فراشات تخشى الاحتراق

٤٥

مساء الخير

فراشات تخسى الاحتراق
الجزء الخامس والاربعون

شفت النظارة ناسيها بالبيت وانة احس
كلبي انخمط..
جياد مايسوق بدونها شلون سالفة هاي..
دخيلك ربي بامانك هو وجهالي..
بقيت افتر والوب عبالك جاط اطلك..
احاول اهدي نفسي بس انة اصلا اعصابي
تعبانة..
لبست الخاتم وكعدت اسبح واصلي على
محمد وال محمد..

دكيت عليه على تلفون الشغل مارد..
بس لا مخلي هنا..
كمت ودورت البيت ماكو مامخلي امبين..
بقيت افتر واباوع للساعة ..
شبرت البيت كله
روحة رجعة وماكو مااجو..
عبرت ساعة ونص وانة تخبلت..
هم كل مرة حدهم نص ساعة ويرجعون..
بس مو ساعة ونص مستحيل وين يروحون
يعني وين والجهال وكت نومتهم صار
هسه اكيد نعسو..

سودة عليه يمه مادري شسوي..
كعدت بباب المطبخ وبسرعة كمت..تذكرت
امي تكول الكعدة بعتبة الباب بالليل مو زينة..
بقيت امشي بالحديقة وروحي تلوب..
ودكيت حتى مليت ماكو جواب..

بعد مامرت ساعتين انهاريت..
كشفت صدري وبقيت ابجي ..ربي دخيلك بجاه
اهل البيت عندك..
رجعهم الي سالمين ومابيهم اذى يارب..
خليتهم بحماك ولخاطر محمد واله تحميهم..
وانة كاعدة هنا..
اريد هسه يدخلون علي ومابيهم شي..

احس العبرة كسرت صدري ..وابجي
بحركة واسبح..
شوية وشفت لايت السيارة ضرب من جوا الباب..
كمت اركض للباب ..
فتحها جياد ودخل ..من شفته مابي شي ..ابتسمت..

هو انصدم من شكلي ..
غمض بقهر وحجه بعتب..
اي ليش البجي ليييش..وتنهد ومشه
فتح الباب...
صيري ع جهة خل افوت
السيارة..

صرت ع جهة وانة ملهوفة بس اريد اشوف
جهالي..
دخل السيارة ونزل يسد الباب..
انة ركضتلهم وهم ذبو روحهم بحضني..
شلتهم سوا وابوسهم..
نعسانين ماماتي موو...
هو جاب العلاكات ويمشي يمي..
تعشو ونعسانين نيميهم..

اخذتهم للغرفة غسلو وفرشو وخليتهم بفراشهم..
ادم كال ..ماما رحنا لبيت بيبي..
بيبي ام بابا؟
اي لعبنا وي اية واياد حلوو ..
استغربت من روحة جياد الهم ..
وكملها عليه عبدالله..
متمددة يمه جنت شارك ويانا..
ماما بابا عڤا ..وانة اعرف عڤا يعني عضة ..
ويسمي ابن غدير بابا هو..لان اسمه
اياد..

شنوو؟ عضيته ماما..
بقى يضحك وحط راسه بصدري وادم يكلي
ماما عض اياد ومات ..
ويحجي بثقة..كلت اكيد شافو فرفح كالو مات اسم الله..
كتلهم يلا نامو كافي نسولف..
خفت انطيهم وجه وماريد اعودهم ينقلون حجي ..

انوب بقى بالي يم الطفل خطية عبودي
عضته تشل مجربتها..
شوية وغفو ..كعدت اريد شوي استجمع
قوتي..
حتى اكدر اناقشه لان اعرف وراي هواااي
نقاش..
ولو اعرف هسه جاي يباوعلي من الكاميرا..

بعدني اريد اكوم وفتح الباب..
مد راسه وحجى..ها متجين؟
هزيت راسي وطلعت ..سديت الباب ع الجهال..
هو واكف كدامي..
مشيت للغرفة اجه وراي..
دخل وسد الباب وانة فتت للحمام..
نسيت اخذلي ثوب نوم رجعت ع ملابسي..
طلعت اخذتلي بجامة سودا ستن وقميصها..
هو جان كاعد بالكاع يم الجرباية
ويدخن..