فراشات تخشى الاحتراق

١٦

مساء الخير

فراشات تخشى الاحتراق
الجزء السادس عشر

باوعت لنفسي فضت وبشار سالني برعب
جمااانة راح تجيبين شنووو؟؟
حاجيته وكوة انطق ..يمكن عفية صيح
رغد..
هو بقى ساندني وجر التلفون خابر رغد
وبقى يصيح ع امه حيل
بس ماكو ماهي..

نزلت رغد تركض من شافتني هيج كلت لبشار..
ابقى ساندها اروح اجيبلها عباية
وناخذها للمستشفى..
راحت رغد تركض ودخل عمي سامع
الصوت مالت بشار..

ها بابا شنو ولادة؟؟
حاجيته وكوة لازمة نفسي استحي اتوجع كدامهم
يمكن عمو مادري ..
خير خير انشالله اروح اصيح نعيمة واجي..
راح وشوية واجت رغد لبستني وانة فايضة
والوجع كاتلني
واياد خطية مكعدته رغد اجه يركض توة
كاعد من النوم..
كلتله رغد جيب مستمسكاتها وفلوس
والحكنا احنا ناخذها..

رجع صعد واخذوني للسيارة وطلع عمي
يدكم بردان قميصه
صعد يم بشار كله اطلع بسرعة..
وانة كاتمة صرختي كوة واقرا وادعي
بصوت ناصي..
طلعنا وبشار نزل سد الباب الخارجي
وتلاكه وي جياد
مادري شنو حاجاه واجه صعد بشار..

طلع بينا للمستشفى وانة الطسة تاخذ من عمري
مأخذ
بشار كال لعمي جياد خطية سال شبيكم وكتله
جمانة يمكن ولادة وكال اجي وياكم
خاف تحتاجون دم وهسه اجه ورانا
بقى عمي يمدح بي لان كلش يحبه..

لحد ماوصلنا ونزلت كوة كلش انطوني
كرسي متحرك يم باب السيارة
ورغد ساندتني وبشار
اخذوني بسرعة ومن فحصت الدكتورة
تخبلت بقت تركض وتسوي الاجراءات
كالت عملية بسرعة
اول مرة اشوف دكتورة هلكد عدها انسانية
عبالك امي وهيج خافت عليه..

كلتلهم حضروها بس رجلها خل يوقع ويفتح
فايل
كلتلها رغد جاي ورانا بس سوو الاجراءات
صدك لحظات ووصل اياد
وانة روحي تلوب ووجهي شحب احس
بي صار بارد..

حاجاني اياد وعيونه تصب..ان ن ن ت..ق ق قوية..
راااح..ت ت ترجعين؟؟مووو..
ما ما ماتععوفيني؟؟ما ما ..ت ت تعوفين..
اي ي يوو..
بست ايده وابتسمت وحجيت بتعب..
اكيد ارجعلك حبيبي بس خابر امي
خل تجي فدوة لعمرك...
ه ه هسه ..اخ خ خابرها...

اخذوني بعدها الممرضات وحضروني
من بعد كم فحص سوو
ودخلت للعمليات بس رغم الوضع الانة بي
احس متفائلة
بقو يسولفون وياي الاطباء
واحد منهم ضحك وحاجاني وانة نايمة
ع السدية ..

هاي شكدودتج هههه
اول مرة بتاريخي الطبي اسوي
عملية لباربي مدري فلة
اخاف افتح بطنج والكى بيها
لعابة كطن...
وهو فوك راسي ويحجي ويخدرني..
ابتسمت بتعب وبدا وجهه يتلاشى
الى ان غبت بغير عالم...

ماعرف شكد طولت..بس فتحت عيوني
بصعوبة واحس غواش
رمشت اكثر من مرة وتعدلت الرؤية..
شفت امي كاعدة يمي وبيدها دعاء تقرا
ودموعها تصب..
حاجيتها بصوت خافت..