فراشات تخشى الاحتراق

٤٦

السلام عليكم

فراشات تخشى الاحتراق
الجزء السادس والاربعون

دخل السيارة ونزل..راح يريد يسد الباب
شفته وكف يمكن شاف ايهم..
شوية واجه باتجاهي ..
الله يساعدك..
الله يساعدج..جاوب وهو عاقد حاجبه..
انطيني المرگة..

خليتها بيده بلا مااباوعله..
ودخلت للبيت..
وكفت احضر حتى نتغدا..ودخل هو وسد
الباب طبكها حيل..
شنو شعجب دازة مركة؟؟
اليوم رغد اجتلي الصبح وانطيتها لان
تحبها..
شايفها بشار وخابرني يريد..

اجه صار كدامي جنت اصب طرشي
بالطاسة..
ذكرتيني جبت فلفل نسيته بالسيارة..
عادي انة اجيبه..
اي وشنو دز ايهم ياخذها؟؟
اي بس انة كتله انت ماموجود..عاد دز
بان ويا..
اي بالعافية..

حجاها ودخل جوا..ادري بي يضوج
بس عيب وهم مو غريبين..
كملت كلشي وصبيت وجاي اخض
لبن ..دخل للمطبخ..
نايمين الجهال ..
مادري ماشفتهم..
اي شفتهم بالكاميرا نايمين ..

جبت اللبن وكعدت..وهو كام يحرر
الماعون عبالك مو ياكله..
هو بكلشي مرتب ونظيف ..بس مو دائما
هيج ياكل هو هسه يحارب..
انتبهلي اباوعله ..صب لبن وابتسم..
عاشت ايدج ..مابقى مو؟

لا بقى بعد مثل كل مرة احسب حساب..
بس هالمرة طار منها ماعونين..
وهذا صابتله بأنجانة..
ضحكني بس مابينتله..
اي بس بقى هواي..عيب قابل
اكلهم ماكو هو شنو قيمته الاكل..
مو ع الاكل اني..حجاها وباوعلي صفح..

غلست بعد ماحجيت..كميت لميت الاكل
وهو صبله جاي ودخل..
كملت ودخلت جوا..لكيته متمدد بفراشه
من دخلت..ذب التلفون وكعد ..
طلعتي الفلفل ؟
لا نسيت هسه اطلعه..
لا عوفي اني اطلعه..حجاها وراح..

اخذت تلفوني وتمددت..كمت اخلي بالغرفة
حتى اشوفه يفتحه من وراي
يدور بي اريد اتاكد من تصرفاته..
اجه دخل وجكارته بيده..
لو مخليتني اطلعه من مساع مو احسن..
اي بعد نسيته..
يلا هي هاي شغلتي..حجاها وكعد يمي..

غلست عليه يريد واحد يسولف ويا
بس ماريد انطي وجه..
هو تمدد وماحجه بعد من شافني قافلة..
شوية انتبهت لعبدالله كعد..
كمت اله قبل لا يجي للغرفة ..
ع صوتنا كعد ادم وطلعنا وطلعتهم للحديقة..
شوية وجه يمنا جياد..

كام يتشاقى وياهم ويلاعبهم..انة صافنة
عليهم وانتبهتله صاحني..
جمانة خابروج ورا ماطلعتي من الغرفة مرتين..
منو.؟
ماعرف تدرين بيه ماحب اتدخل..
حجاها وهو مصدك روحه..

رحت اخذت التلفون لكيت رجاء مخابرتني..
رجعت دكيت عليها ..وطلعت يمهم..
ياهلا بالحنينة شلونج..
الحمدلله رجوة شلونكم انت والعائلة..
الحمدلله كلنا زينين انة وجهالي..
اه لعد وابو الجهال ..من حجيتها هو دار نظره عليه..