فراشات تخشى الاحتراق

١

مرحبا يا حلوين طبعا اني مقررة بداية الشهر الجديد
انشر بس راح انزللكم بارت اول تشويقي
عقية لا تسبوني بداخلكم 😥
التهو بي وحفظو عدل ههه لحد مانشر
هسه بارت اول وبداية الشهر الجديد ابلش نشر
مو باحر هيجي وقت تعلك المسبة وليش مانزلتي
حفظو زين هذا بارت تصبيرة بسسسس..

واحب اشكر الوردة الراقية ع تصميم الغلاف
عاشت ايدج قلبي
@marwa.m

النساء.. كالفراشات رقيقات حالمات..
عشرتها الاولى تطير باجنحة الطفولة..
وعشرتها الثانية بجناح الغنج والمغامرة والطيش..
اماعشرتها الثالثة..تهفو الى الازهار بحنان وحب...
ومنذ الرابعة تهب عمرها لصغارها وبيتها...
لكن!!حين يسلط المجتمع النار والبارود
على تلك الاجنحة الصغيرة...
كيف تنجو بنفسها ام كيف تتخطى اللهيب؟؟...

مساء النرجس والياسمين

فراشات تخشى الاحتراق
الجزء الاول

على كيفج بابا زرفتي صبعي..
اي اصبر شوية بابا داخلة جوا كلش
موكتلك تذب شوك هاي الشفاطة بس الله يحفظك الا
تشفط بيها..

اي خوش تشفط مو مثل الجديدة يابسة
بعد امج واشترت شي اكيد مابي حظ..حجاها بصوت ناصي بأذني..
صاحت امي بصوت حازم ..
هاا عبد النبي هسه صارت مشتراتي مابيها حظ!
انة جريت الشوكة بالملقط وابوي صاح
اخخخ بوية عاشت ايدج:.
هذا هو طلعتها...
تلمس اصبعه وكال ..
عشتي بعد ابوج ..

انداروكال لامي..لا نهلة انت الاصل بعد عمري بس
اتقشمر وياج..
شعندي غيرج ام حسنين..
باوعتله بابتسامة مخفية وسكتت..

/////

انة جمانة وعمري ٢٦ سنة ..تخرجت من كلية العلوم
اخذت ماجستير بالفيزياء ولان ماكو وظائف
اشتغل بمدرسة اهلية ثانوية
و ادرس متوسطة بنات..

عندي اخوان ثنين ..معين  الجبير خريج معهد تقني
متزوج وعنده بنية ..
وريان بعده طالب خامس اعدادي
وواخوات ثنين اصغر مني..
افنان واديان ..

الحمدلله بابا وماما عايشين ..
بابا مدرس لغة عربية وماما معلمة رياضيات..
بابا كلش حنين وگلبه رهيف عكس ماما..
حنينة بس قوية وحازمة دائماً..
بس كله لمصلحتنا صح اغلب الاحيان ما النا رأي
بس لصالحنا..

عائلتنا ملتزمة دينيا واجتماعياً
بس العيب بيهم ماكو بنية تكمل تعليم..
بنات عمامي وخوالي كلهم هيج
يوصلون للمتوسطة ويبطلن ويتزوجن..
بعوائلنا البنية بعمر العشرين سنة متزوجة وعدها على الاقل طفلين
يعني ١٤ سنة يعتبر سن قانوني ومثالي للزواج..

لهذا اختي افنان الاصغر مني بسنتين
حاليا عمرها ٢٤ سنة..
تزوجت وهي عمرها ١٥ وهسه عدها ٣ اطفال..
واديان ٢١ سنة عمرها تزوجت بالاول متوسط وبطلت
وهسه عدها اربع اطفال ..