#بداية_الخلق_قصص_الأنبياء
⭕️⭕️⭕️سلسلة بداية الخلق⭕️⭕️⭕️
🌹🌹🌹الحلقة 23🌹🌹🌹
📌يوسف عليه السلام الجزء 7🌷🌷🌷🌷🌷🌷🌷🌷
كان ياما كان ولا يحلى الكلام الا بذكر النبى عليه الصلاة والسلام😃
اخبار الولاد الحلوين ايه.🤔.. يارب تكونوا فى احسن حال وتكونوا بتسمعوا كلام بابا وماما ويكون حب ربنا كبييير اااااد كدة فى قلوبكم🎊
شوفنا ياولاد المرة اللى فاتت ازاى ربنا كرم يوسف وبقى عزيز مصر لانه دايما كان بينجح فى كل الامتحانات بتاعة ربنا.💪.. دايما كان بيصبر ويبقى راضى ... ودايما متاكد ان ربنا هيكرمه
شوفنا ياولاد ازاى يوسف دبر امر البلاد فى السبع سنين اللى فيهم مطر وزرع وخير😃
وخلصوا السبع سنين دول وجيه بعديهم السبع سنين العجاف زى بالظبط حلم الملك اللى يوسف شرحه وفسره
🌹🌹🌹🌹🌹🌹🌹
سبع سنين ياولاد مفييش اى مطر
الزرع مات
الحيوانات تعبانة وعطشانة
الناس مش لاقية ماية
والاكل شوية صغيرين😥
والمكان الوحيد اللى فيه اكل هو قصر الملك🎀... عند يوسف ... لانه كان بياخد كل الاكل والزرع علشان اللى فى سنين الخير يحوشه ويشيله للناس فى سنين الجوع والجفاف
وفعلا الناس ابتدت تروح ليوسف لما اكلهم خلص علشان ياخدوا منه ااكل🍆🥕🌽🍅🥦🥬🥥🍒🍉
فكانوا ممكن يشتروا منه الاكل بفلوس 💵💸
او ممكن يبدلوا معاه حاجاتهم بالاكل
يعنى مثلا واحد يكون عنده سجاجيد ... ياخد السجاجيد يديها ليوسف وياخد بدالها اكل
واحد تانى عنده كوبايات مثلا وحلل...يديهم ليوسف وياخد بدالهم اكل🍕
السجاجيد والحلل والكوبايات والحاجات دى ياولاد اسمها بضاعة🍇🍇🍓🍓🍉🍌
فكل واحد كان بيجيب بضاعة يديها ليوسف وياخد بدالها اكل
بس يوسف كان بيديهم الاكل على اد عددهم بالظبط... علشان يحافظ على الاكل ومحدش ياخد اكل كتير والاكل يخلص قبل ما السنين الصعبة دى تخلص
🌹🌹🌹🌹🌹🌹🌹
فكان بيشوف كل اسرة فيها كام واحد ويديهم اكل على عددهم من غير اى زيادة لكن كان بيديهم اكل يكفيهم مدة طويلة لانهم كانوا بيسافروا ايام كتير اوى علشان يوصلوا ليوسف ويسافروا ايام كتير اوى بردوا علشان يرجعوا بيوتهم لاهلهم
يوسف عليه السلام ياولاد طول الوقت كان موجود وسط الناس يبعلهم الاكل ويبدله معاهم
🌹🌹🌹🌹🌹🌹🌹
وفى يوم من الايام ويوسف وسط العمال بتوعه بيوزع الاكل دخل عليه شوية ناس
ياترى مين الناس دى...🤔..
ها مين هيقول.😃...
الناس دول ياولاد طلعوا اخوات يوسف
ايوة
اخوات يوسف اللى رموه فى البير😱
الاكل اللى عندهم خلص وجايين ياخدوا اكل من عند عزيز مصر
طبعا اول لما يوسف شافهم عرفهم على طول لانهم لما رموه فى البير كانوا كبار وهو صغنن ففاكر شكلهم كويس لانه متغيرش
لكن هو كان صغير اوى ساعتها وطبعا دلوقتى كبر وبقى راجل فشكله اتغير فاخواته معرفوهوش خالص👍
وفعلا ياولاد اخوات يوسف طلبوا من يوسف الاكل الل عايزينه وهم مش عارفين خالص انه هو اخوهم يوسف اللى اترمى فى البير ...
اعد يوسف يتكلم مع اخواته وهم مش عارفين انه يوسف وسالهم جايين منين واهلكم اد ايه وكدة... وقالوله ان عندهم اخ اسمه بنيامين عند ابوهم بس مجاش معاهم علشان ابوه بيحبه جدا وبيخاف عليه
فاكرين بنيامين ياولاد..🌷. بنيامين دا اخو يوسف من نفس الام ونفس الاب
🌹🌹🌹🌹🌹🌹🌹
لكن اخواته اللى رموه فى البيير اخواته من ابوه فقط لكن عندهم ام تانية
راح يوسف قالهم لازم تجيبوا اخوكم دا معاكم المرة الجاية... ولو جيتوا من غير اخوكم ملكوش اى اكل عندى ومش هاديكم اى حاجة
فردوا وقالوا انهم هيحاولوا مع ابوهم يعقوب لانهم عارفين انه بيحبه جدا ومن ساعة ما ضيعوا يوسف وهو بيخاف عليه منهم
امر يوسف العمال انهم يجهزوا ويحضروا الاكل اللى اخواته طلبوه وامرهم كمان انهم يحطوا وسط الاكل البضاعة بتاعتهم تانى من غير ما يعرفوا
يوسف ياولاد رجعلهم بضاعتهم تانى علشان خاف يكون معندهمش بضاعة تانية فميعرفوش يرجعوله تانى
وهو عايزهم يجوا تانى علشان يجيبوا اخوه معاهم
وبردوا مرضيش ياولاد ياخد تمن الاكل اللى اخواته واهله هياكلوه
شوفوا اد ايه يوسف كريم وطيب واخلاقه جميلة
🌹🌹🌹🌹🌹🌹🌹
اخوات يوسف رجعوا لابوهم وقالوله ان عزيز مصر قالهم انه مش هايديهم اكل تانى لو مجابوش معاهم بنيامين المرة الجاية
رد يعقوب عليهم انه مش ممكن هيوافق ان بنيامين يروح معاهم ويخاف يضيعوه زى ما ضيعوا يوسف
اخوات يوسف ابتدوا يفضوا الاكل اللى اخدوه من يوسف وهم بيفتحوا حاجاتهم لاقوا ايه.....
مظبوط ياولاد
لاقوا بضاعتهم تانى فى حاجتهم يوسف رجعهلهم
فراحوا ليعقوب وقالوله ان العزيز رجعلهم البضاعة وانهم هيخلوا بالهم من بنيامين وهيحافظوا عليه وانهم لازم يروحوا علشان مش هيكون عندهم اكل وفضلوا يقولوا كدة علشان يوافق يبعتوا معاهم
🌹🌹🌹🌹🌹🌹🌹
وهم فعلا ياولاد كانوا صادقين المرة دى.. هم مش عايزين ياذوا بنيامين خالص... هم بس عايزين يروحوا يجيبوا الاكل ويرجعوا تانى لاهلهم
هنقف هنا المرة دى وهنشوف المرة الجاية يعقوب عليه السلام هيوافق يبعت بنيامين ولا مش هيوافق وهنشوف ايه اللى هيحصل🤔
يتبع ....
والسلام عليكم ورحمة الله وبركاته
