါသေခဲ့ရသည်။ ထိုအပြစ်သည် တစ်သက်လုံးခွင့်မလွှတ်နိုင်လောက်သည့်အပြစ်။ မီးလျှံကို ချစ်ဖို့ကလွဲရင် ဘာဆိုဘာမှ မသိခဲ့တဲ့ ရှိုင်းရဲ့အပြစ်။