فراشات تخشى الاحتراق

١٤

مساء الياسمين

فراشات تخشى الاحتراق
الجزء الرابع عشر

سمعت الصوت وانة اغالط نفسي
فركت وجهي هزيت راسي اريد اعرف
الجاي اسمعه صدك!
بس السمعته صوت بوس وياه غزل
وغزل ماجن وحجي
انة متزوجة وماسامعته ولا اعرفه..
والاغرب والاعجب هذا صوت ايهم
ايهم وي غدير ..

اعوذ بالله ذول شجاي يصخمون انوب
هاي ببيت اهلها وتسوي هيج
وهو يدنس عرضه وبت عمته
اعوذ بالله ربي استر علينا ربي
احس رجليه ثكلت حتى ماكدر اتحرك
شسوي هسه ادخل عليهم؟
واذا دخلت شسوي واليتجرأ هيج يسوي
بنص بالبيت راح يخاف مني مثلاً..

كوة جريت نفسي طلعت للحديقة لكيت الباب مقفول
معناها ماخذين احتياطهم ومقفلين
البيبان اشوفهم ماخذين راحتهم
وعبالهم احنا فوك ماننزل...

فتحت القفل وطلعت
انوب انة فارت روحي رغم الجو حلو
بس انة احس دمي يغلي بعروگي
وكفت يم المغسلة ذبيت شالي
شعري رفعته بنص راسي كعكة
بقيت اخذ ماي بيدي الثنين واذب ع روحي
وجهي وصدري بس اريد ابرد
صدك احس انقهرت ..

انقهرت عليهم لان شباب وطايشين وماكو
منو يوجههم
وانقهرت ع الولد وابوهم بتهم
هيج تسوي بنص بيتهم
لان عمي والولد نفسهم طيبة وماعدهم غل
الغل كله موجود بعمتي
الي ماخذتها الدنيا وماتعرف ببتها شبيها
مابيها..

مخلين ثنين مراهقين ببيت واحد والغرف
كل واحد وحده والشيطان غدار ..
احس يوم بعد يوم اشوف العجايب بهذا البيت
عجيب الرحمة شلون تنزل عليه ..

بردت نفسي شوية ارتاحيت باوعت لنفسي
بمراية المغسلة
ساحت كحلتي ..غسلت وجهي بالصابونة وفركته
حيل وانشخطت الحلقة بشفتي
حلقتي مشبكة على شكل كلوب ناعمة ومتصلة
وحركتي العنيفة بلا شعور
اذيت نفسي..

غسلت حلكي ونظفت الدم همزين قليل
كعدت ع الدچة مالت باب الديوانية الخارجية
غمضت عيني اريد استرخي وفززني صوت الباب
كمت مسحت وجهي بشالي ولبسته
مشيت للباب وهو شوية بعيد عن بداية البيت
لحد ماوصلت اندك الباب اكثر
من ثلث مرات..

من كد ما عقلي مو وياي ماصحت منو
كبل فتحته..
صار كدامي جياد اقاربهم الي اغلب
وكته لابس رسمي
ولحد هسه ماشفته بكاجول بس مرة وحدة
لو قاط لو قميص ورسمي..
كتله بكلبي هسه وكتك تباوع من ورا خشمك..

كال السلام عليكم ..
عليكم السلام تفضل ..
باوعلي بنظرة مريبة ودخل وانة دخلت كدامه
بس رجل تطك برجل
اخاف يدخل للهول ويشوف ذول اهل
المصايب طالعين من الغرفة
ياربي سترك ماننفضح..

كعد بالهول وانة رحت للمطبخ صبيت
ماي حار من البراد وسويتله كهوة وخليت يمها
جكليته دائما هيج نصبله من يجي
مايريد الا كهوة..
اخذت الصينية وطلعت هو كاعد بالهول
ومخلي رجل ع رجل وهادىء..