ရ င် ခွ င် သ စ် (c o m p l e t e d)

Y.K.T~[10]

Unicode:

တက္ကသိုလ်ဝင်တန်းစာ​မေးပွဲ​ဖြေဖို့က (၁)လ​လောက်​ပဲလို​တော့တာဖြစ်လို့ သျှားအ​ဖေရဲ့​တောင်းဆိုမှုနဲ့ အနီးကပ်​သေချာလုပ်​ပေး​နေရပြီး ညဆို(၁၀)နာရီ..၊(၁၁)နာရီလောက်​မှ ပြန်​ဖြစ်နေသည် ။ အန်ကယ်ကတော့ သူတို့အိမ်မှာပဲနေရင်း အနီးကပ်သင်ပြပေးဖို့တောင်းဆိုလာပေမယ့် နောက်ဆုံးလက်ကျန်စည်းလေးတစ်ခုအနေနဲ့ ဒီတစ်ခုကိုတော့ဖြင့် သူငြင်းဆိုထားရသည် ။

အခု​နောက်​ပိုင်း အန်​ကယ်​ဦး​ကောင်းမြတ်​နဲ့က​တော့ သျှားအ​ခြေအ​နေကို​မေးရင်းမြန်းရင်း တစ်ခါတစ်ရံစကား​ပြောဖြစ်​ကြသည် ။ အိမ်​ပြန်​ရင်​ အရင်​လိုမသိချင်​ယောင်​ဆောင်​ပြီး အသာ​လေးမပြန်​ဘဲ နှုတ်​ဆက်​ပြီးမှသာပြန်​ဖြစ်​တော့သည် ။

စကား​ပြောကြည့်​မှ အရင်​အေးတိ​အေးစက်​နှင့်​ကြောက်​စရာ​ကောင်းတယ်လို့ သတ်မှတ်ထားခဲ့တဲ့အန်​ကယ်​က သ​ဘော​ကောင်းတယ်ဆိုတာနဲ့ သျှားကိုအင်​မတန်​ချစ်​တယ်ဆိုတာ တဖြည်းဖြည်းမြင်လာရသည် ။

သျှားရဲ့အ​ခြေအ​နေက လုံးဝစိတ်​ချရသ​လောက်​တော့ရှိ​နေပါပြီ ။ ဂုဏ်​ထူးသုံး​လေးလုံးတောင်ပါနိုင်​တဲ့အထိ သျှားကအရမ်းကြိုးစားလာသည် ။ အစမ်းစစ်တဲ့စာမေးပွဲရလဒ်တွေအရ အမှတ်ကောင်းကောင်းအမြဲတမ်းထွက်သည် ။ ဒီလိုအမှတ်​များတာ​တောင်​ နေ့မအိပ်​ညမအိပ်​ ကြိုးစားယူ​နေတာမျိုးမဟုတ်​ဘဲ​ ပေါ့​ပေါ့ပါးပါးသာမာန်​လောက်​ပဲ စာလုပ်နေတာဆိုတော့.. အသည်းအသန်​သာကြိုးစားလိုက္မယ်ဆိုရင် All-D တောင် မှန်းလို့ရနေပြီ ။

ဉာဏ်လေးကောင်းရဲ့သားနဲ့ စာလုပ်ချင်စိတ်မရှိတဲ့သျှားစစ်သွေးကို အနောက်ကနေအသားကုန်တွန်းနေရတာလည်း သူ့ရဲ့နေ့စဉ်အလုပ်ပါပဲ ။ ဒါကြောင့်မို့လည်းအန်ကယ်က ဒီလိုညနက်တဲ့အထိ သူ့ကိုခေါ်ထားပြီးစာကျက်ချိန်ယူစေတာဖြစ်သည် ။ သျှားစစ်သွေးဆိုတာက ဘေးနားကနေဆော်ဩပေးနေမယ့်သူမရှိရင် စာလုပ်ဖို့အင်မတန်အပျင်းကြီးသူဆိုတာကိုလည်း အန်ကယ်ကကောင်းကောင်းကြီးသိထားသည် ။