فراشات تخشى الاحتراق

٣٠

مساء الخير

فراشات تخشى الاحتراق
الجزء الثلاثون

رغد فهميني ولج ماجاي افهم ..
بعدين احجيلج تفاصيل ماتسمعين الهوسة
كابة ..
ولج بس لا يكتلوها هدي رجلج وبشار مهما
يكون خطية..
تكسحي جمانة مو صوجج باااي..
ههه روحي روحي..

سدت الخط بسرعة وراحت بس انة
صح فرحت لان طلعت جوبتي..
بس نفس الوقت انقهرت تبقى طفلة ومراهقة ومحد
رباها..
يعني الذنب مو ذنبها وحدها..

لميت السجادة ضميتها واخذت تلفوني
وطلعت..
الجهال يم اهلي يلعبون وعمة بالمطبخ..
رحت يمها سولفتلها ..شبكتني
وبقت تبجي..
انوب رجعت تضحك وتكول باجر اوزع
ثواب ..

هسه اريد اخابر جياد واحاجي بس
امي وابوي شلون..
هسه اخليهم يطلعون بالحديقة وانت خابري
بالغرفة..
اي فدوة لازم اخابره اليوم..
خاف باجر يمشي بالقضية..
هسه اجيب الجهال ونطلع انت ابقي
هنا..

هي راحت صاحت لاهلي برا وانة ع اساس
اسوي العشا..
بس طلعو دخلت لغرفتي ..
اجتني هي كالت راح ابقى بالمطبخ وانت خابري..
اوكي انة راح اقفل الباب..
اي تطمني محد ..ريان برا ومعين
ماينزل ..
الله يستر..
حجيتها وقفلت الباب..

طلعت الرقم واريد اخابر وخجلانة لان الدنيا
ليل وعيب..
ومرعوبة وخايفة من ردة فعله خاف مااخذ
منه حجاية..

سميت بسم الله وخابرت..
قبل لا يكمل الرنة الاولى جاوب وانة نزيت..
الو؟تفضلي؟
الو؟
من كال تفضلي باد حيلي يمكن عرف من فزيت
وتنهدت انة بنية..

الو السلام عليكم..انة ام ادم..
احمم ..وعليكم السلام..
ام ادم تفضلي؟
شكراً..اسفة لان خابرت عليك ..
بس اريد احجي وياك بخصوص موضوع
الاطفال والقضية..

اي نعم اسمع احجي..حجاها وسمعت وياها
طكة جداحة..
انت راح تمشي بالقضية صح؟
اكيد ومااسمح يمشي بيها غيري..

زين بنظرك كمحامي عنده ضمير..
منو احق بالاطفال انة لو هم؟
وشنو الي خلي ضميري يكول انت احق؟
كونك عاشرت اياد وتعرف شكد جنت حسنة
التبعل..
وكونك سامع عني انسانة زينة وماعندي شي
يمعني اربي اطفالي بحضني..

ماجنت عايش وياج بنفس البيت حتى اعرف..
واني كرجل قانون واهل القضية اقاربي
والاقربون اولى بالمعروف..
وانت اعرف بهالشي صح؟

نرفزني بحجايته وهو يحجي مترهي وبثقة..
ماردت ابين كدامه ضعيفة..
الاقربون اذا جانو ع حق نسديلهم معروف..
بس اذا جان الاقربون ظالم هم اوكفله؟؟

ماجاي اشوف ظلم ..اجداد ومن حقهم
ياخذون اطفالهم ..
انت شابة وبالمستقبل تتزوجين والاطفال
يتشتتون..
هذا شي يخصني..

ع العموم شكرا جزيلاً اخذت من وكتك..
والظاهر القضية مقتنع بيها انت..
باجر اشوف محامي انشالله..
ماحاجة تشوفين محامي ..مبدأياً لازم نتناقش
ويمكن توصل الامور لحل..