فراشات تخشى الاحتراق

٢٠

مساء الخير

فراشات تخشى الاحتراق
الجزء العشرون

طلعت اركض واباو بوجوهم..
شبي عمو شبيكم شبي اياد؟
جاوبني عمو بتعب..كليته بابا لزمته وتخربط..
اباوله وجهه شاحب ومنتهي ..دخلو جوا للهول
جبتله ماي غسلت وجهه
فتح عيوني ابتسملي وغمض..

عمي حط ادم بحضنه وكعد ع جهة وينهت..
جيبيله علاجه جمانة حتى يشرب بلكي
يفتح عينه منا للثنتين ناخذه للدكتور..
اي انشالله..حجيتها وكمت بسرعة
جبتله العلاج بنزلتي لاكتني رغد
حجيتلها ع الدرج
واخذتله العلاج شربته كوة فاتح عينه..

عمي انطاني ادم وكام للغرفة مالته
انطيته لبشار وكعدت اعصر رجلين اياد
وراسه وصدره بلكي تتنشط
الدورة الدموية وينتبه..

رغد بقت يمنا شوية وراحت تريك بتها
وعمتي طلعت تتثاوب واجت وكفت يم
راس اياد..
شبيك يوم ماتتحمل يومية مرض
شلون شباب انتو جنا بكدكم ياقوتنا..

اباوع لاياد عصر ملامحه وبقى مغمض ما
حجه او رد عليها
وهي راحت للمطبخ اكيد راحت تتريك
وصدك وين بلا اجت يمنا قريب الصلاة
بكم دقيقة

انا اخذت ادموكلت لاياد اصلي
وارجعلك
صعدت شربت ادم ممه وصليت بسرعة ونزلت
هو ماكدر يكوم لو يتحرك
بس متمدد ومغمض
حتى اكل ماقبل ياكل ابد
سويتله عطير موز شرب شوية
لحد ماصارت ساعة ثنتين ونص
اخذو للدكتور عمي وبشار..

وامه ولا كانه ابنها المريض كعدت وتغدت
وشربت جاي وتضحك
شكد حقدت عليها ومو طبعي الحقد والغل
بس هي انسانة معدومة انسانيتها..

اخذت ابني نيمته وكعدت بالكرسي الهزاز
مكابلة الشباك
اجت ببالي رجاء صار كم يوم مامحاجيتها
بس مسجات قليلة
كلت احاجيها لان اكلني
القلق واريد اشعل نفسي..

خابرت عليها  هواي يلا جاوبت..
هلا بجمانة وين فاكدتج..
هلا بيج عيوني جنج نايمة وكعدتج..؟
لا توه خذتلي غفة وجنت افكر بيج كلت
اخابرج وانت خابرتي..

حتى انة بالي يمج شنو الاخبار ماحصلتي
شي يتأجر؟
ااه مادري خية ضاكت جنها..لا بيت لا مشتمل
لا شقة كلها انسدت بوجهي..
زين مو كلتي ع البيت التجاوز شصار منه..
غالي خية رادو ب١٥ ..
اوه هوااي..

اي بس هسه تحسين انطاني فكرة وجنها تناسبني
كلت اخذ رايج ..
اي بلكي خير شنوو..
مو سالني بعدج ماحصلتي مكان تأجري
كتله لا ماكو
وهو خطية هم سعالي ووصى اليعرفهم
ويشوف حالي متلوعة والجهال كتلهم الحر
خية شوحتنا الشمس والحر
البنكة تذب نار...

سودة عليه احس بيج وممرودة مرد عليج..
حبيبة ادري بكلبج الحنين ..
زين شنو فكرته تحسين ..
كال احطلي كرفان بالحديقة اعتبره غرفة
والحمام الخارجي الي والمطبخ بعد قريب
وهو انة لازمته الطبخ ماكو بي اشكال..