فراشات تخشى الاحتراق

٤٠

مساء الخير

فراشات تخشى الاحتراق
الجزء الاربعون

ليش اشتكيتي عد بشار ومادخلتيني بالموضوع
واني زوجج؟؟
بالاول شلون عرفت؟
خابرت رغد وحجتلي والباقي
شهدته من اجيت وانت ملتهية ترزلين
انعام وماتدرين من اجيت..

انت رجال وانة مشكلتي وي مرة..
اذا تدخلت بأي شكل من الاشكال..
راح يكولون يتقاوى ع النسوان..
وخصوصا انت وزوجها مو على وفاق..

هم اولاد اخو ويحبهم..وهو الوحيد اليكدر
يعاقبها..
وهو بصراحة ماقصر وياها فلشها
وصدك ريحني..
ريحج شنو بعد؟
يعني السواه خله نفسيتي واعصابي ترتاح..

ها يعني ماهمج هي الصار ؟همج بس
ضربها لخاطرج!
شبيك جياد شنو هالحجي؟؟
لخاطري شنو؟
هي غطانة واخذت جزاءها ..
وهو الولد ماقصر وحتى امه ماقبل
من حجت عليه..

كام وكف وطلع جكارته ورثها..
جمانة لحيتي هواي ترى..مو هو الجنتي
ماتتقبلي؟؟؟
هسه جاي بوجهي تكولين ريحني؟؟

باوعتله وانة عاقدة حواجبي..رجعنا ؟؟
يعني بعدها فكرتك عني ماتغيرت؟؟
ولو انت فكرتك اصلا ماراح تتغير..
ليش اليحطله ناظور ويكعد يراقب بمرة
متزوجة هذا مايثق ابداً..

لحظة لا تخربطين..اوزني كلامج من
تحجين ..
وازنته واعرف ثكله على سمعك شنوو..
بس انت الي ماتعرف حجم كلامك..اتهامك
الي مستمررر..

ماتهمتج وموضوع قبل كتلج راح وانتهى
مجرذ ماعرفت حقيقتج..
راح؟؟؟انتهى؟؟
كلي شوكت بلة؟قبل وفاة المرحوم بشهر يمكن
مو!؟؟
لا لا ورا ماخلصت الفاتحة ورحت لاهلي
الزم عدة..

هو غمض عيونه باعصاب وفتحها..كتلج
شي سابق ماضي..ومصرة تحاسبين عليه..
احاسب!
لا مااحاسب اعاتب..ومن اعاتب حقي لان
هو موضوع حقيقي..
العتب عليك تعاتب بموضوع وهممم...

تمددت درت ظهري وجريت الغطا ..
تصبح على خير..
حسيت عليه طلع..غمضت بارتياح..
اعرف يضوج من بشار..بس مو معناها
يجفص بالحجي..
بعد تفكير قليل وهو مادخل للغرفة نمت..

يوم ثاني كعدت وسويتله ريوك هو قافل
وانة قافلة..
تريك قليل وطلع..اندار عليه قبل لا
يروح..
محتاجة شي؟
لا..
يلا رايح..دربالج من تزحلكين لا تتعورين..
حجاها وطلع خله وجهي فالت..

هذا شبي مصر انة اتسرسح لو ناوية
اصعدها..
الحمدلله ربي صدك الزلم عقلهم بكد
الحمصة..
كملت شغلي وخلصت وكعدت اخابر مهجة..
هلا ام الجوج..بشريني شخباركم..
دولي راسلتج شكد ماكو..
وين ولج وين دزيتي؟
بالفيس بعد وين..
يووو من حذفتي حسابج كمت قليل ادخل
للفيس..
وبعدني مرابطة انت ماعندج لهذا
انسى افتحه..

فعلي الاشعارات وخلصيني مو ابقى
انتظر..
يو واذا شاف حجينا المحروس ينتحر
خصوصا حجيج..
هسه يكول اذا جمانة هيج تحجي بعد
ماكو ثقة ماكو ثقة ههه..