فراشات تخشى الاحتراق

٣٣

مرحبا

فراشات تخشى الاحتراق
الجزء الثالث والثلاثون

باوعت عليه وحجيت بهدوء..اي تفضل..
بابا جر عكازته راد يكوم..كام جياد سنده..
مشكور يرحم والديك..
انة هسه اجيكم انتو اخذو راحتكم تفاهمو..
وراح طلع برا وبقى الباب مردود ع النص..

ورث جياد جكارة ..باوعلي بصفنة وحجه..
اني فهمت الوالد وضعي..ماعنده اي اشكال..
واعتقد انت تعرفين وضعي..
امم مو كلش اعرف ..
هز راسه وجر نفس قوي من الجكارة ولزمها
بيده..

اني وادي متوفي صارله عشرين سنة..
عندي اخوان ثنين واخت وحدة..
الوالدة حالياً عايشة وي اخوي الجبير
محمد..
لان صحتها كلش تعبانة وتحتاج عناية..
الله يحفظها الكم ..
يحفظلج والديج..

اما زواجي السابق..تزوجت ب٢٠٠٤
وطلقت ب٢٠٠٧..
هه ..شكلج استغربتي..بس بعد السبب
عندج علم بي..
ماصار عندي اطفال وكالو الامل ضئيل..
وتولدت المشاكل لان اني سبب حرمانها
من الطفل..
انفصلنا وكلمن راح لسبيله..

الله يوفقها بس..
هز راسه وكمل كلامي وشبح ابتسامة بوجهه..
تزوجت وعدها ثلاث بنات وولد..
الله يحفظهم الها ويوفقها..
امين ..

من ذاك الوقت وانتقلت للبصرة بسبب الطائفية
واستقريت يم بيت المرحوم..
استقريت لوحدي وامي بقت هناك..
لان كانت عايشة وياي ومتعلقة بيه هي
لان اني اصغر واحد عدها..
بس ماكدرت اجيبها لان محد الها..

وهناك تعودت بنات محمد اخوي معتنين
بيها وكلش يحبوها..
يعني هسه اذا قنعتها ماترجع؟
يرادلها عناية خاصة ومااحملج شي فوك
طاقتج..
بالعكس هي راجعة لبيتها الي هو بيتك..
والانسان ببيته لازم يتدلل ويرتاح..

خل نتزوج ويصير خير ..حجاها وابتسم بامل..
الله كريم ..
اني حجيت لبيت انعام مثل ماكتلج..
كتلهم القاضي رفض القضية وشاف الحق
وي جمانة لان وضعها مناسب
للاطفال..
وحاولت اطعن واقنع القاضي..
بس هو جان كلش متعصب ..
كال حتى لو امهم مو صالحة ينطون لجدتهم
ام امهم مو ام ابوهم..
واقتنعو بكلامي..

وبالنسبة لزواجي منج فاتحت ابو ايثار قبل
لا نروح للمحكمة بالموضوع
وهو شجعني على هالشي كال انت تناسبها
وجهالنا يمك بامان..
كتله اليوم العصر اعقد عليها ..
وننتظر لشهر ال١١ حتى نعقد ويتم الزواج..
حتى تنحسبين كدامهم مرتي ويتطمنون
ماكو تلاعب..
هيج تمام؟
الحمدلله ..كله تمام..

هم هالايام راح ينشغلون بزواج ايهم
وغدير..
اذا رادو يشوفون الاطفال احتمال
يمرون بالشهر مرة..تعرفين
طبعهم بعد..
لا هذا حقهم شوكت مايحون هم اطفال ابنهم..
ومااكطع رحم احد انة..
لا حشاج ..

عندج شي تردين تسالي؟او طلب مادام كاعدين
وجاي نتفاهم..
اغلى طلب هو اولادي وضمنتهم بحضني
وهذا كلش يكفي..
اما الباقي ..يجي بوكته ولكل مقام مقال ..
صح كلامج..اني اترخص هسه وسلمي
ع الاهل..
اهلا وسهلا بيك ..