فراشات تخشى الاحتراق

٤٧

مساء الخير

فراشات تخشى الاحتراق
الجزء السابع والاربعون

شفت طيبة تخابر عفتها ماجاوبت..
رجعت خابرت مرتين..
اخر شي كلت اجاوبها حتى لاتعتبره ضعف مني...
فتحت خط وسكتت..
هلاوو ام ادم شلونج شخبارج..
اهلا تفضلي؟؟

عاشت ايدج ع الحلاوة الله يرحم روح
زوجج..
الله يحفظلي زوجي ويرحم المرحوم ..

ها اكلج خابرتج اريد طريقة الطرشانة..
موجودة باليوتيوب تلكيها..
لا مو مامفهوم شرحهم..
عادي هسه اشرحلج..

حجيتلها ع السريع مختصر ..بس اسلوبي
نشفته وياها كلش..
من شافتني هيج لوحدها فشلت وراحت
بس فهمتها الطبخة..

سديت الخط وغمضت عيوني بوجع..
ظهري يصل عليه احسه ..
بقيت شوية وكمت للهول..
ها ليش مااخذتيلج غفوة ..
مابيه نومة خليني اطبخ الغدا راح ياذن
مابقى شي..
لا تطبخين طلعي الطرشانة..واذا ماعاجبج
نطلب وجبة..

ها خوش يعني اطلع الطرشانة..
اي كعدي هسه بعد وكت ورا الصلاة
طلعيها..
لا اطلعها من الفريز تذوب..
اوكي..
عفته ورحت للمطبخ وانة ماريد اطلعها لان
بيها قليل يادوب ماعون..
كلت اخليها اله وعندي قيمة اطلعها
واوكل الجهال ..

طلعتهم وغسلت تمن ووكفت احضر..
هو دخل للمطبخ..
هسه المن واكفة كعدي شوية..
لا بعد داخلة اصلي..
اي روحي صلي حتى تغدين الجهال وينامون
وارتاحي شوية..
اي..

دخلت لغرفتي والجهال اجو يمي
ويسولفون لان اليوم ماكعدت
يمهم..اخذتهم ورحت لغرفتهم صليت
حتى جياد ياخذ راحته بالغرفة..

خلصنا اخذتهم وطلعت للمطبخ شميت
ريحة التمن..
باوعت للجدر ع النار جاي يتهدر ..
يا خطية طابخة هو..بس لا شاف
الطرشانة هههه..
فتحت المايكرو لكيتها مسدودة زين
ماشافها..

ركض حميت القيمة وكعدت الجهال اوكلهم
وعيني ع الباب..
خاف يجي ويشوفني اوكلهم قيمة ويكتشف
المركة شوية..
همزين خلصنا وهو مااجه..
لميت المواعين ع السريع واخذتهم غسلو
ورحنا للغرفة..
وصيتهم مثل كل يوم وطلعت..

صبيت ورتبت الاكل ورحت بهدوء اتخنس
حتى اصيحه..
فتحت الباب بسرعة عود حتى اصيده خاف
يلعب بجهازي..
بس لا جان كاعد ع الكرسي الهزا ومغمض عيونه
فتح وي فتحة الباب..

ها تتغدى؟
يلا جاي..تغدو الجهال مو؟
اي غديتهم..
يلا جاي وراج اني..
طلعت قبله للمطبخ لان امبين صرفني
رادني اطلع..
شوية واجه كعد..باوع للمركة وعيونه
تزرزر..
انة حاصرتني الضحكة..

متاكدة شبعو الجهال اشو مخليتلي هواي..
لا شبعو الحمدلله..
يلا اكلي لعد شكلج تعبان..
انة سبعت بالحلاوة تدري..
لا الحلاوة وين صارلها شكد ..
اكلت بس قليل لان ادري بي يحبها..
وهم جنت تعبانة وماشتهي..
وهو كل شوي وباوعلي بتحقيق..