فراشات تخشى الاحتراق

٤١

السلام عليكم

فراشات تخشى الاحتراق
الجزء الواحد والاربعون

شنو وحدة بوحدة مافهمتك؟؟
دار نظره للكرسي وحجه..جبتي عناد بيه؟؟
مو طبعي اعالج الغلط بالغلط..
بس بشار ورغد مساع الصبح جابو..
ماخابرتيهم يعني؟
لا ماخابرت..وحتى وان ردت اخابر اكيد
راح انطيك علم بالاول..

الكرسي مالتي ومابيها شي لو اخذته..واعتبره
ذكرى من المرحوم..
مااعتقد انت رح تعارض هالشي؟
لا مااعارض..تنهد وكال الله يرحمه..

ورا ماتغدا وخلص دخل الكرسي للغرفة..
قربته يم الشباك وكعدت بي..
غمضت عيوني وبقيت اهتز ..اروح واجي
وانة مغمضة عيوني..

الله يرحمك اياد شكد فرحت من جبتلياه..
وشكد جنت تحب تكعد بي..
فتحت عيوني ودرت وجهي ع جهة الجرباية..
جان يدخن وصافن عليه..
حبيت نظراته وردتها تستمر..

رجعت غمضت عيوني ..بس هالمرة افكر
بجياد ونظراته..
الاحاسيس الي جاي اعيشها وي جياد..
كلها جديدة وكلها حلوة..
اكتم احساسي حتى عن روحي..بس
هي روحي الذايبة قبلي..

بقيت اهتز واتذكر لمساته الي وقبلة
ايدي..
قربه مني يرجفني..
لحظات..حسيت ايده تلامس خدي..
مشت ووصلت لشفتي..
ونزل لامس ركبتي..واندارت ايده صارت
على جتفي..

هزني هزة خفيفة..جمانة والدتي اليوم
تجي..
فتحت عيوني بوجهه مدهوشة..وين
عيشني بلحظات وانوب طلع يريد يحاجيني..
اي هلا بيها توصل بسلامة..بس منو وياها؟
سامر ابن خوي يجيبها..
يبات ويروح باجر..
اي كل الهلا بيهم..

حجيتها وكمت باوعت الجهال كاعدين
من نومهم وجاي يلعبون..
طلعت للمطبخ حضرت مقبلات اسويها
من هسه حتى اتفرغ بعدين للوجبة..

الجهال طلعو يلعبون بالحديقة
فتحت الشباك كلساع اباوعلهم..
ورا شوية هو طلع يمهم..بقى يلاعبهم
ويصورهم..
اذن الاذان وكلهم خل ندخل..ادم دخل كدامه
بس عبدالله مايقبل..

طلعت حاجيته واجاني فتحلي ايديه يريد
اشيله..
شلته وكتله ماما باجر نلعب..هسه الدنيا
ظلمة ومانشوف ..يلا تعال سويت عمية
تحبها..
جياد جان كاعد ع طرف الكرسي ..
باوعلي وكاتم ابتسامته..شنو قنعتي
يدخل حتى تتزحلكين..

هه..اشوفك مصر على هالموضوع..
شفتني متزحلكة قبل؟
كتم ضحكته وحجه..لا بس حجمج
يأكد هالشي..
حجيت بهدوء ..حجمي صغير ..يمكن..
بس تفكيري وااااسع..
كام مشى كدامي وحجه..
متراهن عليه مو واسع..

عباله راح اجاوبه ويغيضني حتى يثبت
حجايته..
بس كبرت عقلي وعفته..دخلت صليت
يم الجهال وقريت الزيارة وهم كدامي
كتلهم رفعو كفوفكم وادعو..
خلصنا وطلعنا ..هو راح للهول وانة
رحت للمطبخ كملت العشا..

ورا شوية دخل هو للمطبخ..
اني راح اجيب مشويات شنو محتاجة؟
روب جيب وياك وعصير هم خلص..
ولا تكثر مشويات..انة سويت كفتة ولزانيا
ومقبلات..
جيد..راح اخذ الجهال وياي..
اي اوكي..