فراشات تخشى الاحتراق

١٥

مساء الخير

فراشات تخشى الاحتراق
الجزء الخامس عشر

باوعلي بعصبية..كال
ا ا كيييد..ان بببباك بال ال ال مدرسسسة...
جاوبته وانة كوة ابلع ريكي لان صدك سالفة
تخوف..
لا اياد ماطالعته من الجنطة ابد..
اي اي...ما ما طلعتي ..غ غ غيرج طلعه..

ج ج جيبي..و و وصل..ال ال شريحة ..
ح ح حتى ..نحرگها ..
كمت ادور باوراقي وارجف من التفكير
الله يستر من سالفة التلفون بس..

وانة ادور دك تلفونه كال هذا ابوج يخابر
اخذته وجاوبت...
ها بابا بعد عمري شلونك..
شهك وكال..هلا بهالصوت بابا خو مابيج
شي؟
ضل بالي يمج اخابر وماحصلج..

ها اي بابا تلفوني ضاع..
ضاع شلون؟؟من يمتى..
مادري اليوم رحت للدوام ورجعت مالكيته
استغفر الله ..حجاها وتنهد..
شلونج وضعج شلونه..
تمام الحمدلله مشتاقتلك كلش كلت اجيكم
الجمعة..
علواه تجين بعد ابوج شو صرتي اضرب من
اخواتج تجن بالقطارة..

ههه لا انشالله اجي بس انت تعرف بالحال..
اعرف بنيتي جبل ثابت بالكاع ما ينهز..
تربيتك ابو معين حبيبي امي وعمة والولد
شلونهم..
كلهم زينين عمتج تلوب لان مخابرتج ما حصلتج
سودة علية شلونها خو ماتعبانة؟
لا نعمة احسن صارت..
الحمدلله...

خلصت مكالمة وي ابوي واياد يباوع
ويهز برجله بتوتر..
بس خلصت عاط بيه رزالة وسواني فاهية
ومااحرص ومااهتم
لحد مافرغ عصبيته بيه وراح للحمام..

غلست كلشي ماحجيت لان مالي خلك جدال
تفكيري بالتلفون شدهني..
حضرتله ملابسه وبدل وراح للشغل وانة
متعودة اطلع ويا لحد الباب الخارجي..
بس طلع وسديت الباب تذكرت ماكتله على
جية جياد ..
لا حقه من يكول فاهية لان صايرة انة افوت
الظاهر زهايمر مرحلته متقدمة...

رجعت جوا البيت هدوء لا بي حس
ولا بي روح..
دورت بالمطبخ على طحين كلت اسويلي
شي حلويات
صدك لكيت طحين وكل المستلزمات
سويت لفة خميرة ورشيتها جوز
خدرت جاي وكعدت انتظره...

نزلو رغد وايثار شاف الماعون ع الميز
اخذله وحدة كتله انتظر الجاي كال مستعجل
طلع وراحت رغد وراه شوية ورجعت..
اول مادخلت للمطبخ ابتسمت..
شعدج هنا امشي يمي بالغرفة جاي ارتب
كنتوري..

باوعتلها بقلق..ولج رغد تلفوني مالكيته بالجنطة
ودورت بالدوام وهنا ماكو..
باوعت وهي عاقدة حواجبها..تحجين صدك؟؟ولج
خاف وحدة تكرهج باكته؟

ماعندي وحدة تكرهني ابد ومدرستنا متعودين
نعوف الجنط ونطلع مايوم
صارت بوكة..
مدري شكلج خية عاد حركي الشريحة لا يسوولج
بيها مصيبة..
اي انطيت اياد الوصل كال يمر للشركة ..

تعاي نطلع بالحديقة ناكل خنكة البيت ..
يلا اروح اجيب بان واجي ..
راحت هي وانة حضرت الصينية وطلعت
برا كعدة الكاع حلوة خصوصا فوك الحشيش
شغلت الماطور وكفت ارشه حتى يبرد
واجت رغد وبتها يمي..
كعدنا ناكل ونسولف..
اندك الباب وراحت رغد فتحته..
اجت غدير من الدوام ..ذبت جنطتها بالكاع
واخذت لفة من الماعون..