#بداية_الخلق_قصص_الأنبياء
⭕️⭕️⭕️سلسلة بداية الخلق⭕️⭕️⭕️
📕📕📕 الحلقة 13📕📕📕
📌📌 ابراهيم عليه السلام الجزء 5
كان ياما كان ولا يحلى الكلام الا بذكر النبى عليه الصلاة والسلام
دلوقتى ياولاد زى ما احنا فاكرين ايه اللى حصل المرات اللى فاتت
ابراهيم تزوج من هاجر وخلف منها ابنه اسماعيل .. وربنا امره انه يسيب هاجر واسماعيل فى صحرا فى مكة
وهاجر مكنتش خايفة خالص خالص لانها متاكدة ان ربنا مش هيضرها وان ربنا بيحفظ عباده
وابراهيم لما سابهم اعد يدعى ويدعى ان ربنا ان مراته وابنه اعدين فى صحرا مفيهاش لا زرع ولا ماية واعدين لوحدهم خالص... فدعى ربنها انهم يكونوا بيصلوا ويرزقهم الخير الكتيير اوى وكمان دعى ان ربنا يبعتلهم ناس تعيش معاهم وتحبهم علشان ميكونوش لوحدهم
🌹🌹🌹🌹🌹🌹🌹🌹
وشوفنا ازاى ربنا استجاب لدعاء ابراهيم ورزق هاجر واسماعيل زمزم .. فاكرين لما هاجر فضلت تطلع وتنزل من الصفا والمروة وجبريل ضرب الارض بجناحه وطلعت ماية زمزم
انتوا عارفين ياولاد احنا لحد دلوقتى بنعمل زى هاجر وبنسعى بين الصفا والمروة
🌹🌹🌹🌹🌹🌹
فى الحج والعمرة ياولاد لازم نسعى بين الصفا والمروة 7 مرات وندعى ربنا زى هاجر
المهم عاشت هاجر تشرب زمزم وترضع اسماعيل... لحد اما فى يوم كان فى قبيلة... قبيلة ياولاد يعنى عيلة كدة كبيرة... القبيلة دى ياولاد كان اسمها جرهم... اسمها ايه ... جرهم... قبيلة جرهم دول كانوا دايما بيتنقلوا من مكان لمكان علشان يدوروا على ماية... ولما الماية تخلص يروحوا يدوروا على مكان تانى يعيشوا فيه... فكانوا ماشيين قريب من هاجر واسماعيل ... فشافوا من بعييد طيور طايرة فى المكان دا... فاستغربوا اوى ياولاد لان هم متاكدين ان المكان دا صحرااا خالص ومفيهوش اى ماية ... والطيور مش بتكون موجودة غير فى مكان فيه ماية
🌹🌹🌹
المهم راحوا يشوفوا ايه الموضوع وازاى طيور موجودة هناك ومفيش ماية.. لكن لاقوا حاجة غريبة جدا
لقوا هاجر والبيبى اسماعيل وكمان عين ماية زمزم... فاستاذنوها وطلبوا منها انهم يعيشوا معاها عند زمزم ... وهى فرحت جدا ان ربنا بعتلها ناس تعيش معاها ووافقت على طول بس بشرط ان الماية بتاعتها مش بتاعتهم... هى طبعا هتخليهم يشربوا منها معاها بس تكون بتاعتها
🌹🌹🌹🌹
جرهم جمعت كل الناس بتوعهم.. كل رجالتهم وستاتهم واطفالهم ... وعاشوا حوالين زمزم مع هاجر واسماعيل
وهاجر كانت سعيدة جدا لان بقى عندها اصحاب ليها واصحاب لابنها وناس تعيش معاهم
🌹🌹🌹🌹
اسماعيل كبر وسط جرهم واتعلم منهم اللغة العربية السليمة .. بس حصل حاجة غريبة جدا
ابراهيم عليه السلام شاف رؤية.. رؤية ياولاد زى الحلم كدة... بس اى رسول بيشوف حلم دا بيكون وحى من ربنا... وقولنا قبل كدة ان وحى يعنى رسالة من ربنا
يعنى ربنا بلغ ابراهيم برسالة عن طريق الحلم
شاف ايه ابراهيم ... شاف فى الحلم انه بيدبح ابنه اسماعيل
🌹🌹🌹🌹🌹🌹
ياااااالله ... دا اختبااار كبييير جدا جدا من ربنا ... ابراهيم فضل سنيين طويلة جدا معندوش اولاد ... وربنا رزقه باسماعيل وهو حبه جدا جدا .. وربنا اختبره تانى وامره انه يسيبه فى صحراء مكة... وبعد لما اسماعيل كبر شوية ربنا امره انه يذبحه
طبعا طبعا ابراهيم عليه السلام دايما بيسمع كلام ربنا .. وهو متاكد ان كلام ربنا كله خير ... وهو مش عااايز اى حاجة غير ان ربنا يكون راضى عنه ويدخله الجنة
وفعلا ياولاد ابراهيم راح لاسماعيل وقاله انه شاف فى الحلم انه بيدبحه
🌹🌹🌹🌹🌹
وسبحان الله ياولاد اسماعيل كمان كان بيحب ربنا جدا جدا ودايما بيسمع كلامه ومتاكد ان كلام ربنا هو الخير
وعلى طوووول قاله ياابويا اعمل اللى ربنا بيقولك عليه وانه ان شاء الله هيكون من الصابرين ومش هيزعل بقى ويجرى ويعيط ولا يخاف .. هو مش عايز غير ان ربنا يرضى عنه
وفعلا ياولاد ابراهيم اخد اسماعيل ومشيوا بعيد شوية كدة فى مكان فاضى... ونيم اسماعيل على الارض علشان يدبحه ... وطلع السكينة يااولاد ... وحط السكينة على رقبته... لكن حصلت معجزة تانية.. سبحان الله هو قادر على كل شئ... السكينة مش راضية تدبح او تأذى او تعور اسماعيل... السكينة معملتش اى حاجة فى رقبة اسماعيل
زى ما ربنا امر النار متحرقش ابراهيم... امر بردوا السكينة متأذيش اسماعيل
ونادى ربنا على ابراهيم ... يااا ابراهيم ... انت صدقت الحلم ... وفعلا بكدة نجح فى الاختبار ... انه سمع كلام ربنا فى حاجة صعبة جدا جدا عليه .. وكمان اسماعيل نجح فى الاختبار وصبر وكان راضى بقضاء الله
وربنا بعتلهم كبش كبييير.. كبش ياولاد يعنى خروف كدة... كبش كبير ابراهيم يدبحه بدل اسماعيل
🌹🌹🌹🌹🌹🌹
وابراهيم فعلا دبح الكبش.. واليوم دا بقى عيد لكل المسلمين ... واحنا لحد دلوقتى بندبح الكبش فى العيد الاضحى
وبكدة ياولاد لازم نتاكد ان كلام ربنا هو الخير والسعادة حتى لو صعب علينا... الجنة غالية اوى اوى ياولاد... لازم كلنا نسمع كلام ربنا واحنا مبسوطين علشان ربنا يجمعنا كلنا فى الجنة
🌹🌹🌹🌹
ونقف لحد هنا ونشوف المرة الجاية هيحصل ايه مع اسماعيل
يتبع ...
والسلام عليكم ورحمة الله وبركاته
