வானமே கூறையாக இருக்க
நட்சத்திர ஒளியில்
கால் நீட்டி
கதைபேசும் எங்களுக்கு என்ன குறைச்சல் !
எல்லாம் உண்டு எங்களிடம்
ஊரே புதுத் துணியில் அலைய
ஓட்டை டவுசருடன் ஒய்யாரமாய் திரியும்
எம் பிள்ளைகள் !
எனக்கு ரெண்டு வேஷ்டி
அவளுக்கு ரெண்டு சேல
எல்லாம் இருக்கு எங்ககிட்ட
எங்களுக்கு என்ன குறைச்சல் !
படுக்க ஃபிளாட்பார்ம் இருக்கு
எவரேனும் வந்தால் குலைக்க நாய் இருக்கு
எங்களுக்கு என்ன குறைச்சல் !
மழை வந்தாலும் வெயில் வந்தாலும்
விரிக்கவும், போர்த்தவும்
ஃளெக்ஸ் இருக்கு
அடுப்பு எரிக்க
தண்டவாளத்துல பொறுக்குன கரி இருக்கு
நைட் டின்னருக்கு கடசாத்துன அப்ரோம்
கிடக்கும் வேஸ்டு புட் இருக்கு
எங்களுக்கு என்ன குறைச்சல் !
சுகத்துக்கு இருக்கவே இருக்கு
அமாவாசை இருட்டு
எங்களுக்கு என்ன குறைச்சல் !
எந்த தண்ணியும் குடிப்போம்
எந்த சோறும் திண்போம்
குப்பையில வாழும்
எங்களுக்கு என்ன குறைச்சல் !
