ရ င် ခွ င် သ စ် (c o m p l e t e d)

Y.K.T~[6]

Unicode:

ဩဂုတ်​လရဲ့မိုးရွာသွန်းမှုဟာ​ နေ့စဉ်​ရက်​ဆက်​ဟု​ပြောရမလိုပင်​ဖြစ်​နေသည်​ ။ ရွာလိုက်ရင်လည်း သည်းကြီးမည်းကြီးနှင့် အငြိုးဖြင့်ရွာနေသည့်အလား.. ။ မိုးပယောဂကြောင့် ခြံထဲကစိမ်းစိမ်းစိုစိုအပင်တွေကတော့ ကြည့်လိုက်တာနဲ့ စိတ်ချမ်းမြေ့စရာကောင်းနေပြီဖြစ်သည် ။

အရာအားလုံးပုံမှန်​အတိုင်း လည်​ပတ်​နေ​သော်​လည်း ပြောင်းလဲသွားတာက သူနှင့်​အသက်​ပင်ဖြစ်၏ ။ တောင်ကြီးမှာဟိုတယ်ခွဲဖွင့်ထားတာ မကြာသေးတာမို့ လူကြီးပိုင်းအနေနဲ့ သွားရောက်တာဝန်​ထမ်း​ဆောင်​နေရသည်​မှာ (၁)လခွဲလောက်တောင်ရှိတော့မည် ။ ဟိုတယ်ကအသစ်​ဆို​တော့လည်း နေ့စဉ်​ရက်​ဆက်​အလုပ်​များ​နေ​တာမို့ ဖုန်းအဆက်​အသွယ်​တောင် တစ်​ပတ်​တစ်​ခါ​လောက္မှသာရသည် ။

ဟိုတယ်ကောင်းကောင်းအ​ခြေကျတဲ့ အချိန်အထိ​တောင်​ကြီးတွင်​ဆက်​ရှိ​နေရဦးမည်​ဟု​ ပြော​သော်​လည်း ရင်​ထဲမှာ ဟာတာတာဖြစ်​ရုံကလွဲလို့   အထူးတလည်​လွမ်း​ချင်းညည်း​မိနေတာမျိုးလည်း ဖြစ်မနေမိပေ.. ။ အချိန်​တန်​ရင်​ပြန်​လာမှာပါ ဆိုတဲ့ ရိုးရိုးရှင်းရှင်းအတွေးလေးနဲ့သာ ဖြေ​ဖျောက်​ထားနိုင်သည် ။

သျှားနဲ့ဆက်​ဆံ​ရေးက​တော့ ပုံမှန်​အတိုင်းလေးပါပဲ.. ။ သျှားလည်းပုံမှန်​လေးပဲစာလုပ်​သလို.. ကျွန်​တော်​ကလည်း ဂရုတစိုက်​သင်​ကြား​ပေးပြီး တစ်​လတစ်​ခါ​တော့ စာ​မေးပွဲအမြဲစစ်​ဖြစ်​သည် ။ သျှားအတွက်​ အချိန်​ပေးရတာများလွန်းတာမို့ တခြားက​လေး​တွေကို တစ်ပြိုင်နက်သင်ဖို့အခက်​အခဲရှိတာကြောင့်​ သျှားတစ်​ယောက်​တည်းသာသင်​ဖြစ်​နေသည်​ ။

သျှား.. ။
ဟုတ်​ပါသည် ။ သူအတင်းအကြပ်​ခေါ်ခိုင်းခဲ့တဲ့ နာမ်​စားဆို​ပေမယ့်​ အခု​နောက်​ပိုင်း​ခေါ်ရတာနှုတ်​ကျိုး​နေပြီမို့ သျှားလို့ပဲသုံးနှုန်းဖြစ်​နေသည်​ ။ တစ်​လတစ်​ခါ စာ​မေးပွဲ​ဖြေခိုင်းလို့အမှတ်​များရင် သူလိုချင်​တာ​လုပ်​ပေးရမယ်.. ဆိုတဲ့ ကတိစကား​ကြောင့်​ ကလေးမဟုတ်သူငယ်မဟုတ် တစ်​လတစ်​ခါ သူနဲ့​လျှောက်​လျှောက်လည်​ပေးရသည်​ ။ သင်လာတာ နည်းနည်းကြာလာပြီဖြစ်လို့ သျှားက, စရိုက်​ဆိုး​တာမဟုတ်ဘဲ က​လေးဆန်​လွန်းတာဆိုတဲ့ အမှန်တရားကို တဖြည်းဖြည်းနားလည်လက်ခံလာခဲ့ရသည် ။