فراشات تخشى الاحتراق

الاخير

مساء الورد

فراشات تخشى الاحتراق
الجزء الثامن والاربعون (الاخير)

حجه جياد بنبرة خوف..شبيج جمانة شبيج..
انطيني كلينكس بس بسرعة..
انطاني كلينس خليت وركضت للحمام..
وجع هواي صار عندي..
فتحلي الماي خلاه دافي وسلطه ع ظهري..

بس رجليه بادت كعدت وهو بقى
يدلكلي ظهري والماي دافي شوي هديت
بس الدم مستمر ينزل..
كتله جيبلي غيارات الظاهر الشهرية
صار بيها خربطة  واجت..

راح جابلي الاريده واجه وانة لبست
وطلعت..
لكيته واكف قريب الباب ويدخن..
ها شونج هسه؟تروحين للمستشفى..
لا لا مايحتاج..تصير خربطة عادي ..
بس ماصارلج هواي من خلصتي..
اي هي تصير مرات هيج ..بس انام واتدفى
ارتاح..

يلا تمددي بفراشج بس ادخل اسبح واجي..
خل انظف الارض بس..
تولي اني انظفها تمددي..
لا شسالفه ههه ترى مو شي خطير..
يلا بسرعة مسحيها وتمددي لعد..

هو دخل للحمام وانة نظفت الارض
ومشطت وتمددت بفراشي ..
شوية وطلع واجه تمدد يباوعلي بقلق..
طمنته ماكوشي بس هو الظاهر انصدم
وعباله هو السبب ..

وراها ارتاحيت وجسمي هدأ..غفيت وفزيت
نص الليل..
بس تحركت كعد..ها شبيج يوجعج شي؟؟
لا رايحة للحمام..
بعدج ؟؟
اي احس اكو هواي..

رحت للحمام وتاكدت شهرية لان مستمرة..
رجعت لفراشي ونمت بحضنه..
الحمدلله ماكو الم كلش خفيف..
رجعت غفيت..يوم ثاني راد
جياد يحجزلي للطبيب كتله مايحتاج
وضع عادي واذا شفت نفسي
متاذية وكتها اروح..

وهو بالشغل وانة جاي اطبخ الغدا..
صفنت بوضعي..كلت ممكن صار
حمل وطاح!
زين هو وضعه موبسهولة يصير طفل
ولو مو شي بعيد عن ربنا..
بس لا لو حمل مايصير بهيج سرعة وهم
جان نزل شي ..

دعبت ربي صدك يرزقني طفل حتى
يفرح قلب جياد..
اتمنى اخلي ابو واشوف فرحته شلونها..
خلصت شغلي وغديت الجهال وتمددت
بالهول انتظره..

الجهال بغرفتهم راحو..شوية واسمع
صوت عياط ادم..
ماماا تعاااي مااما..
طفرت ركض خفت صار شي..
دخلت لكيت عبدالله لازم الركت وصاعد الكرسي
يضرب بالشاشة..
بس شافني طفر بسرعة..

تقدمت يمه وخزرته..ليش هيج عبدالله؟؟؟
مو عيب تضرب التلفزيون؟اذا شافك
عمو جياد يزعل منك وبعد ماياخذك
تاكل بركر..
هو جلب بتشيرتي ويبوس بيه
يبوس بايدي عود حتى انسى..
هاي سالفته من يسوي شي..

ادم كال صعد يضرب جيري لان اذى
توم..
وهو طلع لسانه تشجع..ماما هذا ضربه
اخذ عميته كتله هسه انت محامي بلة شلعيك
بي صاعد ويضرب الشاشة حتى يضرب
الفارة..