فراشات تخشى الاحتراق

٥

مساء الياسمين
حبايبي اليوم نشرت من وكت لان عدنا خطار ع العشا ومراح افرغ
ماردت تنتظرون هواي

فراشات تخشى الاحتراق
الجزء الخامس

كعدت يم امي وابوي وبدا ابوي يحجي..
الجماعة سمعتهم كلش حلوة وماعدهم لا طلايب
لا مشاكل
والولد عنده ثلث اخوان واخوات ثنين
وكلهم واصلين ومثقفين
وهو الناس كلش مدحته كالو احسن اخوانه
لان خدوم وطيب ..

زين الحمدلله بس التزامه يعني شلون طبيعتهم
مثلنا ؟
انة سالت وكالو ناس صايمة مصلية بس بعد
هذا السي تعرفينه من تكعدون
راح نكلهم خل يجي وكعدي ويا وشوفي
انة عني كلش عجبوني وارتاحيتلهم
وامج تكول هم ارتاحت لهاي القسمة
وبعد انت كيفج...

انة عندي اهم شي التزامه واخلاقه انت تعرف بيه
بعد من اشوفه واكعد وياه اقرر...
خوش حجي امج باجر تخابر للمرة ويتفقون ..
الله يسهل انشالله اروح اساعد عمة..
اي بعد ابوج توكلي...

كمت للمطبخ وحجيت لعمة وهي هم شجعتني
اشوفه واذا اقتنعت ليش لا ..
تعشينا ورحت لغرفتي لان التفكير مخليني اصفن
واصلا اريد انفرد لوحدي شوية
تمددت بفراشي وعمة بقت يمهم تباوع مسلسل..

يوم ثاني رحت للدوام ومن بعد المراقبة كعدت ادقق
والبنات متجمعين اجت زمن يمي..
طبعا رجاء اخذت اجازة هاليومين لان خطية
تمرضت صخونة وجسمها تعبان يمكن من الهبطة ..
كعدت يمي زمن تسولف بس ماذكرت مشكلة رجاء
يعني تحسين ماحاجي يمها الحمدلله
بقت تحجي بس تقريبا موضوع تحسين تجاهي سدته
لان عرفت ردة فعلي شنو..

خلصت الدفاتر واليوم هنادي جاية كباب عروك
وصمون
لفيتلي لفة وانطتني فلفل جايبة وياها
انة والحار مانفترق اكل حار اكثر من الهنود
كاعدة اكل ولازمة علب الفلفل بايدي واندك باب الغرفة
صحنا تفضل ..دخل المدير مبتسم..

ها كاعدين تعظمون ..
جاوبت هنادي
ههههه ..استاذ واكفين ع رجلينا ساعتين متواصلة
لو خروف هم مايسندنا..
انت كلشي مايسندج الله يساعد رجلج يمكن يتسوك
وماملحك...

بقينا نضحك وهو كال..
ست جمانة لو خلصتي تعاي للادارة حتى تدققين
الدرجات النهائية
اي انشالله اسناذ هسه جاية...
طلع وانة كملت لفتي ع السرعة ورحت ..
كعدت ادقق وذني نهائيات يعني اقل غلطة
بيها نجاح او رسوب سنة كاملة..

وانة مندمجة بالاوراق سمعت صوت رجال سلم
والمدير جاوبه..
رفعت راسي نفسه ابن القاضي..
رحب بي المدير وكله تفضل استاذ زياد..
بس هو شلون زياد استغفر الله محروس من
عين البشر...
سلم عليه وجاوبته ورجعت التهيت بالاوراق
وهو كعد شوية يم المدير دقايق واجت مايا
الي تصير طبعا بت عمه ..

اخذها وسلم وطلع ..وانة وي روحي احجي
هذا الشبل من ذاك الاسد
هو وابو الله يحفظهم وسيمين حيل ..
خلصت اوراقي وكمت ترخصت من المدير
لكيت ابو منذر منتظرني..
طلعت للبيت وهم ساعدت عمتي شوية بالمطبخ
وامي اجت يمنا ..