فراشات تخشى الاحتراق

٣٩

السلام عليكم

فراشات تخشى الاحتراق
الجزء التاسع والثلاثون

كمت اريد اجيب التحاميل وفز جياد..
خير جمانة شبيج؟؟
عبودي صاير نار بس اروح اجيببله
الدوا عينك عليه..
جيبي بسرعة وتعاي..

طلعت بسرعة جبت التحاميل واللاصقات
تعوض عن الكمادات..
ايدي ترجف وخايفه عليه لا اسم الله
ينشمر..

جباد كاعد يمه وينتظرني من اجيت
اخذ التحاميل كال جيبي
اني اخليها انت ترجفين كعدي..
اخذها مني وحطها لعبودي وفز
بقى يبجي..

شلته وبقيت افتر بي وهو يون ومغمض..
لزكتله لزمة بكصته ..
وهو مغمض شلعها..
بقيت اهز بي واحركة واقرا عليه..
بدا شوية يغفى..
هالحجي جياد يفتر وياي مرة ومرة يوكف..
كلش كلش يخاف ع الجهال..

شفته استقر بالنوم شوية..حطيته
بالفراش وكعدت يمه..
جابله جياد لزكة ثانية لزكها ع كيف..
كعد كدامي وبقى صافن..
شبي شنو مستبرد؟
مادري مساع كلشي مابي..
يجوز ضربه هوا او برودة مادري..
لا تخافين التحاميل كال الصيدلاني
كلش زينة..
اي اعرفها افضل نوع هذا ..

بعدها كام اخذ جكايره وطلع برا..
انة تمددت يم عبدالله وكلساع اتلمسه..
طلعتله دعاء للحمى وقريته عليه..
بقيت اقرا بالساعة ونص..
وجياد رجع خطية تمدد يمنا ماقبل
يصعد للجرباية..

كمت صليت ودعيت ورجعت تلمسته..
الحمدلله والشكر لله نزلت هواي..
وعرك كصته وشعره..
جبتلي خاولي ونشفته شوي شوي..
تطمنت عليه نوازنت حرارته..كلت لجياد
كوم نام وراك دوام..

كام جاب مخدته وتمدد يمنا ونام..
انة ورا هواي يلا نمت..
ماطولت ساعتين وكعدني عبدالله يرفس بيه..
كومي ماما كومي..يحجي بتعب بس موتني قهر..

شبيك ياماما شنو يوجعك؟
تلمسته الحمدالله حرارته طبيعية..كعدت
وحطيته بحضني..
باوعت للشاشة ادم نايم..وجياد شوي عنا
نايم..
شلت عبدالله وطلعت ساعة ستة وربع..
شبي الحلو ليش زعلان..

ننه..ماما ننه..
يدلل وليدي البطل..كعدته ع الميز بالمطبخ
وسويتله الممه..
اخذها ورجع لحضني..
حطيته بالهول وكعدت..دقايق وطلع جياد..
صباح الخير ..شلونه عبودي..
صباح الخير الحمدلله احسن..

تقرب منه راد يحاجي وضربه
بالممه..
بداخلي كلت همزين عبوي ضربه لان
تقرب كلش عليه وخربط احوالي..
هو بقى يضحك وكام ..
وانة احاجي بعبودي ليش تضربه وهو
مغلس ومتنحس كلش..

رجع جياد كعد يمي بيده كهوة وجايبلي
ويا كوب..
جاي اشرب وعبدالله كعد بحضني وتقيأ..
ذب الحليب كله..
بقى يبجي وخاف ويرجف..وبلعومه انشحط..
ركض جياد جابله ماي وهو يبجي..
شربته وشلته للحمام..
يبجي ويكول واوا..

غسلت اله ومايقبل يعوفني اغسل..
جياد كال ابقي واني اجيبلج ملابس..
وكفت عبدالله يمي كوة قبل
ذبيت دشداشتي وغسلت..
انطاني جياد الدشداشة من ورا الباب..
لبستها وشلته طلعت..