فراشات تخشى الاحتراق

٢٨

السلام عليكم

فراشات تخشى الاحتراق
الجزء الثامن والعشرون

كملت كلامي وكتلهم من رختصكم ..مشيت اريد
ارجع للغرفة..
صاحت عمتي..اوكفي..
درت عليها ..
تفضلي؟
دربالج ع الجهال زين وحطي ببالج كل يوم
نجي نشوفهم ..

احفادكم هم وحقكم هذا..شوكت ماتردون
كل الهلا بيكم..
مع السلامة اروح اتمدد تعبانة ..
عفتهم ودخلت للغرفة..
باوعت لادم اختنكت..احس نفسي بساحة
حرب وجهالي هم روحي..
مادري ياساعة تنسلب هالروح..

بس كعدت يمه فز وابتسملي..هو بي طبع
كل مايكعد من النوم ويشوفني كدامه يبتسم..
ابتسامته نستني همي ..
شلته وحضنتهحيل ..
كال واووا..
لا يروح ماما هسه تطيب وتصير قوي المهم
ماتبجي ترى يضحكون عليك..

كال اريد عمية يعني جوعان..شلته بين
ايديه خفت ع رجله..
لان عيالي سمعتهم طلعو..
طلعت خليته بالهول وكتله هسه اجيك..

رحت للمطبخ محد الظاهر مسوين اجتماع مغلق
سويتله بيضة واخذتها اله للهول
كاعدة اوكله وطلعت عمة من غرفتها
شايلة عبودي والممه بحلكه..
ها شوكت كعد خو ماعذبج؟
لا حلاته من مساع كاعد ..شلونه حبيبي البطل..
حجتها وباست ادم ..

الحمدلله هو سبع ادم مو صح عمة..
ايي صح سبع وبطل..حجتها وعيونها تباوعلي
بوجع..
شناوية تسوين نونو؟
اه يا عمة جنها ضاكت كلش..
ماتضيك الا تفرج..بس ليش مارفضتي حتى
لا يتأملون..
وبعدين يكولون جذبتي علينا..

ماوعدتهم بشي انة بس لازم اخدرهم لحد
مااطلع العدة..
لو رافضة اليوم جان باجر رفعو قضية
وتعرفينهم لا ذمة ولا ضمير
يعني يشترون القضية بفلوسهم واخسر جهالي
خصوصا رجل ادم تعتبر
حجة قوية..

اي عفية صح ..الله يساعدج ويقويج عليهم
ماعدهم مخافة من الله..
الله اقوى منهم كلهم وانة بي اتقوى..بس
ادعيلي انت..
دعائي كله الج ولابوج..
خو ماتعب ورا ماراحو؟
بقى يلوم بروحه وانقهر بس امج كلتله
قوي روحك لخاطرها
اذا شافتك ضعيف تضعف ..
عاد قبل ياكل وفك شوية..
الله يحفظه ويطول بعمره ..يارب..

مشت الايام ورجل ادم تحسنت..شالو الجبس منها
بس الدكتور سواله مسند يلبسه حتى يرجع
العظم ..
لان طفل وعظمه ترف خاف عليه ينحرف..
بس الحمدلله كام يمشي عليها بمرور الوقت بس مااذب المسند منه
كال يداوم عليه ست اشهر...

اما هل اياد بقو كل نهاية اسبوع يجون يشوفون
الجهال ..
بس رغد تجي وحدها هي وايثار وتبقى يمي
عصرية تكول حتى اشبع منج..
تسولف عن طيبة وعمتي صايرين مايتوالمون
وبشار عازل نفسه عنهم وماله علاقة..
بحيث ام طيبة جاي هادة على عمتي
ومتكافشات من الروس ..