فراشات تخشى الاحتراق

٤

مساء الورد

شكر خاص لنورسين لان شاركت بهالصورة كتصميم 🥰ممنونة منج قلبي

الجزء الرايع

باوعتلها باستغراب يعني جاية تخطبني!
من ملامحي المتفاجئة هي حجت..
عيني جمانة هسة جنا نحجي بيج وي اهلج
وكالو نتشرف بيكم بس نعرف رايها بالاول ..

اني اليوم اجيت اخطبج لابني رغم من شفتج
ردتج اله
بس هو فاجئني من كال شايفج بالعرس وطلب
اخطبج..
ضحكت امي وكالت ..القسمة تتسبب بالف سبب..
جاوب بابا والنعم منكم ام ايثار ..

رجعت حجت هي..احجيلج عن ابني عيني
مواليد ٨٥ وخريج زراعة
بس مامتوظف لان لازم المعمل مالت الماي
مالتنا
واحنا خيرنا هواي والولد لازمين ظهر ابوهم..
انة استمع بس نفس الوقت مامرتاحة لاسلوبها
احس كمية التفاخر كلش طاغية بكلامها
ورجعت وبخت نفسي حرام اسوء الظن بيها..
جاوبتها احتاج افكر وبابا كمل كلامي..
اكيد مانفكر انشالله نردلكم الخبر وخير بخير ..

بعدها ترخصت وطلعت رحت للغرفة عمة كاعدة
تحوك بجاكيت لابن افنان
رفعته الي كالت اللمسات الاخيرة..
ابتسمتلها ..عاشت ايدج..
بس انة شوية تفكيري مشوش
بصراحة مااتمنى اتزوج شخص مااعرفه ابد
ماريد علاقة او حب لا ارفض هالشي
بس عالاقل معرفة
ونفس الوقت امه كالت شافني بالعرس
يعني هو اختارني وهالشي يمكن يخليني اتفائل...

حجيت لعمة الكلام وهي ابتسمت ورفعت ايدها
وبقت تدعي
سهلها يارب واشوف نونو عروس وافرح بيها..
انقهرت اكثر بداخلي اتمناها تتزوج قبلي
احس بيها وبغربتها وبضياعها
بس هي قوية روحيا رغم نحول جسمها..
رجعت سولفت وياها عن الموضوع وشوية واجت امي
دخلت وسدت الباب..

وج نونو ذولي فد نااس امبين عليهم زينين
وراقين
اخذنا المعلومات عن ابنهم وكال ابوج يسال ويرجعلهم
خبر..
الله كريم يمه بس تعرفين اذا مو متزن ومايناسبني مااقبل..
لا طبعا شلون قابل تاخذين واحد گوترة
انت بقيتي لهذا العمر بلا زواج لازم تاخذين اليستاهلج..
هزيت راسي وماعلقت ع كلامها
بعد هي فكرة مزروعة بمخها زرع
مهما احاول ماتتغير..
بنظرها انة معنسة..

بيومها بالليل ورا العشا حاجاني ابوي
كال الي يعرفه عنهم
هم خوش عائلة ومعروفين وبغادة بس بالطائفية
اجو للبصرة
بس راح يسال عنهم ويتاكد من كلشي ويبقى القرار
يمي
طبعا ابوي كلش يفهمني ويعاملني بعمري مايحسسني
مااعرف مصلحتي مثل ماتحسسني
امي..

يوم ثاني رحت للدوام وبلشت مراقبة وتالي رجعت ادقق
وتجمعنا كلنا بغرفة المدرسات
البنات جايبات وجبة كل يوم ع ثنين يجيبون
واليوم فطم وزمن جايبات لفات سمبوسة وترمز
جاي
وكاعدين ناكل ونسولف ..

فطوم فدوة عزلتي لرجاء حتى اوديلها
لا لان مامداومة اليوم..
لا صدك انة ماشفتها اليوم عبالي حاية ومشغولة
خطية خل اخلص واخابرها هالمسكينة..
جاوبوني بخطية وربي يفك ضيقها ويستر عليها...