فراشات تخشى الاحتراق

٢٦

مساء الخير

فراشات تخشى الاحتراق
الجزء السادس والعشرون

صوت بشار وشهكته احسها طلقة واجت
ببلعومي
راح الحجي مني وراحت الكلمات ..من انت
تنتظر شخص يتعافى ويجيك
ويخابروك يكولون مات
هنا ماراح تفتهم حجيهم ولا راح تصدك
بموته..

كعدت بمكاني ودموعي نزلت ..اتذكر شكد
جان فرحان البارحة
رغم جان متخوف من العملية بس يكول
همزين سويتها
عفا عليج يا دنيا شتردين منه جابها مرض
وقهر وتالي راح شبابه..

بقيت ابجي بوجع بهضم باحساس مرة ماتهنت
برجلها
اخذت التلفون وخابرت امي..خوفي على
ابوي لا يصير بي شي من يسمع..
ربي ارحمني دخيلك لا اعتراض على حكمك..

بس سمعت صوتها الجان خايف ونبرته
بيها تعب..
نحبت وبقيت ابجي بصوت عالي ..هي
وتصبح جمانة يمه جمانة..
كتلها بقهر ..يمه اياد مااات..
لا الله الا الله دخيلك ربي امانتك لا اعتراض عليك
يمه سودة عليه يمه بحدج
بقت تحجي وتنحب ..جاييلج يمه هسه
اجيب اخوج واجي ..
تعاي يمه محتاجتج تعاي...

سديته منها ونمت بمكاني وابجي..
طلع ادم من الغرفة ومن شافني هيج برطم
واجاني يركض
شبكته لصدري وابجي بس هو خاف وبقى
يبجي حيل
مسحت دموعي وبقيت احاجي ماكو شي ماما
لا تخاف بس صرت واوا وكمت ابجي
بقى يبوس بيدي وبخدودي
حطيته صدري وبقت دموعي تنزل سكتة..

شوية واندك الباب ..كمت وانة حاضنة ادم
لصدري
صحت منو ..
اني اني جياد..
فرفحت من سمعته فتحت الباب بسرعة شفته
وجهه محتقن وعابس ..

باوعلي وتنهد ..البقاء لله والله يصبركم..
هزيت راسي ومسحت دمعي ..الحمدلله على كل بلاء
بس اريد اشوفه..
غمض عيونه بقهر ..اكيد تشوفي بس لازم
ترجعين ..
حضري نفسج والجهال لازم ارجعكم ..
اريد اشوفه بالاول..
هسه ماتكدرين ننقله للبصرة افضل والاجراءات
تحتاج ركضة خو مانعوفج هنا..
انشالله هسه احضر نفسي ..

اخذت التلفون خابرت امي كتلها راح نرجع
لا تجون
ادم صاح عليه جياد وراحله..بس مااكدر اباوع
بوجه ادم احسه مكسور ومسحة
قهر ع وجهه...

حضرت اغراضي وكعدت عبدالله طلعت
اغسله
شفت جياد مخلي ادم بحضنه ويمسح ع راسه
ماكدرت الزم دمعتي
رجعت للغرفة بجيت لحد ماهلكت اخر شي
هو صاح عليه ..
ام ادم استعجلو ورانا هواي شغل..

مسحت دموعي والشهكة بعدها بيه...
اخذت عبدالله بيدي واجر بالجنطة من شافني
جياد تقرب اخذها
وشال ادم بيده وطلع..
باوعت للشقة وغمضت باسى..دخلنا الج سوا
وهسه طلعت وحدي..

اخذنا جياد  بتكسي للمطار وطول الطريق تلفونه
ماسكت كلساع واحد يخابره
ذكرني بتلفوني فتحت الجنطة لكيته مطفي
شلون نسيت اشحنه
رجعته للجنطة وحضنت عبدالله لصدري..