فراشات تخشى الاحتراق

الجزء الثالث

مساء السكر

روحي عقلت واختلف قانونها .....العشرة التعب بلاها ودونها
وياك كلش باهت لونها.....ماتقدر غيرك يقدرونها
منك اني شحصلت غير المرار......ودمعة عيوني وسواد جفونها

                                                                      يحيى العلاق

الجزء الثالث

كعدت بأستقامة ورفعت راسي وباوعتله ..
تفضل بس ياريت نخلص حديثنا بسرعة
لان عندي درس..
باوعلي بعصبية مكتومة..جمانة ليش تتهربين؟
يعني عاد فرصة وحدة مااستحق؟
انة اكدر وبسهولة اروح اخطبج واخليج كدام الامر
الواقع
بس ماريد اغصبج ع شي واريد برضاتج
بس اذا استمريتي هيجي اغصبج ومصيرج ترضين!

جريت نفس عميق وركزت بوجهه وحجيت ..
تحسين انة دارسة وفاهمة ومثقفة نفسي وتعبانة عليها
حتى يكون الي مقام واحترام
تجي بسهولة تسفه شخصي وتحجيلي بالغصب!
شوف اعرف اهلي لو خطبتني يقبلون وبلا نقاش
بس هذا مو معناه انجبر واجي لبيتك زوجة
مغلوبة ع امرها..

مو انة الي ينلغي دوري ووين !!بحياتي بمصيري!
غلطان والفكرة الابالك احذفها
اعتقد الحياة تفاهم وبلا التفاهم ماكو عيشة تدوم
لهذا من هاللحظة انطيك كلمتي...
ابعد عن طريقي وانسى الصار قبل ..ولو..هو
ماصار شي حقيقي
بس اطلب منك طلب كأنثى غريبة وتطلب من
رجل شهم ورجل عسكري يعني شهامتة تصير
اولى صفاته
اتركني ولا تعترض طريقي ..
وماعتقد رجولتك تسمح انك ماتنتخي لغريبة نختك!

خلال ماانة احجي هو يباوع ويهز برجله حيل
ومن سالته هالسوال جاوب ..
لهالدرجة ماترديني!
جاوبته بابتسامة هادئة..
مو صغرا بيك لا العفو انت مابيك قصور
بس انة ماارهم وياك
واريد منك كلمة رجال وبهذا المكان واحلفك بغيرتك
تطلعني من راسك وماتعترض طريقي..

كام وكف وتنهد ورجع باوعلي..
اطلعج من راسي ماكدرلها هاي بس
تدللين مااطلع بدربج بعد
يجرالج مثل ماتردين
و..تنهد ورجع كال...
الله يستر عليج شكد شريفة..
دنكت وهو كال مع السلامة..

طلع من الغرفة وانة جريت نفس وشربت ماي
توترت واستحيت صح طبعي ماتوتر بسهولة من رجال
يحاجيني
بس نظرات تحسين ومعرفتي بمشاعره اليحملها الي
هي سبب ارتباكي وتلعثمي..
بس ارتاحيت لان اختصرتها ويا..

طلعت من الادارة ورجعت لدرسي وتشكرت من
زمن
الي من شافتني تباوع بوجهي بنظرات متروسة
اسئلة
بس ماحرجتني لان تعرف الطالبات ينتبهون..
هي راحت وانة كملت الدرس تقريبا عشر دقايق
وخلصت الحصة لان رجعت متاخرة..
وبعدها اخذت حصتين سوا
والاخيرة عندي ريست..

طلعت لاحانوت لاكتني رجاء..
ها ست امري شتردين انة اجيبلج..
لا انة اروح حبيبة مشكورة ..حجيتها وانة اتمشى
وهي تمشت وياي..
شلونهم الصغار ..
يبوسون ايدج نعمة ..
مثل مااتفقنا جيبيهم بيوم الرياضيات هنا للمدرسة
يصادف ماعندي شي واحطهم بصف
وادرسهم حتى تترسخ ببالهم المادة من اكتبلهم
ع السبورة..
اخ ياست شدعيلج حيل جاي تخجليني كلش..
دروحي وبعدين الف مرة كتلج شيلي كلمة ست
كليلي بس جمانة ..
باوعتلي مبتسمة بعيون متروسة يأس..
انت مو بس جمانة لا انت در وذهب وياقوت ..
ههه يا بعد عمري ام كلب الطيب رجوة...