فراشات تخشى الاحتراق

٢٧

مساء الخير

فراشات تخشى الاحتراق
الجزء السابع والعشرون

من سمعت حجي رغد احس نار وشبت بيه
فار دمي بعروكي من حقارتهم..
تحجين صدك رغد؟؟يعني اياد ماصارله اسبوع
من مات
يجون يخطبوني لاخو هيج رخيص عدهم اياد
الله اكبر عليهم من بشر
بس العتب ع اهلي المفروض يطردوهم حتى
يعرفون قدرهم شنو ..

اي خية ابوج مفشلهم ومرزلهم وحتى ايثار
ماقبل يحجون وتعارك وي بشار..
يعني بشار قابل؟
اووف جمانة ذولي عائلة مال واحد يكافحهم
هو سوس البلة بشار..
شلون ليش؟

مو ورا مارحتي بقت نعامة تنوح وتلوم على
شنو اخذت الجهال وراحت
وهسه تتزوج وتذبهم هسه يصيرون مثلها
ماشايفين
بقت تكرك وتلغي نزل بشار شافها هيج
كلها اني اعقد عليها بس تطلع العدة..

استغفر الله شنو من كلب عنده شلون نطقها
وانة مرت اياد بس يمكن
حتى يسكتها يعرف بيها تكرهني..
لا حبوبة هي كلتله عفية ابني لم حهال اخوك
وذول ولد واحنا نريد الولد..

هو كلها اني اريد جمانة مرة الي ومستحيل
افرط بيها
عبالج طيبة مثل جمانة اصلا اخسر كلشي
اذا فرطت بيها ..

عزا تحجين صدك؟
ولج حتى انة انصدمت يعني يحجي بثقة
وامه تكله لا اخذها بس لخاطر الجهال
يكلها اخذها واذا طيبة ترفض زواجي منها
اطلك طيبة ..

استغفر الله ربي يا هذا شبي تخبل عزا العزاه
ومرته شسوت..
ماتدري مرته اذا تدري تكتل نعامة خلاص
هن كضن من الروس
وهسه تجالبن لان طيبة ماتشيل خيط بابرة لان
حامل ..

ورجع البيت مثل اول براسي وغديرة شايشة
هالايام ماندري شبيها ..
شبيها بعد؟
مادري بس تتعارك وتكول كلكم فكور كون تموتون
ويرجع اياد..

اه الله يهديها يا خية ويكفيني شرهم بس همزين
كتيلي حتى اعرف شتصرف وياهم
اهلي ماحجو كدامي لان ادري ابوي منعهم
من يشوفني القجر برا وحدي لو اصلي وابجي
يكابلني ويكعد..
الله يحفظه الج ويشفي بس انة كلت انبهج ترى
طيبتج وياهم ماتفيد
مشكورة حبوبة انت دومج واكفتلي...

سديته منه وصفنت ع الجهال ..صبت دموعي
بوجع وقهر
ليش هيج اياد رخيص عدهم باول يوم عدة الي
يطلبني اخو !
ومنو بشار الجنت معتبرته اخو وصديق
ولا يوم قلل من احترامي لو شفت منه نظرة
مو نظيفة..

حتى وهو سكران من حاجاني كال اريد مرة تحبني
مثل ماحبيتي اياد وصنتي..
معقولة البشر يتخبى ويغير جلده حسب الوضع
الي هو بي!
بس بسيطة خل يفتحون المضوع بعد ويشوفون
شسوي بيهم ..
اه يا ربي خلصني منهم ومن شرهم وانت وكيلي..

مسحت دموعي وقريت لاياد الفاتحة وغمضت
اريد انام تعبانة راسي
تعب من التفكير والهم..
حاولت اصفي ذهني واجت بعيوني صور
بشار يضحكلي بخجل..
ادم مجلب بيه ويبجي..
جياد!بس جياد كدامي وانة بظهره وبدت الصورة
تتوضح شلون صار كدامي بس
ماردت اكملها فتحت بسرعة...