ရ င် ခွ င် သ စ် (c o m p l e t e d)

Y.K.T~[5]

Unicode:

ဝင်​သွားလိုက်​သည်​နှင့်​ အခန်းထဲမှာ ရှုပ်​ပွပြီးပွပလဲနေသောအ၀တ်များနှင့်​ အခြားတီဗွီရီမု ၊ အဲကွန်းရီမု ၊ ညမီးအိမ် ၊ ကျန်တဲ့တိုလီမုတ်စများစွာမှာ ခြေချစရာပင်​မရှိ​လောက်​အောင်​ကြမ်းပြင်မှာပြန့်​ကျဲ​နေသည်​ ။

အခန်းအလယ်တည့်တည့်က အိပ်ရာကြီးပေါ် ၊ ထိုအိပ်ရာရဲ့ခြေရင်းတည့်တည့်က တီဗွီ​ကြီး​ပေါ် ၊ ထိုတီဗွီဘေးက စာကြည့်​စားပွဲဟုထင်​ရပါ​သော မှန်သားစားပွဲပေါ်နှင့်​ ဆုံလည်​ကုလားထိုင်​များပေါ် ၊ အမျိုးမျိုး​သော​နေရာများတွင် ​ပြန့်​ကျဲ​၍တို့လို့တွဲ​လောင်းဖြစ်​နေတဲ့ အ၀တ်တွေက ဘယ်လိုတောင်... ။ ခုနက သူ့ကိုခေါ်လာပေးတဲ့အဒေါကြီး ချီတုံချတုံဖြစ်​နေသည်​မှာ ဒါ​ကြောင့်​ပဲဖြစ်ရမည် ။

စာသင်ပေးမယ့် ဆရာတစ်​ယောက်​ကို ကြိုဆိုတဲ့ပုံစံက တော်တော်လေးကိုရုပ်ပျက်ဆင်းပျက်ပါလားလို့ ခပ်ချဉ်ချဉ်တွေးမိသွားရသည် ။ ဒါကိုကြည့်​လိုက်တာနဲ့ ​ဒီ​ကောင်​လေးဘယ်​လောက်​ဆိုးလဲဆိုတာ ခန့်​မှန်းလို့ရ​နေပါပြီ ။

" ​ရောက်​လာပြီလား ဆရာ.. ဘယ်​လိုလုပ်​မလဲ ကျွန်​တော်​က ဆရာလာမယ်​ဆိုတာကြိုမသိလို့ အခန်း​တောင်​မရှင်းလိုက်​ရဘူး "

ခပ်​ရွဲ့ရွဲ့အသံလာရာသို့ကြည့်​လိုက်​တော့ ကုတင်ဘေးက ဆက်တီခုံဝိုင်း​လေးမှာထိုင်​နေပြီး​ ခြေ​ထောက်​က, စားပွဲခုံ​ပေါ်သို့ ရိုင်းရိုင်းစိုင်းစိုင်းတင်​ထားလျက် ​မှန်​များဖြင့်​သာကာရံထား​သော​ လေသာ​ဆောင်​ကြီးဘက်​သို့ မျက်​နှာမူထားကာ ထိုစားပွဲခုံ​ပေါ်မှ ​ဆေးလိပ်​ပြာခွက်​ထဲသို့​ ဆေးလိပ်​မီး​ဖိသတ်​နေပါ​သော ကျွန်​တော့ကို​ကျော​ပေးထားတဲ့ကောင်လေး.. ။ လူကနိမ့်​လျောထိုင်​နေ​သော​ကြောင့် ​မီးခိုး​ရောင်​ဆံပင်​များကိုသာ မြင်​နေရသည်​ ။

အသံ.. အသံက တစ်နေရာရာမှာကြားဖူး​နေသ​လိုလိုပဲ ။

ထို့​နောက် ​မီးခိုး​ရောင်​ခပ်​ဖွာဖွာဆံပင်​များ.. ။

မဟုတ်​လောက်​ပါဘူး ။

ကျွန်​တော့ဘက်​က တိတ်​ဆိတ်​နေတာကြောင့်ပဲလားမသိ.. စားပွဲ​ပေါ်မှ​ခြေ​ထောက်​ကိုအသာချပြီး ကျွန်​တော်​ရှိရာဘက်​သို့ ဖြည်းဖြည်းချင်းလှည့်​လာ​နေပါ​သောသူ ။