فراشات تخشى الاحتراق

٣٦

مساء الورد

فراشات تخشى الاحتراق
الجزء السادس والثلاثون

يعني صديقاتي هواي..بس هالاثنين كلش
قريبات لكلبي..
من الجامعة لو وين تعرفتو.؟
مهجة اي من الجامعة..ورجاء جانت تشتغل
بالمدرسة وتعرفت عليها..
بس هسه تزوجت وبطلت..
تحجيلهم كلشي؟؟
تقريباً..امم تكدر تكول يفهىوني قبل لا احجي..

حلو الله يديمكم لبعض..اني عرفان صديقي
الكلوز..
اول مااجيت للبصرة تعرفت عليه..
وصارلي اخو والنعم منه..
ها يعني تعرفتو بالشغل؟
اي تعرفت عليه خلال الشغل وهو ساعدني
افتح مكتب ..
وتطورت علاقتنا ..بحيث اغلب وقتي
صرت اخلصه يمه..

اي حقك لان وحدك اكيد تمل..
اي بس شغل وهوايات واحد يكدر يلتهي..
بس بناية اليوم نحس بكآبتنا..من تهدىء النفوس..
والطير يلجأ لعشه..
نتكدر احنا عشنا فارغ..
والحمدلله هسه امتلأ..حجاها وابتسم..
الحمدلله..

شكلج نعستي؟
اي شوية..
نامي اني هم نعست..
تمددت عدل وغمضت عيوني..نفسيتي
هادئة بسرعة غفيت..

فززتني عضة عبدالله بصدري ..
طفرت وعطت من الوجع..وهو يباوعلي
وضايج عزا هذا شبي..
اباوع لجياد فز ويانا ويباوعلنا باستغراب..
باوعت للساعة بالسبعة ونص..

صباح الخير شبيكم؟
صباح الخير..حجيتها وافرك بصدري من فوك..
لا ماكو شي بس عبودي كعد..ماردت اكله
عضني استحي..
شبي صدرج؟
ها هذا عضني..حجيتها وكمت شلته ..وهو مبرطم
وشكله زعلان..

شلته للحمام واحاجي..ليش تعض ماما مو عيب
مو انة احبك..
فهمت كلامه ع اساس جوعان ومكعدني اوكله..
والظاهر من جوعته اخذله عضة..
غسلتله وغسلت وفرشت وطلعنا..جياد
بعده متمدد بفراشه..

ماتداوم مو؟
لا هالاسبوع مااروح..شنو كعدتي شعجب
ماترجعين تنامين؟
لا لا بعد ماتسوى صارت بثمانية..تتريك مو؟
اي هسه اغسل واجي..

اخذتلي دشداشة ورحت للحمام بدلت وعبوي
ماقبل الا يدخل يمي..
خلصت وطلعت وجياد بقى متمدد..
حضرت الريوك وهو جاب امه يمنا تريكت..
وراها نظفت البيت وشغلت الصوبات
لان اليوم الجو برد يثلج..

خليت الجهال يم جياد كاعدين بالهول
والحجية يمهم..
ومتونسين على سوالفهم خصوصا عبدالله عمره
صغير ولسانه طويل وفصيح..
وهم التهو بي..
اخذت مواد التنظيف وصعدت فوك..

الطابق الفوك بي خمس غرف وحدة مقابلة
الثانية مثل الدائرة صاير..
فتحت اول ثلاثة مقفولات..رحت لاخر وحدة
لكيتها مخزن بس شكله نظيف..
رجعت للقريبة من الدرج فتحتها..
تفاجئت غرفة كاملة وجنها واحد عايش
بيها ..