فراشات تخشى الاحتراق

22

مساء الخير

فراشات تخشى الاحتراق
الجزء الثاني والعشرون

فزيت ووكفت على حيلي..ياعملية يمه؟؟؟
بجت امي وحجت بصوت مخنوك ..
ماقبل نكلج وحلفنا مانحجي يدري بوضعج
ماناقصج هم..
عساني بالعمى يمه خبلتيني احجي ابوي
شبي..؟
بترو رجله...

شنو!زين هسه شلونه؟
اشوة بس بعده بالمستشفى..
هسه اجي هسه..حجيتها برجفة وخوف واحس
اذني انسدت ماسمعت
شنو بعد حاجتني امي..

كل الاعرفه ركضت للكنتور طلعتلي عباية وشال
لبستهن وطلعت ركض دكيت الباب
ع وغد..
طلعتلي واستغربت من شافتني لابسة..

شكوو شبيج اياد بي شي؟؟
مسحت دموعي وجاوبتها ..لا ابوي مسوي
عمليةومادري..رايحة اشوفه هسه..
حبوبة الجهال نايمين بالغرفة تكدرين
اخليهم يمج لو اخذهم ..؟

اسم الله انشالله سالم ..وين تاخذيهم انة رايحة
يمهم هسه .
شبكتها وكتلها مشكورة عيوني بس لا تغفلين
عنهم ترى ادم حرك مايكعد..
روحي خية روحي ومن الغرفة ماطلع اكابلهم
لحد ماتجين..
ينطيج العافية رايحة انة..

هي صاحت بتها وراح لغرفتي وانة
اخذت جنطتي ونزلت ركض ..
جانو الولد كلهم كاعدين ومن شافوني سالو
ها شبيج شصاير..
بس اياد خطية استغرب وبقى صافن بوجهي..
رحت يمه وكتلهم..

ابوي مسوي عملية وماكلولي هسه يلا كالت امي
واندرت ع اياد..
فدوة اريد اروح هسه ..
ا ا اي..ب ب بس..خ خ خلي..ب ب بشار..
ي ي ياخذنا ..
لا انت تعبان ماتكدر تروح خلي بشار ياخذني..
كام جياد كال اني اخذج اذا تريدين وانشالله
سالم والدج..

لا شكرا..قبل لا اكمل حجايتي كله بشار اني اخذها
واشرلي..
روحي للسيارة بس البس واجي ...
كلت لاياد الجهال يم رغد كال روحي لا تفكرين
وصيته عليهم وطلعت فتحت الباب الخارجي
لبشار ع ماينزل
كعدت بالسيارة وهو اجه بسرعة همزين..

طلعنا وطول الطريق لساني مابطل دعاء
خايفه لا اوصل واشوف اسوأ
من السمعته
دخيلك يارب ضاقت ومنك الفرج..

وصلنا وخابرت امي ودلتني ورحنا انة
وبشار
بس احس حيلي مهدود لان مصدر قوتي
مايكدر يعين نفسه وماعنده قوة
ابوي هو اساس كل قوة بيه..

وصلت ولكيت امي وريان ببداية الممر
واكفين..
سالتهم بعبرة مخنوكة..شلونه ..طمنوني ..
شبكتني امي كالت زين
لا تخافين تعاي وياي ينتظرج هو
مشيت وياها وكاتمة عبرتي وهي تسولف
هو ماقابل يكلولي ومن عرف انقهر..

فتح الباب ودخلت جان عمي كاعد يمه
وهو شافني وابتسم..
ابتسمتله واجت عيني ع جهة رجله الشرشف
فارغ من الركبة ونازل..
بس احس
انفاسي الانكطعت مو رجله..