فراشات تخشى الاحتراق

٣٨

مساء الخير

فراشات تخشى الاحتراق
الجزء الثامن والثلاثون

بقيت صافنة بوجهه..هي شايلة
بتها ومبتسمة..
شلونج ام ادم ..
اهلا طيبة تفضلي دخلي..
خو ماضايقتج..
لا اهلا بيج تفضلي..

دخلت جوا كالت خلينا بالمطبخ لان شافتني
جاي اطبخ..
ضيفتها وهي بتها بحضنها وتحوس تريد
تنزل..
شربتها عصير ذبته ع ملابسها..
كفختها وبقيت تعيط عليها..
قهرتني طفلة وشبعتها راشيديات..

شسالفة طيبة شبيج طفلة هي ترى!
دباعي شلون وصخت ملابسها وهن بيض..
عادي طفل مامسؤول عن اكله مايسيطر..
كومي غسليلها ..وسكتيها خطية..
اي بس اريد الحمام..

وديتها للحمام والجهال من شافوها كامو..
اجاني ادم..ماما بت شبيها اية تبجي..
تلفت ملابسها ماما وضاجت هسه
تسكت..
باوع عبدالله النا واحنا نحجي..
ايي ايييي وفرك بعيونه عود يبجي ويقلد
بت بشار..
بس شبعت ضحك عليه..جريته لحضني
وابوس بي ..
وهو مستمر يقلد عليها..

طلعت من الحمام ومنزعتها ملابسها
وغاسلتهن..
عفية انطيني تشيرت الها من عبدالله
اخاف يطكها هوا..
اي هسه اجيبلج ..جيبيها يم الجهال
خطية فرفحت بجي..

رحت جبتلها تشيرت وشورت من عبدالله..
لكيتهم كاعدين يمها ويسولفون
وياها وهي وياهم مدري شتدردم..
اخذت امها الملابس تريد تلبسها..
باوع عبدالله ونط عيونه عرفهم اله..
بسرعة شلته حاولت الهي..
من شافها لبستهم بقى يباوع عليها..

كعدت طيبة بالهول وخلتها تلعب يمهم..
وكالت..
شلونج وي جياد كلش فرحتلكم متناسبين..
الحمدلله ..جياد انشان مثقف والتعامل وياه
حلو..

ايي صح اريحلج خلصتي من نعيمة ال****
وبتها..
طيبة رجاءاً لا تحجين كدام الجهال..
ترى هاي جدتهم وعمتهم حرام علينا
نسمم افكارهم..

اوف امشي للمطبخ طاكة روحي منها..
كامت وصاحت لبتها..
امشي ماما امشي..
تريد تشيلها وعبدالله كمز عليها..
مالتي مالتي شيرت مالتي..من شافها
تريد تطلع عرف راح تخمطهن
جان مصبر روحه كوة..

انة شلته كتله مو مالاتك بس تشبهن
انت ولد ومايصير البنات يلبسن ملابسك..
ذني مثل مالاتك بس للبنات..
رجع كعد بس يباوعلها خفت يعضها
كلت لطيبة جيبيها وياج..

رحنا للمطبخ وكعدت هي وكعدت
بتها ع الميز انطتها التلفون
لان تريد ترجع يم الجهال..
باوعتلي كالت شلون جنتي متحملتهم؟
ليش مو عشتي وياي وشفتيني..يعني
مااكلوني ترى من عشت وياهم!
طبعا ابد ماانطيت بيهم لان اعرفها
مريبة وغايتها مجهولة..

اوف لج جمانة هلكت من الشغل وماتقبل
نجيب خدامة متناا..
طيبة هي المرة الي ماتشتغل ببيتها
شلون تخلص يومها!
غير بشار يريدني يمه دوم
وبتي ماتسوفيها شلون مجلبة بيه..