فراشات تخشى الاحتراق

٣١

السلام عليكم

فراشات تخشى الاحتراق
الجزء الواحد والثلاثون

باوعتله بباستغراب هذا شيحجي..!
ردت استفزه..
ترى رح يصيرلي سنتين من ترملت..
منين يجي الحمل؟
باوعلي بخزرة وذب النظارة ع جهة وفرك
وجهه متوتر..

كام وكف وحجه بغضب مخفي..ولا يهمج
اليوم تتزوجين من جديد..
اخذ جكايره وطلع برا..
بس ندمت على حجايتي احس تجاوزت
وعيب هيج احجي..
بس لا يستاهل احسن ..

كمت باوعت للجهال شفت عبودي نايم
وادم متمدد يباوع تلفزيون..
لميت الالعاب حطيتها ع جهة وطلعت..
رحت للغرفة تمددت وغطيت وجهي ..
سمعت تلفوني دك تعاجزت اكوم..
غلست عليه..

رجع دك مرة ثانية كمت ..
لكيت مهجة تخابر..
هلا..
مكلفة نفسج شلون سلام عاوي..
شكووو..
لا تصيحين امداج..شبيج.؟
مابيه شي تعرفين الوضع..
وشنو الجديد انت قافلة وحتى شرع ربج
مامطبقته..

مامنعته انة بس هو يريد يمشيني بمزاجه..
ماكتيله لا ..بس نفسيتج تكله لا ومستحيل..
انت مو وجه نعمة..هسه اخابره اكله اخذ الثالثة
وريح راسك..
لتخافين عليه عنده غيري مو بحاجتي..

اووووه جمانة تضحكين ع روحج؟؟
لا اضحك ولا ابجي..بس هو تصرفاته
تستفز ..
اليوم اجه ومتغدي كلت ميخالف براحته..
اشو شوية وكال ..
امي وصتني عليج قبل لا تروح..
شاكة بيج حامل..!

ههههههه يحشش على روحه اصلا
اكص ايدي اذا امه هيج
حاجية..
هو انت سمعي جوابي خلاه ينشل من العصبية..
شكتيله؟
كتله منين مو رح يصيرلي سنتين
ارملة..
صخام الصخمج..الليله باتي يم الجهال
احسنلج..
لا انة كد حجايتي ومااتهرب..
نشوووف..

سديت الخط ورجعت تمددت اريد اغمض..
سمعت الباب اندك وادم يحجي..
ماما ادخل.؟
كعدت وحاجيته..
ادخل ماماتي تعال..
فتح الباب ودخل عبدالله يركض ..
ذب روحه بحضني..

ماما ميقبل الا يجي يمج..
اي عادي امشو اجي يمكم بغرفتكم..
اخذتهم ورحت للغرفة كعدت يمهم..
بقيت العبهم والهي نفسي..
هو ادري بي من يضوج يصعد للغرفة
الفوك..

للعصر يلا طلعت من يم الجهال ..رتبت
البيت وحضرت للعشا صاج ..
جاي اتبل اللحم وهو دخل للمطبخ ومبدل..
اني طالع تحتاجين شي؟
لا سلامتك كلشي موجود..

طلع بلا مايحجي شي وانة خليته براحته
لان وضعنا صاير حية ودرج..
كملت العشا قبل الاذان..
بس اذن صليت وعشيت الجهال ..
سبحتهم وبقيت يمهم بالغرفة ..احجيلهم
قصص ..
هم ينتظرون هالفقرة يومية ويحبوها..

سمعت صوت حركة برة عرفت اجه..
طفيت الضوا وبقيت التلفزيون مفتوح كالعادة..
ادم عاقل ويفتهم بس عبدالله مو كلش يفهم بعده
صغير..
وكلساع يطلع وعبدالله يخلي يمه يلاعبه..
وصيتهم ينامون وطلعت..