⭕️⭕️⭕️سلسلة بداية الخلق⭕️⭕️⭕️
🌹🌹🌹 الحلقة 32🌹🌹🌹
📌موسى عليه السلام الجزء 4
كان ياما كان ولا يحلى الكلام الا بذكر الله ثم الصلاة على رسول الله
🍒🍃🍒🍃🍒🍃🍒🍃🍒🍃🍒🍃🍒🍃🍒🍃🍒🍃
قلنا المرة اللى فاتت يا حلوين ان ربنا قال لسيدنا موسى ياخد اخوه هارون ويروحوا لفرعون يقولوله يسمع كلام ربنا ويسيب بنى اسرائيل كمان تسمع كلام ربنا علشان ربنا يدخلهم الجنة
سيدنا موسى واخوه هارون راحوا لفرعون وكلموه براحة خالص وقالولوا ان ربنا هو اللى خلقنا وخلق الارض والسما وهو اللى رزقنا وهو اللى لازم نحبه ونعبده وحده فرعون اتضايق اوى من الكلام دا وقال مفيش ربنا وقال ان هو ربنا لان فرعون شرير اوى. ازاى يقول هو ربنا وهو مخلقش حاجة ولا يعرف يخلق وبياكل وبيشرب وهيموت كمان بس علشان هو شرير وبيسمع كلام الشيطان بيقول اى كلام وحش زيه
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
سيدنا موسى قال لفرعون انه هيوريه ايه يعنى حاجة محدش يقدر يعملها غير ربنا
راح سيدنا موسى رمى العصاية بتاعته بقت تعبان ودخل ايده ف جيبه بقت بيضاااا اوى راح فرعون الشرير بدل ما يقول ايوة صح دى ايه من ربنا وانه هيبقى مسلم طيب قال ان دا سحر وسحر يا ولاد يعنى حاجة مش حقيقية زى مثلا اما اجيب بيضة والونها اخلى شكلها كورة اللى يشوفها يقول كورة لكن افتحها من جوا تلاقيها بيضة ففرعون قال على ايه موسى انها سحر وقال انه هيجمع كل السحرة ويعملوا مسابقة مع موسى واللى يكسب يبقى هو دا الحق
🍒🍃🍒🍃🍒🍃🍒🍃🍒🍃🍒🍃🍒🍃🍒🍃🍒🍃
جيه يوم المسابقة وكل السحرة موجودين وفرعون وجنوده وبنى اسرائيل والناس كلها متجمعة
السحرة ابتدوا الاول وعملوا سحر عظييييم اوى ورموا العصيان بتاعتهم وربنا قال لسيدنا موسى متخفش انك انت الاعلى ورمى موسى العصاية بتاعته وعصايته كسبت كل العصيان بتاعت السحرة
🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲🌲
والسحرة اكتر ناس عارفة السحر فعرفت ان دا مش سحر وان دا من عند ربنا ومحدش يقدر يعمل الاية دى الا ربنا راحوا كلهم سجدوا ادام فرعون والناس المتجمعين وقالوا احنا بقينا مؤمنين ومسلمين وهنسمع كلام ربنا
فرعون اتغاااااظ جدا جدا وقالهم ازاااى تعملوا كدة انتوا اكيد اتفقتوا معاه على الكلام داا انا هعذبكم كلكم وهقطع رجلكم وايديكم وهقتل ولادكم
لكن المسلمين مهمهمش التهديد دااا ومبقوش خايفين من فرعون ومن عذابه واعدوا يدعوا ربنا انه يثبتهم ويقويهم
🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹🌹
ودا يا ولااد لازم يبقى حال كل المسلمين لازم نتوكل على ربنا وندعيه دايما يقوينا وينصرنا ويثبتنا القوى هو اللى ربنا معاه حتى لو اتعذب واتضرب واتسجن طالما بنسمع كلام ربنا ميهمناش اى حاجة وحشة تحصلنا ولما نصبر ونقول الحمد لله ربنا يدينااا حسناات كتيرر اوى اوى ويدخلنا الجنة
وهنشوف المرة الجاية ازاى ربنا هيبعت لبنى اسرائيل ايات كتير علشان يبقوا مسلمين وهم هيفضلوا اشرار زى ما هم وازاى ربنا هيعاقبهم
يتبع ...
🌷🍃🌷🍃🌷🍃🌷🍃🌷🍃🌷🍃🌷🍃🌷🍃🌷🍃
