فراشات تخشى الاحتراق

٢٣

السلام عليكم

فراشات تخشى الاحتراق
الجزء الثالث عشر

**القاه في اليم مكتوفا وقال له
اياك اياك انت تبتل بالماء**

بقيت لازمة الشمعة لثواني وضابطة اعصابي
بس صوت المعاونة
من وراي نقذتني من حجت بلهفة ..
ها تحسين همزين اجيت شنو سيطرتو
ع الوضع؟
لا تقلقون الحمدلله اجت القوات ولزمنا كم واحد
خو ماكو احد تأذى؟؟
لا حشرناهن خطية بالصفوف وبين الرحلات
كعدن حتى لا تجي طلقة اسم الله..
عاشت ايديكم..

هالحجي انة واكفة والشمعة بيدي استحيت اروح
واعوفهم ظلمة
بس تطمنت هذا مو منهم واستنتجت هي تعرفه
وهو طول ماجان يحجي احس عينه ع جهتي
بس ماجنت اباوع ناحيته..

عرفته عليه المعاونة كلتله ست جمانة مدرسة
جديدة
وكلتلي هذا اخو ست زمن وابن اخت زوجي
هو ابتسم ورحب بيه بحرارة بس حسيت
قصفني من كال بالاول عبالي
طالبة..

وكال للمعاونة كليلهم فضت خطية اكيد
كاتلهم الخوف
انة انطيت الشمعة للمعاونة كتلها انة رايحة
اكلهم..

دخلت كلت للبنات وبيومها رجعنا من وكت
ويوم ثاني تاكدو من الموضوع صار بيد الحكومة
يلا داومن الطالبات ومو كلهن..
لاحظت زمن تسالني اسئلة غريبة وانة بسرعة
تنكر عندي
لهذا حاولت مااتصادف بيها
بس بالرجعة شفته اجه عليها وكلتلي نوصلج
بطريقنا وشكد لحت
كتلها لا ابو منذر موجود مشكورين ما تقصرون..

كمت تقريبا كل يوم اشوفه ياخذ زمن او يجيبها
ورا فترة وبعد ماعلاقتي
قوت بالبنات لان تعرفين طبعي مااعزل نفسي
زمن كالت ..
جمانة اخوي كل يوم يكلي حاجيها بس
انة استحي منج..

ع شنو تحاجيني؟
انعجب بيج من شافج اول مرة وراد رقمج
بس انة كتله مانطيك الا اسألها..
بصراحة هو كلش رايدج وهم سائل عنج
بالمنطقة..
شسالفة هذا اخوج حار بحار ههه..
اييي عشتي هو طبعه هيج..

الله يحفظه الكم بس تعرفين
هالامور مو ثوبي يعني كليله ماتكدر..
كتله الف مرة ومرة وهو ترى مو مراهق
يعني مايريد علاقة لو شي
يريد يخطبج ..

اوكي تعالو لبيتنا وهلا بيكم..
يعني ماعندك اعتراض؟
مبدأيا لا لانه اخوج واكيد زين بس
بعد اكيد التفاصيل تحكم..
خوش انة راح اخابره هسه واكله..

وكامت طلعت فرحانة ورا شوية
رجعت
كالت يريد يحاجيج عادي؟
كتلها ميخالف ..
خابرته وحجت وياه وانطتني التلفون
انة اول مرة بحياتي احجي وي رجال
غريب بالتلفون
يعني باختصار ماعرف شنو لازم
احجي بس كلت هو الموقف يجيب الحجي..

هو سلم عليه بكل احترام وكال شوكت
تردين نجيكم..
كتله براحتكم شوكت ماتردون..
زين هي الخطوبة بيها رؤية شرعية صح؟
نعم اكيد..
اكدر باجر اكعد وياج بالمدرسة واحاجيج؟
طبعا لا ببيت اهلي افضل..
ها براحتج..